حديث المدينة

هل تتطابق الدراما و الواقع ام ان الدراما فى جانب والواقع فى جانب اخر بعيد ليه بسأل السؤال ده لأنه احفاد جميل البندارى سألوا جدتهم الكاتبة الصحفية اهداف البندارى و قالوا لها بالحرف الواحد هو جده كان كده يا تيته فا قالت لهم ماله يعنى قال كان يعنى يأمروا فنان يكتب خبر فا يروح كاتبه ينصاع لرأيه قالت لهم بالعكس عمره ما كان كده قصدت ان اعرف الواقع الحقيقى لأنه لما الحفيد يسأل معناها انه عايز يعرف الحقيقة عن الجد الذى كان حوارى مع أ/ احمد البندارى اكبر اولاد الراحل جميل البندارى الذى تعلمت شخصيا على يديه كيف اصوغ الخبر الفنى استاذ احمد البندارى هل جميل البندارى هو النموذج اللى حضرتك شوفته فى مسلسل ليلى مراد انا قلبى دليلى
أحمد البندارى : اطلاقا
مفيد فوزى : علاقته كانت ايه بأنور وجدى ؟
أحمد البندارى : علاقته بأنور وجدى ممكن تسميتها بعلاقةحميمة حادة
مفيد فوزى : حميمة بمعنى ايه ؟
أحمد البندارى : بمعنى كان فيه نوع من الصداقة و الود بينهم و حادة لأن اى تعدى لهذه العلاقة الحميمة على الواجبات الصحفية و الالتزامات الصحفية نتيجتها وبال هائل وكان الله يرحمه جميل البندارى لا يقدم شئ على الصحافة اطلاقا يعنى اذا اعترض الصحافة اى حاجة يضحى بالحاجة الاخرى مهما كانت مهمة و قريبة
مفيد فوزى :حسيت بأيه فى شخصية جليل البندارى فى المسلسل ؟
أحمد البندارى : لأ حقيقى مش مجرد شخصية جميل البندارى حسيت انه بحاجة متفقة مع المسلسل انه بناء الشخصيات و هو جزء درامى اكيد لم يراعى بناء الشخصيات و ظبط الشخصيات اذا حبينا يعنى نستخدم تعبير اكثر فنية مع الاشياء ده حتى فى شخصية انور وجدى بيظهر الفنان الراحل انور وجدى كما لو كان بيمثل طول الوقت و ده مش حقيقى
مفيد فوزى : خلينا فى جميل البندارى جميل البندراى انت لما شفته على الشاشة قلت ده لا يمكن يكون ابويا
أحمد البندارى : لا خالص نهائى
مفيد فوزى : بدليل ان احفادك ..
أحمد البندارى : ده انا عايز اقولك حاجة غريبة يعنى ده انا متخيليش ان الممثل ده .. لأنهم دخلوا فى القصة ديه خالص يعنى
مفيد فوزى : تفتكر السبب ايه يعنى برضه عشان خاطر نقرب مما يسمى بتغذية الدراما بعلومات عن الواقع يعنى انا لابد ان اذكر ان انعام محمد على على سبيل المثال فى مسلسل ام كلثوم كانت بارعة الى درجة و انا الفيروزى
أحمد البندارى : طول عمرك
مفيد فوزى : طول عمرى و انت تعلم ذلك
أحمد البندارى : و هى عايشة
مفيد فوزى : و هى عايشة تعاطفت مع ام كلثوم و لما توجعت و عييت فى المسلسل انا تأثرت و انا اعلم ان هذا تمثيل ده يدللك على عمق الشخصيات بخاف انه مثلا شخصية واحد زى بليغ حمدى لو اتعملت مسلسل يطلع بليغ حمدى شخصية لا علاقة للواقع بها هل ينبغى للكاتب الذى يرسم الشخصية ان يعود للأصول و ان يستمد ده من الذين اقتربوا منه او من اولاده حتى
أحمد البندارى : اذا سمحت لى حضرتك انت قلت انعام محمد على و هى ثقل وزن ثقيل جدا فى الدراما المصرية ولا اظن ان واحدة بقيمتها انها تفوتها انها تاخد الابعاد اللى حضرتك بتقولها و غيرها من الابعاد
مفيد فوزى : من اصحابها تمام
أحمد البندارى :اظن ان المذاكرة ديه من اختراع
مفيد فوزى :اتصور ان ديه المذاكرة بتاعةالمخرج و الكاتب ايضا .
أحمد البندارى : اساس شغل الCrew كله
مفيد فوزى : عيب ان انا اذكر الكلام ده من غير ما اذكر اسم محفوظ عبد الرحمن ميجبش ان انا اغفل محفوظ عبد الرحمن ده ربنا يديله الصحة مسلسل اسمهان على سبيل المثال و لكن انا حرصت ربما لأول مرة ان انا اجيب شخصية ظهرت على الشاشة و انا اعرفها شخصيا و هى جليل البندارى هل كانت علاقة بجليل البندارى بالمناسبة ليه كان شتام و كان يطلق عليه اسمحلى اقولك العبارة كان يقال عنه انه
أحمد البندارى : جليل الادب و بندارى عليه
مفيد فوزى : مين اللى قال الكلام ده ؟
أحمد البندارى : هو
مفيد فوزى : هو نفسه ؟
أحمد البندارى : و بعدين راح مطلعها عليه تحية كاريوكا صديقته و حبيبته و عمتى يعنى اعد اتكلم عليها رحمة الله عليهم جميعا تحية يعنى خدت منه البتاعة ديه و قالتها و كان دايما يقولك انا جليل الادب و بندارى عليه
مفيد فوزى : حلوة
أحمد البندارى : كلمة جميلة و هو كان
مفيد فوزى : كان فيه علاقة غريبة كده فيها قسوة الحنون او حنان القسوة اذا صحت العبارة بينه و بين عبد الحليم حافظ
مفيد فوزى : علاقته بعبد الحليم حافظ هو قالها فى كتابه عن عبد الحليم عبد الحليم سماه جسر التنهدات استاذ عبد الحليم جسر التنهدات و سمى الكتاب جسر التنهدات و قال العلاقة باختصار شديد فى مقدمة من سطر و احد قالك انا قابلت عبد الحليم حافظ مرتين فى حياتى مرة كنت انا مليونير و كان عبد الحليم حافظ صعلوك ثم تقابلنا مرة اخرى و كان الحال انقلب و اصبحت انا صعلوقا و هو مليونير و فى الحالتين كنت دايما ابحث عن ورقة من فئة الخمس قروش يعنى كان صعبان عليه طول الوقت
مفيد فوزى : و انت كان عمرك كام سنة لما كان عايش جليل البندارى ؟
أحمد البندارى : ابويا مات عنده 52 سنة و كان ساعتها عمرى
مفيد فوزى : كان عندك .....
