بعد إعلان أشرف زكي مقاضاتها.. أحمد فلوكس يدافع عن دينا حسين ويطلب تبنيها

دافع الفنان أحمد فلوكس، عن المطربة دينا حسين بعد إعلان الفنان أشرف زكي نقيب المهن التمثيلية مقاضاتها، بعد فيديو لها تم تداوله على نطاق واسع ظهرت خلاله وهي تهاجم المنتجين.
وكتب فلوكس، عبر حسابه على إنستجرام: "طيب.. أنا مكنتش حابب أتكلم نهائي عن أي حاجة تخص الشغلانة دي بس ما أقدرش أشوف افترى قصاد عيني وأسكت".
وتابع: "طيب بما إني كنت في المهنة دي20 سنة أنا اللي هارد.. آه المهنة دي وكل ما له علاقة بالفن كده، حتى الراجل لو ما شلش الشنطة وباس الأيادي وطبعا مش محتاج أقولك الباقي، أيوة البنت دي بتتكلم من اللي شافته وفي غيرها كتير حصلهم كده وأعرف ناس منهم اتعقدوا وراحوا اشتغلوا في دهب.. وقلة اللي حالفهم الحظ".
واستكمل: "آه بيحصل أوسخ من كده وأنت عارف وبتعافر بقالك سنين وبتزق مواهب كتير بنفسك وبتشوف بعينك، ومن المواهب دي كنت أنا وأول مسرح وقفت عليه بسببك أو لما عملنا الطيار وحمتني من اللي كانوا عاوزين يفشلوني.. وإيه المشكلة إنها مجهولة.. ما هي عاوزة تنجح، وأي حد يعرفها خلوها تتواصل معايا لو سمحتم".
واستطرد: "استاذنك يا دكتور زي البنت دي ما شافت جزء سواد في بداية حياتها ومقابلتش حضرتك.. اسمحلي إني أجيبها وتتبناها زي ما تبنيت ناس كتير أولهم أنا علشان نظهر للعالم أولا والجزيرة ثانيا إنهم بيصطادوا في المية العكرة ورغم إني مركز في شركاتي فقط، وبعيد عن الفن، لكن لعيونك استأذنك نوريهم مين الفنانين الحقيقيين".
وأضاف: "ده تحدي بيني وبين كل السوق وكل ما له علاقة ووعد مني لو مكنش اللي جاي زمن المحترمين مكنش راجل.. أما د. أشرف فما فعلته لي ولأجيالي كان كثيرا وآن الآوان أن تُحارب لرسم طريق نظيف لأجيال أخرى، فنصيحة ليك طول عمرك بتطلع أجيال ومش بس بتطلع.. أنت كنت صاحب فضل كبير في وجودي سواء لما وقفت قدامك على المسرح أو في الحروب.. لا تيأس وأنا معاك".
وكان الدكتور أشرف زكي نقيب المهن التمثيلية، هاجم دينا في مداخلة هاتفية ببرنامج "كلمة أخيرة"، واتهمها بالإهانة لفنانات مصر ولمهنة الفن، مشددا على اتخاذه كافة الإجراءات القانونية ضدها.