هند سعيد صالح تروي تفاصيل افتراس كلب وصفته بالمحظور دوليا لزوج صديقتها

روت المونتيرة هند سعيد صالح، تفاصيل هجوم كلب وصفته بالمحظور دوليا على زوج صديقتها، والأضرار التي لحقت به بعد الحادث، وما وصلت إليه حالته الصحية حاليا.
وأشارت هند إلى أن الكلب مملوك لمذيعة شهيرة تقدم برنامجا للطبخ على إحدى القنوات الفضائية، وأن زوج صديقتها هو محمد محب الماوى، والد طفلين ويعمل مديرا في بنك عالمي.
وأوضحت هند "حظه أنه ساكن تحته المذيعة اللى بتقدم برنامج في الطبخ، واللى عندها كلب بيتبول ضخم العضلات اللي من المحظور استيرادهم دوليا دول، وبالرغم ان هو محب للحيوانات فعلا إلا إن الكلب ده كان دايما يهاجمه فى الطالعة والنازلة وكان بيقول إنه صعبان عليه جدا انه مش واخد عناية كافية فى تحسين السلوك وإنه بيهاجم كل اللي بيشوفه".
وتابعت "يوم الأحد اللي فات قرر محب انه يخبط على بابها عشان يطلب منهم يسيطروا شوية على كلبهم بدل ما هو عمال يهاجمهم كده من ورا السور القصير اللي عادي جدا انه ينط من فوقه، فتحت له الشغالة وقبل ما يفتح بقه بكلمة واحدة خرج الكلب المفترس ده من وراها وهجم على محب في مدخل العمارة اللي كان واقف فيه ابنه وحاول انه يفدي ابنه".
هند أكدت أن الكلب قام بإفتراسه، مضيفة "عض في الذراع والفخذ وأماكن متفرقة من الجسم نتج عنها قطع نافذ في الأوتار والأعصاب، وفجأة المدخل كله بقى دم، طبعا ابنه واقف وشايف ده كله بيحصل لأبوه، بالعناية الإلهية فقط استطاعوا ان يفلتوه من بين أسنانه وتوجهوا به لمستشفى، بعد الفحوصات أكدوا انه هيحتاج لعملية نقل أعصاب من القدم إلى هذا الذراع الذي تم تمزيقه، بعد إجراء الفحص الطبي المطلوب دخل محمد غرفة العمليات وفور اعطاؤه حقنة التخدير توقف القلب لمدة 30 دقيقة تقريباً".
وكشفت عن تفاصيل حالته الصحية: "دخل فى غيبوبة وتم اعطاؤه صدمات للقلب ونقله للرعاية المركزة وتم تأجيل العملية لأجل غير مسمى حتى يعود مرة أخرى للحياة، المحزن انه لم يعد للوعي حتى الآن !مين المسؤول عن الكارثة دي؟ المذيعة اللى مربية وحش في بيتها وسايباه يهاجم الناس؟ ولا المستشفى المحترم اللي حقنته بمخدر أوقف قلبه فى نفس اللحظة؟".
واختتمت طالبة من متابعيها الدعاء له بالشفاء "ادعوله بالشفاء ارجوكم فالدعاء يغير الأقدار وهو الآن بين يدي الرحمن القادر على كل شيء".