شيرين عبد الوهاب: حلقت شعري عقابًا لنفسى لأنى غلطت فى اسمى ومكانتى

قالت الفنانة شيرين عبدالوهاب، إنها شخصية حساسة، وخلال الفترة الماضية كانت تسعلى لمعاقبة نفسها بحلق شعر رأسها.
وفي مداخلة مسجلة مع الإعلامى عمرو أديب ببرنامج "الحكاية"، عبر فضائية "إم بي سي مصر"، قالت الفنانة شيرين: "الحمد لله أنا حلوة، أنا كويسة، بس كلام الدكتور اللى كان معاك أول امبارح كلام محترم، بس ما فيش مرض نفسى لكن فيه عدم اتزان، أنا نزلت شغلى علشان بناتى شافونى كده".
وأضافت شيرين: لم يكن أمامى غير كده، أنا حاسة أن دماغى بتفرز أفكار طول الوقت ولو سبت دماغى هتاكلنى، وأنا عملت كده لأنى ما كنتش حلوة فى عينيه، عملت كده علشان هو ما يشوفنيش حلوة، والفرق بين حلاقة الشعر والطلاق يوم واحد، حلقت شعرى قبل يوم واحد من الطلاق ودى مش أول مرة أقص شعرى، فاكر لما قولت إنى طالعة علشان أضحك الناس وقالوا عليا إنى كنت بتريق على البلد، كنت مدبوحة ودبحونى أكتر وقتها.
وأكدت قائلة أنا أقصر فى حق نفسى لكن لا أوذى أحد، ودى وراثة عن والدى، هو أصوله تركية وهما بيمتازوا بالقوة والجسم العريض والشعر الكثيف الأسود، ولما كان يزعل كان يشيل شعره كله، وأنا ورثتها عن أبويا، أنا غير أخواتى وأنا اللى حلقته بنفسى وبعدين جبت حد يخليه طول واحد.