حللّوها أنتم

الى أصدقائى المحامين ويا كل من له خبرة فى حل المشاكل الأسرية هناك مشكلة عويصة لم اكن اريد التحدث عنها لكنها استفحلت فاردت رايكم
لى قريبة من أسرة كريمة لها أخت واحدة و9 من الأخوة الذكور منهم 6 فى عمر الشباب
قريبتى هذه جاءها عريس ونتيجة أن أختها مطلقة منذ زمن نتيجة خلافات مع زوجها ...فقد إشترط ابوها واخوها الأكبر مجموعة من الشروط على العريس تطبيقا للمثل العامى بتاع (اللى اتلسع من الشوربة ينفخ فى الزبادى) وفعلا وافق ذلك العريس هو وأهله على الشروط وكتب بها تعهدات
المهم تم الزواج ولكن فوجىء الجميع أن ذلك العريس بدأ يلعب بديله ولم ينفذ أى شرط اتفق عليه فذهب الأب هو وأبنه الكبير للعريس ليذكره بتعهداته ففوجىء بزوج ابنته يتملص من تعهداته وعندما حاول الأب أن يتفاهم فما كان من عائلة زوج ابنته ألا أنهم عايروه قائلين ( ياسلام جاى تطلب حق بنتك دلوقتى اومال كان فين لسانك مع جوز بنتك التانية ؟ ومن الآخر هى مراته شرعا وقانونا واعلى ما خيلك اركبه ) الراجل قال لهم خلاص نخرج بالمعروف قال له ( طلاق مش هطلق ومش هنفذ اى حاجة وبنتك مراتى بشرع الله وعلى ايد ماذون وشهود مش عرفى )
المشكلة دلوقتى إن اخواتها الصغيرين دمهم فار وكل يوم بيروحوا يضايقوا فى زوج اختهم وعيلته وحالفين انهم مش سايبينه وعيلته
وزوج اختهم ماشى يقول للناس ان ابو مراته هو اللى مخللى ولاده يضايقوه والراجل بيحلف بالله انه مش قادر يوقف ولاده عن مضايقة جوز بنته وان هما اللى دمهم حامى ومتضايقين علشان أختهم
يا اولاد الحلال حللوا المشكلة دى لأن خلاص اخوات العروسة حالفين يا إما يطلق أختهم يا إما هو هيعرف شغله وهو مش رااضى يعيش مع مراته بما يرضى الله وينفذ اللى اتفق عليه ولا راضى يطلق ......حللوها انتم بقى