أحمد البندارى : مات عنده 52 سنة و انا كان عمرى ساعتها 22 سنة
مفيد فوزى : اذا انت حسيته يعنى و اتعلمت منه بيتهيألى كنتوا لازم بتروحوا الاخبار كتير ؟
أحمد البندارى : طول الوقت مقيم معاه
مفيد فوزى : و شفت النجوم طبعا كلهم ؟
أحمد البندارى : اه يعنى عبد الحليم و فريد الاطرش الموجى و كمال الطويل
مفيد فوزى : الموجى كان بيغير من كمال الطويل
أحمد البندارى : يعنى غيرة فنية يعنى عايز اقول اكاد اقول مشروعة بس غيرة مهولة
مفيد فوزى : عبد الحليم كان بيغير من فريد الاطرش ولا العكس
أحمد البندارى : لا
مفيد فوزى : انت شفت انور وجدى رؤيا العين ؟
أحمد البندارى : اه شفته مرتين بس كنت صغير اول حاجة
مفيد فوزى : كانت علاقتة ايه بجليل البندارى عودة للدراما؟
أحمد البندارى : كانت علاقته حميمة و فيه صداقة و كان دايما جليل البندارى متعاطف مع انور وجدى لشعوره انه انسان بيقات بضراوة عشان يخلص شغله و حياته و استمتاعه قبل ما يموت هو كان عنده الاحساس ده
مفيد فوزى : هو اللى كان عمل الحديث الشهير بتاعه لما فيه انور وجدى قال فى لحظة قبل الرحيل مباشرة كان نفسى اكل سندوتش فول
أحمد البندارى : و حاجة تانية كمان فيه حديث شهير اوى لما قال يا رب ادينى مليون جنيه و سرطان قال كده قبل ما يعيى
مفيد فوزى : انور وجدى قال كده ؟
أحمد البندارى : قال كده و نشره
مفيد فوزى : نشره جليل البندارى ؟
أحمد البندارى :اه طبعا قال يا رب ادينى مليون جنيه و سرطان
مفيد فوزى : سبحان الله
احمد البندارى : فاداله مليون جنيه و اداله سرطان و الغريب انه هو كان حاسس بأن نهايته هتبقى درامية
مفيد فوزى : و لكن لم يكن يأتمر جليل البندارى من اى فنان ؟
أحمد البندارى : لا ولا يقدر و لا ام كلثوم حتى رغم انه هو جليل البندارى كان يعنى ام كلثوم ديه مزاج خاص غير النقد مزاج خاص عنده يعنى ام كلثوم ديه معبد اسمها كده معبد الحب كان دايما يسموها كده و اذا نجحت لها اغنية يديها حقها و اذا فشلت يديها برضه
مفيد فوزى : هل انت صارحت الاحفاد بحقيقة الجد جليل البندارى ؟
أحمد البندارى : لا انا كلمتهم طبعا
مفيد فوزى : و حكيت ؟
احمد البندارى : بغض النظر عن المنظر الغريب اللى شافوه ده بس
مفيد فوزى :انت بتسميه المنظر الغريب ؟
احمد البندارى : اه حضرتك دلوقتى كده اشعرتنى باتهام فى حق الوالد رحمة الله عليه ان انا معملتش اجراء انها معندهاش صورة حتى و لو باحتجاج انما انا فعلا حزين ان الناس ديه مدوش لنفسهم فرصة لمعرفة الاسياد بتتم ازاى من عبد الحليم او ام كلثوم او حتى عبد الوهاب عبد الوهاب برضه انت عارف كان مش سهل يعنىكان برضه ثقل هائل انما الصحافة متقدرش تبقى صحفى و حاجة تانية يا تبقى صحفى يا مش صحفى انما تبقى صحفى و تجامل عشان اشياء اخرى مش هتبقى صحفى
مفيد فوزى : رحم الله جليل البندارى ناقدا و فنانا
أحمد البندارى : الف مرة
فاصل
مفيد فوزى : و هل كان الفنان الراحل متعدد المواهب العبقرى انور وجدى مثلما ظهر فى المسلسل هذا هو السؤال الذى اردت ان اوجهه لأحد اقربه المهمين و هو أ/ منيب الشافعى : رئيس مجلس ادارة غرفة السينما فقد كان والده هو زوج اخت انور وجدى استاذ منيب هل انور وجدى اللى حضرتك شفته فى المسلسل اللى مركب فى رأسه زنبلك هل هو ده انور وجدى
أ/ منيب الشافعى : لا ده شئ مؤسف جدا ان يتناول البعض السير الذاتية لعظام فنانين عظام زى انور وجدى و غيره و بعدين ميكونش عنده المعلومات الكافيه و لا الصورة الصحيحة من المعلومات فيؤدى الدخول فى هذا الباب الى الصورة اللى حضرتك تفضلت و قلتها دلوقتى يعنى شئ مؤسف يعنى انما ندخل فى سير الكبار دول من سير الفنانين يكون عندنا معلومات صحيحة عنهم يعنى انا سمعت بيقواوا انه هو جاب فنانين سوريين و لا ناس سوريين عشان يعمل شركة لا انور وجدى فى ذلك الوقت كان له ثقل كبير جدا و كان زى ما حضرتك تفضلت فنان عبقرى فا اما يجى انا عايز اعمل شركة و اعمل افلام ميت بنك يقوله اهلا و سهلا مش مستنين منه انه هو يبقى انه املاك ولا غيره و لا غنى و لا فقير و لا كلام من ده ابدا له من المكانة الفنية و من الحضور العالمى فى مجال فنه ما يتيح ليه يقول لأى بنك يديله فلوس هيديله
