"الدليل" ديوان جديد لسالم الشهبانى

يستعد الشاعر سالم الشهبانى لإصدار أحدث دواوينه فى قصيدة واحدة تحت عنوان "الدليل" ، الديوان يرصد بشكل فني فترة ماقبل الثورة وبعدها عن طريق استدعاء الميراث التاريخى العربي وقراءة الواقع من خلال هذا الميراث .
يذكر أن "الدليل" هو الديوان السادس للشهبانى وله خمسة دواوين صادرة هى ولد خيبان والسنة 13 شهر والقطة العميا والملح والبحر وشبر شبرين وكلها تجارب يحيى فيها الشهبانى الموروث الشعبى القديم بتجسيد واقعى لما يحدث اليوم
وقد اختص الشهبانى كلمتنا بمقاطع لم تنشر من قبل من الديوان الذى سيصدر قريباُ عن دار أكتب ..ومن الديوان نقرأ
هنا الكلام يفرق
والقصة راح تختلف
كل التاريخ اترصف
واتغير الكورنيش
تقدر تشوف كليوباترا
واقفة فْ طابور العيش
مجنون العامرية
فى محطة المنشية بيعاكس (المشاريع)
وبياعين البسارية.. والصيادين فى البحر
**********************
ليلى بقالها شهر عنى ولا بتسأل
سألت كل الناس
عنهاولم أوصل
ولا حتى دلونى
نكرونى لما بكيت
وسابونى لجنونى
وقالو مش نافع
أنا كنت زى الطير ع الحب بيشابى
زى النخيل يافع
مش كل حد اتظلم قادر وهيدافع
*********************
ياصاحبى ماتعدش
زيد الصلاة ع النبى
واسكت ولا تردش
ظابط بيتغابى
على بياعين الفل
والخلق فى السكة
ناصب فى راسه كمين
مسكوك بميت سكة
ولا عمره يوم يتحل
سايبنى ليه فى الطل
هوا الميزان اختل؟ ولا انتو نسيتونى؟
**********************
واقف لوحدى شريد
قلبى يتيم فى العيد
والفرحة كدابة
نبحت كلاب ع الجسر.. عوت ديابة
أنا صرختى دَوِّت
قصيدتى بنت الغلابة
بنت المتاح والصدق والممكن
بنت التاريخ محفور على صدور الغلابة
الحكى قبل الكتابة
أبوزيد وكل الزغابة
راحلين على تونس
البنت عشقت يونس
كسرت بإيدها الحجر
خَضَّر فى قلبه الشجر
والحكمة لو فى الصبر.. يبقى التسرع ضجر
****************************
البدو غير الغجر
لكل منهم قانون
مش كل كن فى يكون
فى الإختلاف معرفة.. فى المعرفة شىء م الجنون!!
***************************
سليمان عليم بالجن
والطير... والبشر
عرش الأميرة هنا قبل ارتداد البصر
والعبد ربانى
نصر الرسول وفْ بدر
حضن الصحاب حانى
حزن الصديق مش حزن أو خوف وشىء مجانى
حزن الفراق
عن أهله
عن موطنه
قاله الرسول: لا حزن..
طبطب عليه طمنه
*********************
هنا الكلام يفرق
والقصة راح تختلف
يا أميرة الفراشات
أنا عمرى
واخده سلف
وهَارُدُّه للمولى
شايفك فى كل الحاجات لا قوة ولا حول!
****************************
مشاعرى وهاجة
سامحينى لو فرت
زى الحمام... م البرج
هى اللى حيلتى يجوز... سفينتى عند الطوفان
فرسى فى زمان العرج
الكدابين
الأدعاياء
مرضى النفوس
أتباع بَسُوس فى الفتنة وشرار الحرب
خدم الولى
شر البلية الكدب
الكدب شر المبتلى
رفعو القصايد ع الأسنة مكيدة
وقفنا احترامًا للشعر احترامًا للقصيدة
*************************
آمِنَّا بالحكمة فْ بلوغ الصبر
مشينا جبر
لشىء مانعرفهوش
كل الوشوش ع السكة تشبه بعضها
ماشيين بأمرالحكم والعادة
كانت سحابة فى السما صايبها طلق الولادة
***************************
نزل الشوارع بشر
قلبى انفطر
م الفرح غنى
قاللى الصديق:
دى الثورة يظهر!!
أنا بعت يوم الحنة فى الأزهر
ووقفت ببخورى
وعطورى.. أسترزق
كان خوفى م البلدية.. (فى بلاد يقول الأزالة) يمنعنى.. أرفع صوت
كان عندى اشوف الموت ولا اشوفش هذا الوش
صاحب بلادة وجهل
وبلاغة فى الغش .. والظلم والباطل .. والكدب بزيادة
*******************************
نظرة يا اصحاب السيادة
لو كلامى فْ يوم أشار
للغلابة
المطحونين تحت خط الفقر جبرًا
أو فى مرة
صرخت جهراً
من همومى
ومن جنونى
قولت كونى
كونى زى الطير.. وكونى.. فُلْك نوح
****************************
روح موانسة ضِلِّى عارفة
حاسة بالجرح وبكايا
كونى زى الشعر ثاير
سندريلا فى الحكاية
ليه تسيبى الجرح غاير
قلب بيصيبه الرصاص فى المظاهرة فْ ليل يناير
*****************************
بعد يوم عشرين
بخمسة/ الزمان
وقفت الكلاب بتعوى ع الميدان
سَانَّة لولادك نيبان.. الظلم بان
وانكشف كل اللى كان/ فى ليل يناير
تاجروا بالقصة وما فيها
واوعدونا بالخلاص
واضربونا فى المظاهرة بالرصاص
**********************
انتو أصحاب السيادة
والمعدل والفوائد
والموارد والعوائد
والشواهد والموائد
والكلام عن دخل فائض عن جيوبكم
دوسو أشجار اللمون اللى فْ دوربكم
هِدُّوا أبراج الحمام
كَسَّرُوا بيوت الغلابة
واوصفوهم بالخوارج عن نظامكم
دُوْسُوا ع الحلم بجزمكم
امتثالاً للنظام
اسجنوا النور ان هزمكم
امتثالاً للنظام
اكسرو الحق ان قَسَمْكُم
امتثالاً للنظام
بُكْرَة من صلب القصايد تنطلق أسراب يمام
بكرة من صلب القصايد جَاىّ شاعر
يبقى ملح الأرض وترابها وشجرها
يكشف الكدب فْ عينيكم
وانتو زى الغيمة سودا فوق سماها
دود بينخر فى جدارها
انتو أسوأ ما فْ قدرها
انتو نارها
وانكسارها
واختصارها.. فْ رأس مال
فيلا كانت أو فى قصر
بُكْرَة من صلب الغلابة تيجى مصر