استقرار أسعار الخضار والفاكهة وارتفاع اللحوم والأسماك في أسواق البحيرة - صور

شهدت أسواق محافظة البحيرة، اليوم الاثنين، ارتفاعًا في أسعار اللحوم والدواجن والأسماك، في الوقت الذي استقرت فيه أسعار الخضروات والفاكهة حول معدلاتها الطبيعية.
وبلغت متوسطات الزيادات 6 جنيهات لكيلو الدجاج الأبيض، و10 جنيهات لكيلو اللحم البقري، و7 جنيهات لكيلو السمك البلطي، مقارنة بأسعار ما قبل أزمة كورونا.
وأرجع بعض التجار أسباب ارتفاع الأسعار إلى "طمع الموردين ومحاولة استغلال الأوضاع تحقيق أكبر قدر من المكاسب"، فيما أرجعها آخرون إلى نقص المعروض نتيجة توقف أسواق الماشية ونقص إنتاج مزارع الدواجن والأسماك.
يقول محمد صابر – تاجر أسماك: "التجار الكبار معندهومش رحمة وعاوزين يكسبوا بأي شكل ويستغلوا الأزمة، مفيش بيع ولا شراء وحالنا واقف، كيلو البلطي بتاع الغلابة وصل ل40 جنيه".
أما محمد شعبان - جزار فيقول: "أسواق الماشية كلها واقفة ونحتار على ما نجيب ذبيحة، ربنا يستر والأسعار ماتزيدش عن كده".
ويقول إبراهيم السعدني - تاجر دواجن "سعر الكيلو الأبيض امبارح وصل ل32 جنيه، بس النهاردة نزل شوية بقى 30، إحنا مش مبسوطين بالسعر العالي، كل السعر ما بينزل كل ما بنبيع أكثر والدنيا بتمشي".
ويقول أنور رجب: "أسعار اللحوم كانت تراجعت بدرجة كبيرة ووصلت لأقل من 100 جنيه للكيلو، لكن للأسف فيروس كورونا ضيع كل حاجة ورجعت اللحوم زادت تاني، وربنا يستر ما تزيدش عن كده".
وتقول فاطمة:" كنت ناوية أشتري سمك النهاردة لقيته غالي جدًا وبرضه اللحمة والفراخ زادوا، إنما الخضار والفاكهة أسعارهم معقولة ماحصلش فيهم زيادة".
وأكد فتحي مرسي، رئيس مجلس إدارة الغرفة التجارية بالبحيرة، أن الأسبوع الجاري سيشهد عقد اجتماعات منفردة لشعب الدواجن واللحوم والأسماك للتعرف على موقف كل شعبة في التعامل مع الظرف الحالي.