مفيد فوزى : تمام بثقله الفنى
أ/ منيب الشافعى :لأن الناس زى ما حضرتك عارف ان البنوك حكاية ان يبقى عندك املاك عشان تاخد سلفة ولا غيره ديه ظهرت اخير لكن الاول كانت بالكلمة و كان ثقل اللى بيطلب الفلوس ده مين هو
مفيد فوزى : انت حضرتك حسيت ان ده خطأ فنى فى التركيبة الدرامية و بعدين حسيت كمان انه مش ده الطريقة هل كانت الطريقة ديه بيتكلم بيها انور وجدى اطلاقا
أ/ منيب الشافعى : لا مش ممكن
مفيد فوزى : شفته انا شفته و قربت منه كنت صغير يمكن ديه صورة سينمائية فا هنعتمد الشاب اللى هو عمل انور وجدى اللى هو ألاستاذ احمد فلوكس ابن الفنان فاروق فلوكس اعتمد فقط على مجرد الصورة اللى بيطلع فيها فى الافلام
أ/ منيب الشافعى : ربما لكن فى النهاية هو يعنى ادى بالصورة
مفيد فوزى : اجتهد
أ/ منيب الشافعى : نعم اللى هى مش حقيقية و منعتبرش نقول ان فنان عظيم عبقرى زى انور وجدى يبقى بهذه الصورة لكن كان يجب على الناس انها تدخل من مدخل المعلوماتية الصحيحة مش اى اتهمات تتقال
مفيد فوزى : هل حضرتك استاذ منيب و انت قيمة نعتز بيها فى غرفة السينما و لك باع طويل فى غرفة السينما هل تعتقد انه حد لجأ الى اسرة انور وجدى ليستقى معلومات تساعد فى العمل الدرامى ؟
أ/ منيب الشافعى :اطلاقا كثير من المهتمين انهم يتكلموا عن انور وجدى بيتصلوا بينا بيا او بأخواتى اللى هما ولاد المرحومة الهام وجدى اللى تبقى اخت انور وجدى بيتصلوا بينا باستمرار و انا بديهم نمارهم عشان يتصلوا بيهم عشان ياخدوا معلومات و حتى كان التليفزيون قريب كانوا عايزين يكلمونى على اساس اجى اتكلم عقب المهزلة اللى سمعناها و شفناها عن انور وجدى فى الفترة اللى فاتت
مفيد فوزى : اه طيب انت شايف انه يعنى اللى اتعمل بالسير الذاتية للفنانين الافضل الاقتراب من الاسر و من الاقارب و من النقاد و من جمع المعلومات و لا الاعتماد على الافلام فقط ؟
أ/ منيب الشافعى :لا طبعا الاعتماد على الافلام ده موضوع تانى خالص مش ده اللى انا األف منه
مفيد فوزى : اه ديه نقطة مهمة ان انا األف منه
أ/ منيب الشافعى : لاماألفش من انا اتفرج على فيلم و اقول الله ده كانت مش عارف ايه يعنى زى ما سمعت بتقولى سمعت عن ليلى مراد كلام كتير برضه اتقال و بتاع مش حقيقى
مفيد فوزى : حتى انت كنت قريب منها
أ/ منيب الشافعى : كانت بتيجى فى البيت عند والدى كانت صحيح كان فيه نوع من الشقاق شقاق زوجين
مفيد فوزى : خلاف عادى ؟
أ/ منيب الشافعى : عادى جدا شقاق زوجين مش هو بياخد فلوسها و مبيدهاش فلوس و بتاع زى اللى سمعناه ده
مفيد فوزى : ده تركبية درامية فقط لكن ديه تخاصم الحقيقة
أ/ منيب الشافعى : طبعا مكنش كده هو ابدا كان سعيد اوى انها بتعلى بتعلى فنيا و سعيد اوى انه هو يستعين بيها و سعيد جدا انها تشتغل حتى مش معاه
مفيد فوزى : هل كانت ..؟
أ/ منيب الشافعى : و الله هو ده برضه من اسباب الخلافات اللى كانت اللى هى عائلية
مفيد فوزى : هل كان كثير النزوات ؟
أ/ منيب الشافعى : لا مش اوى كده لكن تقدر تقول انه كا بنى ادم له ميوله
مفيد فوزى :اخطائه
أ/ منيب الشافعى : له ميوله و اخطائه
مفيد فوزى : انت رأيك ان الشخصية اللى ادت شخصية ليلى مراد قريبة منها
أ/ منيب الشافعى : لا اطلاقا ده هى مش قريبة لشخصية ليلى مراد ابدا ليلى مراد كانت ليها شخصية عظيمة
مفيد فوزى : هل صابرين فى تمثيلية ام كلثوم كانت قريبة الى شخصية ام كلثوم؟
أ/ منيب الشافعى : اكثر قربا من الشخصية اللى مثلت ليلى مراد
مفيد فوزى : تمام تمام هل احمد زكى حين ادى شخصية طه حسين هل كان بارعا؟
أ/ منيب الشافعى : هو احمد زكى كفنان هو عنده براعة ايضا انه هو يمثل او يتقمص الشخصية اللى هى احنا كلنا نتمنى ان احنا نشوفها فا فنه و عبقريته ادت الى انه يبقى قريب جدا من الحقيقة
مفيد فوزى : بالمرة هل منى زكى استطاعت ان تؤدى شخصية سعاد حسنى على الشاشة فى المسلسل ؟
أ/ منيب الشافعى : هى برضه هى منى ليها حضور جماهيرى و حضور فنى لكن برضه فى النهاية مش ديه الصورة اللى كانت عليها سعاد حسنى فى الفترة ديه
