أحمد فلوكس يثير جدلا: "هذا الفيلم رسالته مش كويسة"

واصل الفنان أحمد فلوكس هجومه على نقيب المهن التمثيلية الفنان أشرف زكي، ونشر مقطع فيديو عبر صفحته الخاصة بموقع "انستجرام".
وتابع: "الفيديو اللي عملته لأشرف زكي كان بسبب إن في عز ما قنوات قايمة عليا، عشان أنا ضد الباطل، ومع الحق، وضد إن يتعمل حاجة ضد عاداتنا وتقاليدنا، وضد بلدنا وضد المهنة، لقيت الأستاذ النقيب بيكلمني بيقولي يا أحمد تعالي نعمل فيديو، نقول تعالوا ننسى الماضي، ونبتدي صفحة جديدة، كان المفروض يجبلي حقي من إن برامج نازلة باسمي وبتشهر بيا سواء حق أو باطل".
وأضاف: "لما أنت تكلمني تقولي كده، المفروض أنا أطلع أقول شيء غلط، وعكس مبادئي تماما، وأنا أساسا مغلطتش في حد، وده كاني ردي عليه، وردي عليه ليه أساسا، من 4 سنين تعاقدت على فيلم اسمه براءة ريا وسكينة، تقريبا من وأنا متجوز هنا، كان فيه اتفاقات تتعمل، متعملتش، ودخلوا يصوروا يوم ووقفوا، قعدوا سنتين، سنة الكورونا، وسنة بعدها، مكملوش الفيلم مع إن كان فيه أعمال بتتصور عادي يعني".
واستطرد "فلوكس": "الفيلم ده أساسا، فيه أخطاء كتيرة سواء تاريخية، ورسالته مش كويسة، واعتقد إن مؤلفه موجود على جوجل ممكن تدوروا عليه وشوفوا آراءه وكلامه هتفهموه، ولما مضيته كان فيه اتفاق أن هنغير فيه حاجات، لما قعدوا سنتين وأنا خلاص، قولت مش هعمله، بطريقة كده، ما علينا مش عايز اتكلم حصل اتصال ومناوشات، طبعا أنا مش محتاج أقولكم إن مش بس الرسالة بتاعة الفيلم مش مظبوطة، لأ، أنا حتى لما رحت النقابة تم الضغط عليا ودفعت فلوس أنا ما أخدتهاش، لمجرد أنا قولت إني ماضي إني واخدها عشان أنزل من أجري في الفيلم قبلها، وإن الفيلم ده ورقه كله في النقابة اعتذارات كتير من فنانين، ولما حبوا يبعتولي جواب التحقيق مبعتوش تليفونيا بعتولي بجواب، عشان لما مامة ابني تفتح تلاقي النقابة باعتالي جواب تحقيق".
وقال فلوكس "تغاضيت عن الحركة بتاعة انهم يبعتولي عشان عايزينك للتحقيق واحترمت الجميع مع إني مش مجبر ونزلت واحترمتك يا أشرف يا زكي، ومضتني شيكات عشان مكانش معايا فلوس، وإنت عارف إن الممثلين مكانوش بيشتغلوا في الوقت ده، فغريبة يا أخي، تطلع تقول إن الممثلين مبيشتغلوش وشيكات مقفولة باسم النقابة متسطرة تروح تديها لمنتج، عموما أنا بحب أبلغك أنا مش فارقة معايا، عشان أنا مش خدام فلوس، ولا عمري كنت بجري ورا فلوس، ولا بتشتريني الفلوس ولا اللي معاهم الفلوس، الفلوس هتتدفع وبكره المستشار القانوني بتاعي هيروح يدفعها، لكن أنا حقي مش هسيبه".
تدور أحداث الفيلم حول محاولة إثبات براءة ريا وسكينة، استنادًا لوقوعهما فريسة لظروف المجتمع وقسوتها، وذلك من خلال الاستشهاد بالعديد من المراجع التاريخية الموثقة.
فيلم "براءة ريا وسكينة" بطولة وفاء عامر، حورية فرغلي، حسن عبدالفتاح، شريف باهر، أشرف مصيلحي، منة فضالي، أحمد عبدالله محمود، ومن إنتاج حلمي شهاب وحسام شهاب، إخراج عبدالقادر الأطرش، وتأليف محمد عاشور، ومنتج فني محمود عادل.