إستثناء

مش مدّيني الحق أتكلم,
هفضل ساكت,
ساكت بس بفرّغ شحنة,
محنة إتلضمت تاني في محنة,
بني آدمين في الآخر, إحنا,
والأساطير ماتجيش في الواقع,
مع إني صادفت على الشاشة..
سبايدر مان!
شُفت كمان, مشهد مُستنسخ..
من قصة فرعُون وهامان!
وسمعت حاجات م اللي تشيّب..
طفل في مهده,
تزرع شَعر خفيف على راسه,
سِحْر يشيل كل الألوان!
بس الغالب,
إن الغالب أصل القاعدة,
وإن الإستثناء في الآخر:
"إن اللي بيكتب إنسان"
مش قادر أكمّل مهاتيّة
عدي يا قارب وإطلع بيّا,
م الغرقة-ا- دي لشط أمان
أنا مش عارف أقدّف لكن,
قلت: يارب -بكل إيمان-
إشفي جناحي, وجبّر رجلي,
خُد بإيديّا لأي مكان,
أرجع وأضحك فيه من قلبي,
أرجوك ماتشيلهوش من جنبي,
أنا مع إني بعيش وأتنفس,
بس بقيت منبوذ من نفسي,
بتشائم من كل مرايا,
بتفكّرني بشيء في ملامحي,
شيء بيخوّفني إني أفتكره,
مالاقيش للعنوان, عنوان!
أرجع تاني أذكر, وأستغفر,
وأجبر دمعة عيني تكبّر,
اللهْ أكبر, اللهْ أكبر
اللهْ رب الناس, رحمن