مفيد فوزى : و انت عشت كل هؤلاء ؟
أ/ منيب الشافعى : لا لا طبعا
مفيد فوزى : انت تعرفهم كلهم بالكامل ؟
أ/ منيب الشافعى : و اشتغلت معاهم لكن عموما بالنسبة لمنى زكى متقدرش تقول انها بعيدة اوى لا هى فيها لان هى فنانة كويسة
مفيد فوزى :هل يعتمدعلى الشكل ولا كان ينقصها ان تعتمد على روح سعاد حسنى؟
أ/ منيب الشافعى : هى فقط نقطة الروح ديه لكن من ناحية الشكل الى حد ما هى كانت بتحاول
مفيد فوزى : صغيرة وفى هذا الحجم ؟
أ/ منيب الشافعى :بالظبط
مفيد فوزى : اللى قدم شخصية انور وجدى استفزك ؟
أ/ منيب الشافعى :انا المعلومات انا مشوفتهاش كلها المعلومات اللى جتلى او اللى عرفتها من الناس الناس كلها بتنتقد و مستفزة من هذه الصورة لان مش ده انور وجدى يعنى النهاردة كان معايا أ/ فاروق صبرى يمكن حضرتك تعرفه
مفيد فوزى :امال منتج يعنى مرموق ؟
أ/ منيب الشافعى : اه طبعا و من الناس اللى عاشت انور وجدى اتكلم معايا فى النقطة ديه قالى يعنى انت هتشوف أستاذ مفيد انت لازم تشرح مين هو انور وجدى و حضرتك يعنى تفضلت و قلت الل ى انت
مفيد فوزى : هل لجأوا لواحد زى فاروق صبرى مثلا و لا فى عالم الدراما ؟
أ/ منيب الشافعى : اه او مثلا كاتب و سنه و عاشه و يعرفه و اتعامل معاه كان يجب انه هو كمؤلف المؤلف اللى هو الف المكان ده انا معرفهوش يعنى لكن كان يستعين بواحد زى فاروق صبرى اهوه مؤلف زيه و يقدر ياخد منه معلومات
مفيد فوزى :استاذ منيب هل الدراما اصبحت الايام ديه دراما تيك اواى ؟
أ/ منيب الشافعى : للأسف اه
فاصل
مفيد فوزى : اسمها وردة و فيما بعد ريرى تكتوى بنار انفاس المخدرات فى الباطنية هى ايضا صفية زوجة سرا و تكتوى بنار الحب بين ضلوعها فى قانون المراغى وردة و صفية شخصية واحدة هى النجمة غادة عبد الرازق فى حديث المدينة
فاصل
مفيد فوزى : حبيت اعمل سياحة فى العقل و القلب لغادة عبد الرازق موافقة ؟
غادة عبد الرازق : موافقة
مفيد فوزى :افرضى جدلا ان غادة عبد الباقى ..؟
غادة عبد الرازق : غادة عبد الباقى لا معرفهاش
مفيد فوزى : و لا انا
غادة عبد الرازق : انا اصلا قلقانة جدا
مفيد فوزى : لا لا متقلقيش ريرى بتاعت الباطنية بتترعش
غادة عبد الرازق : لا ده تمثيل فى الحقيقة مبيحصلش الكلام ده خالص
مفيد فوزى : فرضى غادة عبد الباقى ديه عالمة ورا معمل ابحاث و هى اعدة تشوفنا وقالت ايه بزمتكوا لاقاربها مش انا كنت احق بالمساحة ديه من تليفزيون مصر اللى انتى بتحبيه من غادة عبد الرازق يعنى انا كعالمة ماليش نصيب ايه رأيك لو الرأى ده سمعتيه
غادة عبد الرازق : اكيد ليها حق طبعا لان كل فى مجاله بيحس انه هو عمل انجاز مهم جدا و انه محتاج انه يتقدر و انه محتاج انه هو يوصل للناس انه هو قام بمجهود جامد اوى
مفيد فوزى : تفتكرى لو العلماء واخدين حقهم على الشاشة بتشوفيهم كتير زى ما بتشوفى غادة عبد الرازق و غادة عادل و فاروق الفيشاوى ؟
غادة عبد الرازق : لا مش واخدين حقهم طبعا
مفيد فوزى : ليه تفتكرى ؟
غادة عبد الرازق : لان شوية احنا بنقول ان الشعب المصرى
مفيد فوزى : قولى افتحى قلبك افتحى قلبك يا وردة
غادة عبد الرازق : من عنيا حاضر يمكن احنا معندناش الثقافة اوى اللى تخلى الناس مهتمة
مفيد فوزى : تتابع بغادة عبد الباقى تطلع غادة عبد الباقى و ده طبعا اسم مفترض لو طلعت غادة عبد الباقى زى ما قالت غادة عبد الرازق محدش هيهتم انما لو طلعت غادة عبد الرازق
غادة عبد الرازق : لا بس فيه والله ناس احنا مهتمين يعنى مثلا زى الدكتور احمد زويل زى حواس فى مجال الاثار يعنى فيه اسماء طبعا معروفة جامدة جدا
مفيد فوزى : يعنى لما بتشوفى عالم نجم تهتمى صح؟
غادة عبد الرازق : اكيد طبعا اكيد بس والله بتحصل للفنانين يعنى دايما تلاقى برضه اللى هما بيتهافتوا اوى عيه النجم لكن انصاف النجوم او الدور التانى او الدور التالت برضه للاسف برضه مبياخدوش حقهم اوى عند الناس هو الشعب هنا او الجمهور المصرى بيحب دايما الحاجةة الى بتبقى عليها Spot زيادة عن اللزوم الحاجة اللى بتبرق اوى
