مدحت إسماعيل ل"مصراوي": نور الشريف اكتشفني وقدمني في هذا العمل

كشف الفنان مدحت تيخا (مدحت إسماعيل)، سرا عن الفنان الكبير الراحل نور الشريف الذي رحل عن عالمنا في 11 أغسطس 2015 .
وقال مدحت، في تصريحات خاصة ل"مصراوي": "اللي اكتشفني في التمثيل هو الأستاذ نور الشريف - الله يرحمه، وكان بيتفرج عليا في المعهد وشافني في مشروع بالمعهد، وأختارني من سيكشن فيه 20 شخصا، وقدمني في (حضرة المتهم أبي)، وكان اسمي على التتر (مدحت إسماعيل)".
وكان الفنان مدحت تيخا (مدحت إسماعيل)، كشف في تصريحات سابقة لمصراوي، سبب تغيير اسمه الفني من "تيخا" ل "إسماعيل"، وهو ما ظهر هذا العام على تتر مسلسلي "بيت الشدة" و"رانيا وسكينة" ويشارك بهما في دراما رمضان 2022.
وقال مدحت: "كان نفسي أغيره من زمان جدا، وأنا بحب تيخا أوي لأنه اسم الدلع بتاعي من صغري، ولكن أنا اسمي الحقيقي (مدحت إسماعيل) ومكتوب في البطاقة وشهادة الميلاد، وقلت آن الأوان السنة دي يبقى اسم أبويا ياخد حقه ويتخلد، وحسيت اني أبعدته من حياتي ومن شغلي وتاريخي اللي بحاول اني أبنيه، لأنه صاحب الفضل إني أكون موجود ورباني وصرف عليا في معهد التمثيل لحد ما اتخرجت ووقفت على رجليا".
وتابع: "أبويا مات وأنا صغير وأنا كنت في تالتة معهد، وجه وقت أنه ياخد حقه، وعارف أن الموضوع اتأخر كتير، وأن الناس في الشارع حابين (تيخا) ومرتبطين بيه في أعمال عمرهم ما هينسوها، زي (شيخ العرب همام)، و(خلف الله) و(يوميات زوجة مفروسة) و(البيه رومانسي)".
واستكمل: "هيعرفوا برضوا مدحت اسماعيل، لأن السنة دي عامل لنفسي كأني ببدأ من أول وجديد".
وأضاف: "(تيخا) اسم الدلع بتاعي من وأنا صغير وأصحابي كانوا بينادوني بيه، واستمر معايا (تيخا) لحد ما عملت مع محمد السبكي فيلم (آخر كلام) عام 2008، وشاف الناس بتقولي يا (تيخا) وكنت في العشرينات وقتها، وحس أن مدحت إسماعيل مش لايق عليا، فقالي هكتبك مدحت تيخا، وبعدها استمر (تيخا) معي حتى هذا العام 2022 ".
يذكر أن مدحت تيخا (إسماعيل) يشارك في دراما رمضان 2022 بمسلسل "بيت الشدة" بطولة وفاء عامر وأحمد وفيق وإيهاب فهمي ومحسن منصور ومها أحمد وأحمد التهامي وإخراج وسام المدني، ومسلسل "رانيا وسكينة" بطولة مي عمر وروبي وإخراج شيرين عادل.