متعصباوي

جماهير في الجانب الأيمن : لعيبة تيييت يا ولاد التييت .. لعيبة تيييت يا ولاد التييت.
جماهير في الجانب الأيسر : اقعدوا مؤدبين ياولاد التربتين .. اقعدوا مؤدبين ياولاد التربتين.
مقدم برامج تافه : أهلا بكم أعزائي المشاهدين في برنامج "متعصباوي" على قناة ستيل بورت ونتمنى ان الحلقة دي تكون أسوأ من اللي قبلها ونقدر نوصل رسالتنا ونزيد التعصب في الوسط الرياضي ونشعل لهيب الأزمات والمشاكل بين الجماهير وبعضها.
مقدم برامج أكثر تفاهة : اعتقد اعزائي المشاهدين انكم شفتم أي حلقة من برنامج خاص المنافس وشايفين زينا ان الموضوع زاد عن حده لكن احنا طبعا مش هنسكت لان معانا جماهير ليها لسان وايدين ونقدر ندربكها على دماغ أي حد واعتقد ان الجماهير عاوزة تقول حاجة.
جماهير الجانب الأيمن : بالأحضان بالأحضان بالأحضان يا ولاد التيت بالأحضان.
جماهير الجانب الأيسر : يا منافس .. ارفع ايدك .. النادي بتاعنا .. هو سيدك.
مقدم برنامج من الاتنين التافهين : وبعد ما جماهيرنا عبرت عن نفسها ندي فرصة لرئيس تحرير برنامجنا يتصيت ويطلع قدام الشاشة بدل ما هو مزنزق في عربية الإذاعة الخارجية خصوصا انه جاي النهاردة لابس بدلة وجايب ابنه معاه يشوف الحلقة ومكلم المدام والأسرة كلها تتفرج عليه.
الجماهير : رئيس تحريرنا يا معلم خلي الكاميرا تتكلم .. رئيس تحريرنا يا معلم خلي الكاميرا تتكلم.
رئيس التحرير : اهلا بيكم أعزائي المشاهدين في فقرة التصييت بتاعتي واسمحولي النهاردة اقولكم الاخبار بتاع الاسبوع اللى فات لأني اتأخرت وانا جاي عشان ابن عمي يربطلي الكرافتة بس عموما اخبارنا مش بتختلف كتير بين حلقة والتانية وفي النهاية بنوصل إن نادينا هو الأعظم في التاريخ وان كله تمام التمام وميت فل و19 وبعد اذنكم أدي فرصة للجمهور يهيصلي شوية قبل الفقرة ما تخلص لأن الحلقة دي هتنزل على ميديا كورة وابني هيوريها لزمايله .
الجماهير : رئيس تحريرنا يا فت .. يا مسيطنا عالنت .. رئيس تحريرنا يا فت .. يا مسيطنا عالنت.
المقدم التاني : رجعنالكم اعزائي المتعصبين ومعانا نجم من نجوم النادي التعبانين آخر خمس ست حاجات واللي عفا عليهم الزمن وهنسأله نفس الأسئلة بتاع كل حلقة وهو يحكيلنا عن زمان في زمن الهواية لما كانت كل حاجة بالكوبون مش بالفلوس واللي بيجيب الجون بياخد تذكرة اتوبيس ابو دراع لحد بلدهم عشان يشوف والدته ، وازاي لما كان فيه أزمة مادية ومكانش فيه في النادي كورة لعبوا ببطيخة وخدوا الدوري وكانت المكافأة ربع كيلو جبنة براميلي كلوها مع البطيخة وعيش مقدد ، مش زي لاعبين اليومين دول اللي يتاكلوا أكل.
المقدم التاني : اعزائي المتعصبين وفي ختام حلقتنا نحب نعمل أي هيصة ومخرجنا يعملنا حركة نتريق بيها على الناس التانيين بعد اللي عملوه معانا واحنا قاعدين على قهوة ام كلثوم من يومين ده غير لما شتموا اللعيب بتاعنا في المدرجات ومحدش فتح بفه بس رجالتنا هما هترد قبل مانختم حلقة الأسبوع ده من برنامج "متعصباوي".
جماهير في الجانب الأيمن : لعيبة تيييت يا ولاد التييت .. لعيبة تيييت يا ولاد التييت.
جماهير في الجانب الأيسر : اقعدوا مؤدبين ياولاد التربتين .. اقعدوا مؤدبين ياولاد التربتين.
تتر الختام.