مفيد فوزى : انتى حاطة spot على كتفك على ايدك على دراعك الكاميرا ممكن تجيبه ده ايه ده يا غادة ؟
غادة عبد الرازق :ديه كلمة اسمها الايمان
مفيد فوزى : الايمان ايه الكلمة ديه ؟
غادة عبد الرازق :Fate
مفيد فوزى : Fate اه امال Believe ايه ما ال Believe معناها الايمان ؟
غادة عبد الرازق : هى بتتقال بكذا معنى بس هى لا هى الايمان
مفيد فوزى :قولى لى يا غادة هل حقيقى انه اى فنانة بتبدأ حياتها باستمرار بالزواج من ثرى عربى غير مصرى ثم يحدث طلاق هل لان اجندتها الداخلية بتقول لها سبتى اقدامك استقرى ماديا ثم انطلقى انا اعرف تلاتة اربعة حضرتك منهم
غادة عبد الرازق : لا يا استاذ مفيد انا مش منهم خالص
مفيد فوزى : ليه ؟
غادة عبد الرازق : لأن ديه مش حقيقة خالص بص انا صادقة جدا فى كل حاجة بقولها و يمكن الحاجة اللى بتميزنى انى انا دايما بحاول اقرب من الناس بالحقيقية لأن انا دايما انا فى حياتى الشخصية بكره الكذب و بكره الخيانة و بكره اللوع يعنى بحس دايما ان الحياة مش مستحملة ان احنا نعد نضحك على بعض
مفيد فوزى : اول زواج ليكى كان كام سنة؟
غادة عبد الرازق : كان عندى 17 سنة
مفيد فوزى : كام ؟
غادة عبد الرازق : 17 سنة اه اه
مفيد فوزى : زواج مبكر اوى ؟
غادة عبد الرازق : اه ده حقيقة
مفيد فوزى : هل حضرتك كنتى واعية معنى الزواج ؟
غادة عبد الرازق : واعية لأن انا عشت فى بيت لو حضرتك طبعا ديه حقائق مينفعش الواحد طبعا يتلاعب بيها انا بابايا كان وكيل مجلس الدولة قبل ما يتوفى بشهرين كان هيبقى وزير الاستثمار لك ان تتخيل بيت زى ده احنا ممكن نكون متربيين فيه ازاى مع اب بيخاف على اولاده جدا مفيش حاجة اسمها نرد على تليفون مفيش حاجة اسمها صحاب مففيش حاجة اسمها نادى عندنا ولد واحد بس الولد ده فقط لا غير مسموح له انه يعمل اى حاجة لكن احنا مش مسموح لنا نعمل اى حاجة هو توفى و انا عندى 12 سنة خليل اخويا بالتالى اتوفى بعدها باربع سنين كان عندى 16 17 سنة كنت عايشة انا و ماما و يسرية اختى كانت فى كلية تجارة و انا كنت ثانوية عامة يسرية اكبر منى بسبع سنين اللى اتجوزته ده لا مطرب مصر عشان بس اصحح لحضرتك المعلومة
مفيد فوزى : هو سعودى ؟
غادة عبد الرازق : هو سعودى لكن طول عمره متربى فى مصر عايش فى مصر مع اخته الكبيرة
مفيد فوزى : غنى ؟
غادة عبد الرازق : ايه
مفيد فوزى : غنى؟
غادة عبد الرازق : اه من اكبر عيلة فى السعودية
مفيد فوزى : طيب ليه مكملتيش و انتى خلفتى روتانة ؟
غادة عبد الرازق : عشان انا مكنتش مبمشيش بمبدأ اللى هو عشان ولادك كملى الحياة علشان خاطر البيت ميتخربش كملى مش شخصيتى لأن انا واخدة شخصية ابويا الله يرحمه مامتى كانت كده زى اى ست محجبة عندها ولاد و بيت و بتاع اللى هو انا استحمل جوزى عشان خاطر ولادىو عشان و عشان و عشان
مفيد فوزى : انتى مستحملتيش ليه ؟
غادة عبد الرازق : لأن انا تجوزت بدرى جدا انا كنت عايزة ابقى اتخطبله
مفيد فوزى : صغر سنك هو السبب
غادة عبد الرازق : بالظبط انا اتخطبت له لانى كنت عايزة اخرج كنت عايزه حد يخرجنى من الحبس اللى انا كنت فيه فى البيت
مفيد فوزى : يوديكى مشاوير يفسحك ؟
غادة عبد الرازق : يفسحنى نفسى اشوف ديسكو تك نفسى اروح نادى نفسى اسافر نفسى البس زى اصحابى
مفيد فوزى :امتى استشعرتى انه لا بد من الانفصال ؟
غادة عبد الرازق : بعد اربع سنين لأنى فجأة حسيت ان احنا اخوات
مفيد فوزى : الاشاعات سلبا او ايجابا تلمع الفنان ؟
غادة عبد الرازق : لا طبعا
مفيد فوزى : بتعمل ايه طيب ؟
غادة عبد الرازق : ايجابا بتلمعه جدا سلبا كتير ورا بعضه لا تبوظه طبعا العيار اللى ميصبش يدوش
مفيد فوزى : طبعا
غادة عبد الرازق : و احنا شعب عاطفى جدا على طول بنتعامل مع كل الامور بقلبنا قبل عقلنا
مفيد فوزى : انتى كده؟
غادة عبد الرازق : اه طبعا للاسف
مفيد فوزى : مية المية مقتلك قلبك
غادة عبد الرازق : اه طول عمرى مبعرفش اغير نفسى
مفيد فوزى : قراراتك عاطفية ليست فى حراسة عقل
غادة عبد الرازق : متسرعة جدا اه يعنى مبقتش ارتاح لأى حد مبقتش اصدق اى حد مبقتش
