"الدم المصري اترمى على الأرض".. عم طالبة المنصورة باكيًا ويطالب بالقصاص لها

علق محمد أحمد عم طالبة جامعة المنصورة، على واقعة ذبح ابنة أخيه أمام الجامعة، قائلًا: "الدم المصري اترمى على الأرض، دم المصريين كلهم مش دم بنتنا بس"، مضيفًا: "بدعو المصريين كلهم إنهم يجيبوا حق دمهم اللي اترمى على الأرض".
وقال "محمد" في مداخلة هاتفية لبرنامج "حضرة المواطن" على فضائية "الحدث اليوم" مساء الاثنين: "أنا عمها مش أبوها، ولو القاتل تقدم لخطبتها مش هيعرفني أخويا، ولكني سمعت أن القاتل تقدم ورفض 3 مرات"، مضيفًا: "طب أنت اتقدمت واترفضت تقوم تذبحها في شرع مين.. ضميرك مين؟ انت فيك ذرة إنسانية؟ هل أنت بتدبح فرخة؟ ازاي دم المصرية يترمي على الأرض الشعب يتكلم ولا ميتكلمش ويقول عايزين حق البنت دي؟".
وتابع: "لو بنتكلم ونقول إنه بيقلد محمد رمضان دا حتة ممثل ليه الشعب يقلده ويتمادى فيه"، مؤكدًا: "عايزين زي ما اندبحت يندبح الذئب البشري دا في نفس المكان، مش يتشنق في أوضة ضلمة ومنعرفش عنه حاجة أنا ولا غيري لا لكن لما يتدبح في نفس المكان ودمه يسيل على الأرض والجيش والشرطة والشعب يدوسوا على دمه اللي معندوش دم".
وأردف: "عايزينه يندبح في نفس المكان عشان ميتكررش الحادث تاني، لأن الشخص هيروح وهيجي غيره، لكن لما يتعرف أنه اندبح في نفس المكان الشعب المصري يخاف ويترعش"، مؤكدًا: "إحنا في بلد قانون وشرطة وجيش إحنا في دولة بيخاف منها دول تانية وبيتعمل لنا ألف حساب".
ودخل عم طالبة المنصورة في حالة من البكاء، قائلًا: "لسه مستنين تصريح الدفن والإسعاف عشان نطلع ندفنها، والطالبة نيرة بنت أخويا عندها أختين متزوجين، ، ووالدها يعمل مدرس وإنسان محترم ولا يترك فرض وأنا عمها حاجج بيت ربنا ووالدتها كانت تعمل في شركة الغزل والنسيج، وخرجت على المعاش منذ أكثر من 20 عامًا وتفرغت لتربية ابنتها نيرة".
وأكد: "نيرة كانت طالبة في إعلام وكان زمانها جنب حضرتك وتبقى حاجة كويسة وتفرح بيها وهي عروسة جميلة، دي عروسة قمر مش وحشة"، موضحًا: "إحنا مش بندخل في شؤون ولادنا وصحابهم بنربي تربية صح ومش بندخل بينهم وأنا كعمها معرفش صحابها مين ".