الخطة الجهنمية...

مشكلة الشرق الأوسط هيه مشكلة أزليه
من أول ما كوهين خطط هدم الأمة العربية
و حطة يا بطة يا دقن الفار .... انت فاهمها ولا حمار
حزر فزر يمكن تقدر .... تعرف سرها ولا تحتار
أصلها خطة فوق الخارطة .... نقطه بنقطة و ليها مسار
واحد
سهلها و بسط .... خدلك حبة حرية و
اتنين
اضحك قوي زأطط .... لكن سيب أرضك ليه
و تلاته
تبقي غتاتة .. لو عقلك فكر تاته .. يصنع قنبلة نووية
و أربعة
لغة متطبعة .. مد و روسه و متصنعة بحروف عبروماتيكية
و خمسة
تنسي في همسة .... بغداد ويا فلسطين
لحسن تخرس من لمسه .... و يجيبوا راسك في الطين
و ستة
الكسكته .. تبقي رمزك و شعارك
و تفرط حتة بحتة.. عن وطنك كله و دارك
و سبعه
بند متابعة .... من أكبر ميكروسكوب
حيشوف أحاسيسك نابعه .... فيتماني أو فيها ميكروب
و ثمانية
تنسي في ثانية .... إنك عربي و تتأمرك
يعني تبقي حاجة تانية .... و تقول حاضر و بأمرك
و تسعة
لازم تسعي .... و تكون مخلص و أمين
و تعيش في الأرض الواسعة .... ماتكونش صلاح الدين
و عشرة
تبقي حشرة .... ولالكش أي هويه
ودي أحلي و أجمل بشرة .... في بنود الإتفاقية