مفيد فوزى : فقدتى الثقة فى الرجالة ؟
غادة عبد الرازق : ده حقيقة
مفيد فوزى : كذابين ؟
غادة عبد الرازق :اوى
مفيد فوزى : ملاوعين ؟
غادة عبد الرازق : جدا و انا عمالة اقول كل الكلام ده و كل ال Cast حواليا رجالة تخيل ده
مفيد فوزى : خاينين لا ميهمكيش ؟
غادة عبد الرازق :بطبعهم خاينين دايما انت لما تيجى تقول لا كل الرجالة خاينين لا مش كله فيه واحد لازم يكسر القاعدة على اساس مثلا هو اللى اعد قدامى جه هو اللى مبعوت من السما عشان يكسر القاعدة
مفيد فوزى : هو انتى يا غادة برقتك و بذكاءك و بجمالك و بفنك و باستيعابك كل ده ملوش رصيد عند راجل ؟
غادة عبد الرازق : كل ده
مفيد فوزى : اه ما هى مؤهلاتك كامرأة ؟
غادة عبد الرازق : مؤهلاتى انا من كتر ما وقعت فى مطبات ساعات
مفيد فوزى : خلينا بالجملة و نقر
غادة عبد الرازق : و نقر اه ده حقيقة ثقتى ساعات كانت بتتهز بنفسى
مفيد فوزى : دراستك الحاسب الالى افادتك فى ايه ؟
غادة عبد الرازق : حساباتى بقى الشخصية
مفيد فوزى : لكن انتى فى حياتك بتحسبيها صح ؟
غادة عبد الرازق : و لا مرة و لو كنت حسبتها مرة واحدة صح مكنش بقى ده حالى
مفيد فوزى : عشتى القهر كامرأة ؟
غادة عبد الرازق : طبعا
مفيد فوزى : عرفتى عذاب امرأة زوجة عرفى ؟
غادة عبد الرازق : اه
مفيد فوزى : بتقولى اه بصوت واطى كده ليه ؟
غادة عبد الرازق :اه لا عرفته
مفيد فوزى : انا بسمعك اهوه
غادة عبد الرازق : اصل انا ارتبطت مرة عرفى و بعد كده بقى جواز رسمى بس فى الاول كان عرفى
مفيد فوزى : ليه ؟
غادة عبد الرازق : هقولك ليه
مفيد فوزى : على فكرة انتى بتعبرى بالضحك عن حيرتك و ربما بتعبرى بالضحك
غادة عبد الرازق : عن خيبتى
مفيد فوزى : لا مش خايبة انتى خايبة انتى حاسة انك خايبة
غادة عبد الرازق : ساعات بحس
مفيد فوزى : اتفضلى
غادة عبد الرازق : كان فى الاول حد مرتبط
مفيد فوزى : زوج
غادة عبد الرازق : اه و انا من النوع اللى بتألك اوى لما تحصل حاجة زى كده فا قلت اخلينى فى المكان بحيث مبقاش بوظت بيت حد
مفيد فوزى : حياته اه ده واضح انك كنتى بتحبيه اوى بدليل انك انتى خايفة ان حياته تهتز فى بيته فقبلتى الزواج عرفيا اعدتى اد ايه ؟
غادة عبد الرازق :على فكرة هو عشان مبقاش بس اتفهم غلط هو كان وليد
مفيد فوزى : وليد التابعى ألاستاذ وليد التابعى المنتج المعروف قولى لى يا غادة ليه الممثلة تشاور على منتج ليه المغنية تشاور على موزع او ملحن ؟
غادة عبد الرازق : عمرى ما شاورت عليه وليد ده انا اعرفه من 13 سنة
مفيد فوزى : ايوة لكن تعرفى انه هو بيشتغل فى السينما؟
غادة عبد الرازق : قبل ما يشتغل فى السينما احنا اصحاب من 13 سنة اصحاب كلنا شلة واحدة مع بعضنا و ده اللى الناس متعرفهوش و اصحابه شلتنا كنا بنروح مع بعض و نسافر مع بعض يعنى كنا اصحاب اصدقاء فقط لا غير لحد من 8 سنين مرة وليد بيهرج معايا كده بيقول لى يعنى غادة عايزين نشتغل مع بعض مش معقولة انا فى الانتاج كل ده و انتى ممثلة منشتغلش مع بعض يعنى قلت له اوك يا وليد ابتدينا نعد على السيناريو يوميا ابتدى كل واحد فينا يتكلم فى مشاكله الشخصية فجأة الصداقة اتقلبت لشكل تانى خالص
مفيد فوزى : الحب و بعدين اتجوزتوا بعض عرفى و بعدين طلق السيدة حرمه
غادة عبد الرازق : لا هى اللى قالت انا عايزة انفصل
مفيد فوزى : و فى الحالة ديه هو اعلن الزواج منك ؟
غادة عبد الرازق : لا لا اعلنا قبلها
مفيد فوزى : من عرفى الى علنى ؟
غادة عبد الرازق : اه
مفيد فوزى : كنتى حاسة بقهر و انتى زوجة فى السر
غادة عبد الرازق : اه
مفيد فوزى : بتقولى اه كده قولى وضحى ؟
غادة عبد الرازق : اه طبعا اكيد الواحد فى الاول بيقول اه و بتاع و مقبلش و مش عارفة ايه و يضايق و يبقى حاسس ان الحاجة اللى فى ايديه مش موجودة فى ايدين حد تانى بس اه طبعا لو انت بتحب حد جدا بتبقى م ضايق طبعا
مفيد فوزى : انتى بتحبى الصراعات الحاجات اللى زى التاتوه ده انا ملاحظ على صباعك حرف L مش كده
غادة عبد الرازق : 7
مفيد فوزى : 7اه يا ريت الكاميرا تجيبها ايه 7 ديه ؟
غادة عبد الرازق :My luck no.
