بالصور|| الكينانى : مش مرتاح .. ويا ريت الناس تتقى ربنا .. وده سر بكائى

فى حوار خاص لمنصوره نيوز فتح ياسر الكينانى المدير الفنى للمنصوره قلبه عن الأحداث الاخيره التى مر بها الفريق وعن هجوم بعض الاشخاص على الجهاز الفنى بعد نتائج الفريق فى بدايه انطلاق الدورى وكذلك بكائه فى الثوانى الاخيره من مباراه بنى عبيد الاخيره وجاء الحوار كالتالى :
فى البدايه نقول الف مبروك للفريق على اول فوز بالدورى ؟
الله يبارك فيك وان شاء يكون الفوز ده فاتحه خير لسلسله انتصارات بعد كده
احب اعرف بكاء حضرتك فى مباراه بنى عبيد وتحديدا لما المنصوره جابت هدفها الثالث كان سببه ايه ؟
عشان لاعبيتنا طلعت رجاله ولما كنا فى الفندق ليله الماتش قعدوا معايا كلهم وقالولى هنلعب ونكسب الماتش ده عشانك انت لانك بتتعب معانا بجد وان شاء الله هناخد التلات نقط دول عشانك انت .. وطلعوا قد كلمتهم
علاقتك بللاعبيين جيده لهذا الحد ؟
الحمد لله على هذه النعمه .. انا بحاول على قد ما اقدر انى اكون كويس مع كل اللاعبيين سواء اللى موجودين فى الماتش او بره القايمه لان فى الاول والاخر قوانين الاتحاد الدولى بتقول 11 لاعب فى الملعب و7 احتياطى وانا القايمه عندى 25 .. ولو الامر بايدى العبهم كلهم لان كل اللى موجودين فى القايمه على مستوى عالى جدا وكل ماتش وله خطه محتاجه لعيبه معينه
رغم الفوز على بنى عبيد ولكنى ارى الحزن مازال فى عينك ؟
خلينى اتكلم بصراحه .. انا مش كسبان اهو الماتش الاخير ولكن انا مش مرتاح فى النادى الوقتى خالص واقولك كمان انا عاوز امشى بس قاعد عشان الحاج ابراهيم بس هو اللى مصبرنى ومتمسك بيا لابعد حد
يا ترى من اى جهه الجمهور ولا الاعلام ولا اللاعبيين ؟
لا ابدا كل دول بحترمهم جدا .. الجمهور منقدرش نعمل حاجه وهما مش معانا والاعلام كويس وبيغطى النادى تمام واللعيبه بيتشغلوا على اكمل وجه ولكن انا زعلان من الناس اللى مش بتتقى ربنا فينا وفى الفريق وكل واحد قاعد فى بيته بيقلح كلام علينا من غير ما يشوف ولا حتى يسمع فبقول ليهم يتقوا ربنا شويه
نقدر نعرف مين الاشخاص دى ؟
بدون ذكر اسماء هما أشخاص ملهاش تاريخ تدريبى وبتتكلم عمال على بطال .. تقدر تقولى هما ليه انديه الدقهليه بيجيبوا مدربين بره الدقهليه .. لان مدربين الدقهليه مبيشتغلوش وقاعدين للكلام وبس .. انا والله اقل واحد باخد فلوس فى مدربى القسم الثانى ومش عاوز كمان كفايه عليا اشوف فريق بلدى والنادى بتاعى بيكبر قدام عينى
انت مش شايف يا كابتن ان الكلام ده مش فى وقته خالص واحنا لسه فى اول الموسم ؟
فعلا مش فى وقته خالص ولكن دى الحقيقه انى عاوز امشى ومش مستحمل الضغوط اللى عليا دى ولكن الحاج ابراهيم زى ما قولتلك هو اللى مشجعنى على الاستمرار وبكمل عشانه .. ويا رب يبعد عننا وجع الدماغ من الناس دى وارد عليهم فى نهايه الموسم
بعيدا عن كل ده يا كابتن .. شايف طريق الفريق ازاى بعد اول فوز هذا الموسم ؟
احنا كويسين جدا الموسم ده وزى ما انت متابع وشايف الحظ مكنش معانا ازاى الماتشات اللى فاتت ولكن الحمد لله ماتش بنى عبيد اثبت للناس ان المنصوره كانت بتمر بفتره انعدام الثقه فى التوفيق احنا بنعمل اللى علينا لكن لو ربنا مش كاتب ليك الفوز يبقى مش هتكسب حتى لو ايه زى ماتش طنطا بعيدا عن سوء التحكيم وقتها
أخيرا .. استعداداتك لفريق كفر الشيخ الخميس الجاى ؟
هنلعب على التلاته نقط زى كل مره ولكن بحترم كفر الشيخ وجهازه الفنى الجديد ومههما كانت سوء نتائج كفر الشيخ الموسم ده لكن كل ماتش وله ظروفه فربنا يوقفنا وناخد التلات نقط أهم
شكرا لك يا كابتن وبالتوفيق للمنصوره والصعود من نصيبنا هذا الموسم ان شاء الله
شكرا ليك انت ولكل القائمين على منصوره نيوز ولانهم متابعنا بصوره مستمره وورانا فى كل مكان واننا بنكمل بعض واحنا منظمومه واحده وهدفنا واحد