الخطيئة إسمها أهبل بعد اللى بيحصل فى حركة شباب6 ابريل واللى المفترض انها الحركة الانجح فى السنة اللى فاتت الحكاية بقت مقيتة فعلا فريدم هوس تحولت فجأة لمحور حديث الشباب الناس اللى بتتهم اللى بيسافروا امريكا انهم عملا وبيتهموا ان اللى بيتعامل مع منظمات دولية انهم عملا وبيتهموا اللى بيسافروا علشان يشوفوا حركات التغيير فى العالم ازاى نجحت برده عملا ولا مؤخذه يعنى انتوا عايزين الناس تقفل على نفسها فى بطرمان وماتشوفش الناس بتفكر ازاى؟ وازاى بينجحوا؟ عايز اتكلم واحده واحده عن الهبل اللى بيتقال اولا : التعامل مع منظمات عالمية لما منظمة او تجمع تتقاطع مصلحك معاه انت عايز ديمقراطية وهما عايزين ديمقراطية انت عايز حقوق انسان وهما عايزين حقوق انسان وهما عندهم خبرة انت لية ماتستفدش منها؟ هما هيضربوك على ايدك ويقلولك والنبى حب اسرائيل؟؟ ولا هيشيلوا مخك ويحطولك واحد تانى هو انت اهبل علشان يضحكوا عليك ؟؟ ولا انت عارف انك اهبل ولو رحت علشان تتعلم هيضحكوا عليك فعلا وهترجع تقول انك بتحب اسرائيل روح واتعلم واللى ما يعجبكش شيلة من دماغك واكسب خبرة يا اهبل ثانيا : التمويل الخارجى هو يعنى اية تمويل خارجى؟ يعنى آخد فلوس من اى دولة غير مصر صح؟ طيب الناس الحلوين الطعمين المأطأطين اللى بيخدوا فلوس من العرب؟ الناس اللى بتسافر تاخد من سوريا؟ والناس اللى كانت بتاخد فلوس من المرحوم صدام؟ والناس اللى بيتبعتلهم دعوات لحضور مؤتمرات ويتبعتلهم عشر اعضاء تمن تذكرة الطيران؟ والجرايد اللى بتعمل ملاحق لحكام دول معينة تمدح فى انجازتهم وهما مستبدين وظلمه ؟؟ والناس الحلوين الطعمين التانيين اللى ناقص يطبلوا ويزمروا ويعملوا عجين الفلاحه لحكام دول علشان يقفشوا اى فلوس دول نسميهم اية؟ من نفس المنطلق يبقوا عملا ومن منطلق الآخر مش عملا دول هبل - جمع أخبل يعنى ثالثا : اللى شايف انه ممكن يضحك علية يبقى يروح يتعالج اكرملة رابعا : بعض اللى بيهجموا المنظمات دى كانوا بيتعملوا فى بعض الفعليات مع فريدريش إيبرت اللى هى ليها مكتب فى تل ابيب سياتك خامسا : المفروض انك تعرف كل تجارب العالم فى الدنيا علشان تتعرف عليها كويس وتقدر تستفيد من الدروس دى سادسا :حركات العيال الصغيرة بتاعت رسايل الموبايل اللى بتتهم احمد ماهر انه عميل بتفكرنى باللى شارى موبايل جديد صينى وبيسمع الناس معاه فى المترو اغانى هابطة سابعا : احمد ماهر اللى اتعذب واتسحل لما خطفوة واللى اتسجن شاهرين علشان بيدافع عن استقلال القضاة و محمد عادل بتاع الاخوان المسلمين اللى اتسجن بتهمة تكوين خلية لحماس واللى كل كتباتة بتكلم عن المقاومة فى فلسطين واللى اتسجن اكتر من 110 يوم اكيد الناس دى مش عملة لو كانوا عايزين يبقوا عملة فى طرق تانية كتير ولو عايزين يقفشوا فلوس كان فية طرق كتير كلكوا تعرفوها ثامنا :شوفوا الصهاينة نجحوا ازاى انهم يسوقوا للبلاوى والمجازر والجرائم اللى بيعملوها ويخلوا عالم يقول انهم بيدافعوا نفسهم عارفين ازاى؟ اقلوكم انهم عارفينا كويس وعارفين ازاى يكون ليهم اتصالات بعالم ماتيجوا نحاول نسوق لقضيتنا احنا كمان اللى هى اساسا قضية حق مش باطل زى قضيتهم تاسعا : انت لية متخيل انك ما تقدرش توصل الحقيقة للناس وتكسب ناس جديده فى صف قضيتك اللى مش محلية غصب عنك؟؟ مش اللى بيأثروا فى القضية الفلسطينة اغلبهم مش عرب؟ لما تروح وتقول لبوش انت مجرم حرب والعالم هيبقى افضل لو مافيهوش امثالك زى ما المدون والناشط محمود صابر راح وقالة كدا والواشنطن بوست شلقت على بوش والكلام اللى محمود قلهولة هو مش انت كدا بتوصل صوتك للعالم برده وبدافع عن قضيتك ولا اية؟ عاشرا : فوكك منى