مفيد فوزى : بتحبى الايام السبعة بتحيبى نمرة سبعة شقة 7 يغنى كل ما هو سبعة حياتك بتتغير كل 7 سنين ؟
مفيد فوزى : كل 7 ايام
مفيد فوزى : عايز اسأل غادة عبد الرازق انها تشاور لى على فنانة فى مصر مش عاملة اى عمليات تجميل قولى فلانة ؟
غادة عبد الرازق : معرفش
مفيد فوزى : معرفش ديه معناها انه كلهن دخلن عيادات التجميل ؟
غادة عبد الرازق : لا معرفش لا مقدرش لان فيه ناس متغيرتش تماما بس معرفش فيه حاجات بتبقى ساعات مخفية محدش يعرف ان هى
مفيد فوزى : مفيش ممثلة كده ربانى كده مفيش؟
غادة عبد الرازق : ممكن متهيألى منى زكى منه شلبى اه لا اكيد فيه ناس تانية
مفيد فوزى :البنت الجميلة اللى موهوبة ديه دينا سمير غانم ؟
غادة عبد الرازق : و دنيا
مفيد فوزى : دنيا و لا دينا ؟
غادة عبد الرازق : دنيا اه
مفيد فوزى : اعتقد كده برضه مش كده انما الباقى كده دخل عمليات؟
غادة عبد الرازق : الله اعلم لا معرفش الله اعلم
مفيد فوزى : بنتى حنان حنان مفيد فوزى يعنى ليها كتاب اسمه ابراج النجوم يعنى دراسة اسمها نجمك فى السما و فهمت انك انتى برج السرطان ده برجك امسى البرج ده اللى هو برج السرطان عاوزك تقولى لى نعم او لا على حسب هذه الصفات
غادة عبد الرازق : اوك
مفيد فوزى : كائن حساس ؟
غادة عبد الرازق : اوى
مفيد فوزى : مفتقد للامان ؟
غادة عبد الرازق : ازمتى
مفيد فوزى : دائم الحذر ؟
غادة عبد الرازق : اه
مفيد فوزى : متقلب احيانا ؟
غادة عبد الرازق : يووه على طول
مفيد فوزى : ينزلق الى الاكتئاب ؟
غادة عبد الرازق : على طول
مفيد فوزى : ميال للانقضاض لا عنفا انما دفاعا عن النفس ؟
غادة عبد الرازق : اه
مفيد فوزى : ينسحب اذا انجرح ؟
غادة عبد الرازق : اه
مفيد فوزى : ذاكرة قوية ؟
غادة عبد الرازق : اه
مفيد فوزى : يتجاهل الشعرة بين الاعتزاز بالذات و الغرور ؟
غادة عبد الرازق : اه
مفيد فوزى : افضل من يستشار ؟
غادة عبد الرازق : اه
مفيد فوزى : لا ده منطبق على كل حاجة فيكى ؟
غادة عبد الرازق : اه ده حقيقة
مفيد فوزى : بيشكيلى الحقيقة زوج فنانة مش هقول اسمها طبعا انما هو راجل فى الحياة العامة يعنى كان يعنى بيقولى يا استاذ مفيد عايز اقولك حاجة سر قلت له قول قالى لا انا عايز اخد وجهة نظرك يعنى هى يا اخى زوجتى الفنانة معلش انا اسف انا هحكيهاله يعنى انا بقول للكاميرا يعنى زوجتى الفنانة عندها اتقان شديد جدا للمشاهد العاطفية يعنى تطلع على الشاشة مبهرة فى اللحظات العاطفية انها مثلا لما تقول انا بحبك او انا زعلانة منك او انا مقموصة منك تقولها بطريقة تخلى الراجل يصالحها فى ثانية اسلوب انتىى عارفة طبعا اسلوب الستات قالى انا مش قادر افرق بين الاداء العاطفى الطبيعى و الاداء التمثيلى فى الاداء و هى فى كلا الحالتين شديدة الدقة و الحنكة ايه رأيك قلت له بقى انت متقدرش تفرق قالى مقدرش قلتله الله حتى النبرة يا اخى قالى بقول لم يا استاذ مفيد انها ماهرة و باهرة فى الاداء العاطفى و فى الحياة التعليق
غادة عبد الرازق :ديه ممثلة متمكنة جدا ديه اكيد حد عايز يكشفها يعنى ؟
مفيد فوزى : عايز يعرف ما هو معذب يعنى مش سعيد تفتكرى ده سعيد مش سعيد ابدا
غادة عبد الرازق :مش سعيد كبعا لانه على طول فى شك و اوحش حاجة اللى تخلى البنى ادم يمرض
مفيد فوزى : الشك ؟
غادة عبد الرازق : اه
مفيد فوزى : على فكرة كنت عايز اخد وجهة نظرك فى كلام احسان عبد القدوس المصيبة اهون من الشك ؟
غادة عبد الرازق : ده حقيقة يعنى المصيبة لما بتحصل خلاص هى بتحصل ادامك دلوقتى ردود افعالك كلها بخلفيتها و مقدماتها حصلت الواحد بيرضى بقضاء ربنا لكن الشك ده بتفضل عايش بيه كل لحظة و كل نفس من ساعة ما بتصحى الصبح لحد ما بتنام و ممكن و انت نايم بليل كمان
مفيد فوزى : دقتى طعم الشك ؟
غادة عبد الرازق : اه طبعا اصلا برج السرطان شكاك
مفيد فوزى : ايه المكتوب هنا على دراعك اليمين ؟
