سؤال الى أعزائي الاخوانجية اللي بيتسائلوا فى استغراب ليه ده حصل ؟

تعالوا نتخيل ... يا ترى لو كانت اتعكست الآية
و كان جبهة الانقاذ فى الحكم ( و العياذ بالله )
* و فى اول 100 يوم .. نزل الاسلاميين لجمعة المحاسبة
فطلع عليهم شباب الوفد كسروا المنصة و دشدشوها و ضربوا كل الاسلاميين بالطوب و كسروا كل حاجة
ثم يعدي الموضوع بدون محاسبة
* ثم يدعوكم الرئيس لحوار واحد ورا التاني و فى الاخر يعمل اللي مزاجه
* ثم تنفض لوعودها بتوافق فى الدستور , و تشتغل شغل شو اعلامي و هي عارفة انه كذب .. و تجيب حكومة تقولك توافقية اهيه .. و تعمل دستور سلق و تاخد الناس فى دوكة اسبوع و تقولك اهوه استفتاء اهوه .. و هكذا
* ثم فى الاتحادية ... لما يروح ملايين الاسلاميين عند قصر الاتحادية
معترضين على قرارات الرئيس المدنى ..
يطلع عليهم تاني يوم على معتصميهم .. شوية عيال " بلطجية معفنين و يقلعوا خيامهم و يتعدوا على النساء المسنات و الناشطات
و يشوهوهم فى سمعتهم و يقعدوا يقولوا لولب و قذارة و قلة ادب
* ثم تستمر فى قراراتها و مطنشة اي معارضة
قانون صكوك .. انتخابات .. غيرها .. و يطلع بدون تشاور مع حد او سماع رأي حد او عرض على الناس الاسلاميين
* ثم تشويه اعلامي و تشويه اعلامي مضاد .. و حرب من هنا على منا هنا سياسية و اعلامية ما تعرفشي ليه و تمجيد للحاكم و تأليهه
* ثم فى الاخر لما ييجي مجموعة من الاسلاميين يتظاهروا عند مقر حزب الوفد مثلا
و يرسموا شوية جرافيتي بيشتم جبهة الانقاذ .. او كام لافتة على سور الحزب
يطلع عليهم شوية بلطجية ليبراليين يضربوهم
و يضربوا اخت مسلمة بالقلم قصاد كاميرات الدنيا كلها
و ماحدش يحاسبه او يقرب منه او نسمع انه اتقدم للمحاكمة
او حتى قيادي يطلع من الجبهة يحس على دمه و يقولك :
احنا بنعتذر
انما يطلع واحد معفن منهم و يقولك : هنحقق و نشوف !!!
فكرك لو كان ده حصل ..
كنتوا يا اسلاميين هتعملوا ايه ؟
سؤال بسيط و اجابته متوقعينها
... جزار بيدبح حصان بسكينة تلمة
.. و انت بتلوم الحصان عشان هبد الجزار ضربة واحدة ؟
و بتقول انك كدة غلطان و حرام يا شباب الثورة ؟
ما حدش بيزرع شوك .. الا و لازم يحصد شوك
و اللي حصل النهاردة شيء مؤسف . و اكيد ما يرضيش حد
لكن أبشركم انه هيتكرر مرات و مرات و مرات
طول ما انتوا ماشيين ورا قياداتكم اللي مجرجراكم وراه فى التكبر و الكذب و موتوا بغيظكم و استقواء القوة و" احنا اكثر منكم مالا و اعز نفر " و مغالبة لا مشاركة .. اتفضلوا
بكل أسف هذا حصاد ما زرعتموه
فذق انك انت العزيز الكريم
و تاني باكررها .. استمروا فى غرور وهمكم
و اقعدوا قولوا فرفرة .. هنحشد تاني و نرد الضربة ..
استمروا استمروا ..
... اذا جاء القدر .. عمى البصر !