"رقصة المناخير وإفيه شهير". .ماذا قالت عزة بهاء عن الزعيم و"الواد سيد الشغال"؟

كشفت الفنانة عزة بهاء، عن كواليس مشاركتها في مسرحية "الواد سيد الشغال" مع الفنان عادل إمام التي اشتهرت من خلاله بإفيه "إنت شديد قوي مع موظفينك يا سيد بيه"، ورقصتها الكوميدية مع "الزعيم"، وذلك أثناء استضافتها في برنامج "كلام الناس" المذاع عبر فضائية "إم بي سي مصر".
قالت عزة بهاء: "الإفيه كان مكتوب في الإسكريبت، لكن رقصة المناخير مكنتش مكتوبة، وعمري ما توقعت إن الإفيه هيعيش لحد دلوقتي، وأي حد جنب الأستاذ عادل إمام بينور، ومامتي الله يرحمها الفنانة رجاء سراج، كانت شغالة في المسرحية دي".
وتابعت: "الدور اللي أنا عملته في (الواد سيد الشغال) مكنش دوري، كان دور حد تاني، وأنا كنت لسه في المعهد، والفنانة اللي كانت هتعمله حصلها ظروف، فرشحوني بما إني كنت بروح مع ماما اتفرج، فاشتغلت الدور، وكان عندي رهبة إني هقف قدام عادل إمام والمتحدين ومسرح".
واستكملت: "لما كنت ببقى في الكواليس كنت بسمع الجمهور بيضحك بصوت قوي جدا، لما يشوفوا عادل إمام معدي من الباب بره، بيضحكوا بس لمجرد إنه عدى، كنت بقول أومال أنا هدخل اعمل إيه؟، وكنت بنسى الكلام وأقعد أفتكره قبل ما أدخل .. بعد أول سنة، كان دايما الأستاذ عادل امام بيطمني، ويقولي (متخفيش وعمل بروفات معايا، لغاية ما اتعودت واشتغلت)".
وأضافت: "في مرة قولت للأستاذ عادل إمام حضرتك أنا همشي بدري النهاردة، أنا مش هحيي، قالي ليه؟، قولت له أصل النهاردة عيد ميلادي وأنا خارجه مع أصحابي.. قالي (عزة) التحية جزء من العمل مينفعش تمشي ومتحييش ولازم تستني للآخر وتحيي، كان فيه تعليم وأسس وطبعا أخرت عيد ميلادي لغاية ما خلصت التحية".
يذكر أن، مسلسل "إلا أنا" عام 2020 آخر الأعمال التي شاركت فيها الفنانة عزة بهاء.