غادة عبد الرازق : العزيمة
مفيد فوزى : العزيمة دى فاطمة رشدى فى فيلم شهير زمان فاطمة رشدى حسين صدقى لكن انتى كاتباه عارفاه طبعا لكن انتى كاتباه ليه على دراعك ما تخلينا نشوف مين اللى بس ده ايه مؤلم يا غادة ليه العزيمة
غادة عبد الرازق : عشان هما الحاجتين اللى عايشة بيهم ؟
مفيد فوزى : ايه و ايه ؟
غادة عبد الرازق : العزيمة و الايمان فقط لا غير و ربنا طبعا احسن من كل ده قبلهم كلهم يعنى
مفيد فوزى : انتى كنت ممثلة افرضى جدلا ان ربنا وقعك فى حب ممثل و ممثل يعنى ماهر فى الاداء العاطفى
غادة عبد الرازق : و احنا الاتنين نمثل على بعض فى البيت
مفيد فوزى : اه ده السؤال اللى كنت عايز اسأله لك ؟
غادة عبد الرازق : اه طبعا ممكن جدا
مفيد فوزى : يبقى معذب ؟
غادة عبد الرازق : اه طبعا لان انا حبقى شكاكة لان انا بطبعى شكاكة هبقى 24 ساعة شاكة فى سلوكياته ان كل ده كذب و كل ده تمثيل عليا
مفيد فوزى : انتى معذبة جدا ؟
غادة عبد الرازق : انا خالص جدا يعنى
مفيد فوزى : فى فيلم الاجندة الحمرا ؟
غادة عبد الرازق : لا و النبى انا عايزة امحيه من حياتى
مفيد فوزى : امحيه بس طلعتى فيه زوجة متزوجة زواج عرفى فى حي ميسرة طلعتى فى دور شاذة جنسيا فى كلمنى شكرا المنحلة داخل المنحلة اخلاقيا
غادة عبد الرازق : اخلاقيا لا انت بوظتنى كده خالص
مفيد فوزى : لا لا لاعايزة اسأل غادة سؤال شديد التهذيب هل ده يعنى مهارة ادوار صعبة و لا هو فى نهاية الامر تجارب داخلية مختزنة يستدعيها مخرج محترف ؟
غادة عبد الرازق :اولا طبعا مخرج محترف
مفيد فوزى : يعنى انتى التجارب ديه جواكى ؟
غادة عبد الرازق : لا هاخد جزئية واحدة من ده هو مخرج محترف لانه بيشوف فى غادة جوانب كتيرة جدا كل مرة بيحطها فى شكل تانى فا ده لازم يكون مخرج محترف ميخافش مبيجازفش بيا الحاجات ديه جوايا المخزون ده هقولك حاجة الفنان عبارة عن شخصيات كتيرة جدا كل الشخصيات اللى فى الحياة اللى من ساعة ما يتولد لحد ما يموت بيقع فيهم يعنى طول ما انا ماشية بقع فى حضرتك و محمد و حسين و منى و كل واحد باخد منه حاجة و كل شخصية باخد حتة من حياتها
مفيد فوزى : طب ليه خالد يوسف اختارك ايضا اشجان ؟
غادة عبد الرازق : عشان انا فيا حتة بنت البلد اوى و هى البنت مش بروستيتيوت هى اد ما هى بنت بلد اوى و جدعة اوى و
مفيد فوزى : منحلة اوى من اجل العيش ؟
غادة عبد الرازق : من اجل العيش هو اصلا انا عملت الدور ده قبل كده كان فى العشق و الهوى عملته الحمد لله رب العالمين باتقان شوية جدا و هو شاف فيا الملامح ديه و بمعنى اصح حس ان انا ملائمة للدور ده
مفيد فوزى : هل المرأة هى الطهر و الفجر فى ان واحد ؟
غادة عبد الرازق : بص هما الجوانب الاتنين بيكونوا موجودين
مفيد فوزى : ما هو انا بقول الحياة ثنائيات
غادة عبد الرازق : انهى اكبر من انهى ده بيتوقف على عوامل كتير جدا
مفيد فوزى : ايه هى ؟
غادة عبد الرازق : عوامل بيئية
مفيد فوزى : انا بسمعك اهوه اوى قلنا المرأة هى الظهر و الفجر فى ان واحدمين فيهم اللى اكتر علوا او اكتر وضوحا يتوقف على عوامل قلتى نمرة واحد عوامل بيئية
غادة عبد الرازق : اه طبعا الظروف اللى هى بتنشأ فيها بالذات الام
مفيد فوزى : اما انها تعلى الفجر ؟
غادة عبد الرازق : يا انا تعلى الظهر
مفيد فوزى : اذن البنت صناعة بيتها ؟
غادة عبد الرازق : طبعا
مفيد فوزى : هل هى صناعة المجتمع ؟
غادة عبد الرازق : لا اولا بيتها
مفيد فوزى : هل هى صناعة الظروف ؟
غادة عبد الرازق : لا
مفيد فوزى : هل هى صناعة الاصدقاء ؟
غادة عبد الرازق : لا
مفيد فوزى : الراجل يحتل فى حياتك المكانة نمرة كام ؟
غادة عبد الرازق : 3
مفيد فوزى :الاولى؟
غادة عبد الرازق : بنتى
مفيد فوزى : و التانية
غادة عبد الرازق : اهلى
مفيد فوزى : كفاية مش عايزة اسألك اكتر من كده شكرا