يعملوها الكبار ويقعوا فيها الصغار

يوميات مطحون

فوجئت وانا نازل الصبح بالحاج "بيومي" البواب ماسك في رقبة "سيدة" مراته وفين يوجعك تدخلت وأقنعته بتركها وسألته بتضربها ليه؟ فأجاب: تخيل حضرتك متجوزها بقالي 20 سنة وبتاخد مني كل يوم 50 جنيه مصاريف الاكل بس وامبارح اكتشف الحقيقة المرة لما سمعت الست "فيفي عبده" بتقول ان الواحد ممكن يعيش ب 5 جنيه.. طب طلاق تلاته منا سايبها غير لما تقولي بتودي فلوسي فين ؟ طبعا "سيدة" ما سكتتش وقالت طلاق علي طلاقك منا قاعدة فيها وابقي هات الست "فيفي" تورينا هتكفيك ب 5 جنيه ازاي؟ دول يا دوب تقطع بيهم تذكرة تتفرج علي الحاجات في السوبر ماركت وبعدين انت ليك عين تتكلم - طبعا بتوجه كلامها للمعلم بيومي- بعد سيادة النائب "عجينة" ما قال ان نص الرجالة عندهم ضعف جنسي وانت قاعد تقول هرفع عليه قضية طب انا اول واحدة هروح المحكمة واشهد انك من نص الرجاله الضعيف.. فصرخت فيهما: يا جماعة ما ينفعش كده شكلكوا هيكون ايه لو الشيخ فهد خطيب بنتكو "سعدية" سمع الكلام ده.
ولسه ما خلصتش كلامي لقيتهم لطموا هما الاتنين في نفس واحد وقال بيومي بحسرة: الشيخ "فهد" هج وساب سعدية وساب البلد كلها بعد ما عرف ان "الارانب" اللي كانت بتجيبها سيدة من البلد طلعت (فئران) والجزار اللي كان بيجيب منه اللحمة اتمسك وهو بيدبح حمير وطبعا عرف موضوع الفراخ بتاعت الضعف الجنسي.
مشيت بعد ما فشلت اني اصلح بينهم بس اللي مزعلني ان حلم السفر طار مع جوازة سعدية لاني عايش علي أمل انها تتوسطلي عند طويل العمر يجيبلي عقد عمل.