انفراد : 'طباخ المعزول يكشف أسرار قيادات الإخوان:

المأمورية.. الاسم الحركي لمرسي في السجن
خيرت الشاطر طلب برطمان عسل ب8800 جنيه والبلتاجي بخيل جدًا!
ضابط وطبيب يشرفان علي طعام مرسي وهو عاشق للحوم!
غرفة المعزول 7 نجوم ويقرأ الأخبار والأهرام والجمهورية يوميًا
في انفراد جديد ل "أخبار الحوادث" أول حوار لطباخ الرئيس المعزول محمد مرسي وقيادات الإخوان داخل سجن العقرب، يتحدث فيه عن أبرز المواقف التي واجهته معهم وعن عادات مرسى وخيرت الشاطر، ومن هو الحصان الأسود في سجن العقرب، وما هو الاسم الحركي لمرسى داخل السجن، ولماذا يتم التمويه أثناء ذهاب وحضور مرسى إلى المحاكمة، ومن يتعامل معه وتفاصيل الغرفة التي يقيم فيها المعزول من خلال الحوار التالي
ممكن تعرفنا على نفسك؟!
اسمي أشرف أحمد سعد، 53 سنة، كان محكوم عليّ بالسجن المؤبد في قضية مخدرات، وعملت في السجن كطباخ وأصبحت الطباخ الرئيسي لسجن العقرب شديد الحراسة فتعاملت مع قيادات الإخوان من خيرت الشاطر وولده سعد واسعد شيخه والشيخ صفوت حجازي ومحمد البلتاجي وكانت أهم لحظات حياتي عندما لقبني ضباط السجن بطباخ الرئيس بعد أن أصبحت الشيف الذي يطعم الرئيس المعزول محمد مرسى، ولى معهم العديد من الحكايات خلال وجودي وحتى خروجي في مايو الماضي بعفو رئاسي لقضائي نصف المدة حسن السير والسلوك.
كيف بدأت علاقتك بالإخوان داخل السجن ؟
أول تعامل لي مع الإخوان كان مع الشيخ صفوت حجازي ، لما جاء لي وقال لي تسلم ايدك يا شيف وادانى 100 جنيه اكرامية، لأنه كان عامل عزومة قبلها بيوم والأكل أعجبه وقال لى هنتعامل معاك كل شهر وحط لى مكافأة شهرية بناء على نصيحة من سعد الشاطر اللى قاله "ادفع راتب للشيف علشان لما نطلب منه حاجة نطلبها بعين قوية" والموضوع ده ليه قصة لأننا كنا مش بنشتغل يوم الجمعة وكانت الوجبة اللى بيحصل عليها الإخوان في اليوم ده هي التونة فقط لان الكافيتريا الخاصة بالسجن لا تعمل فقالولى يوم الجمعة مينفعش ناكل تونة وعايزين الكافيتريا تشتغل ومن الكلام اللى مش هقدر أنساه كلمة سعد الشاطر لما قالى " أن الجمعة ليه حساب تانى" يعنى اكرامية اكثر فأستأذنت الضابط المسئول عن المطبخ والكافيتريا انى اشتغل الجمعة فقالي أنت حر بس متجيش تشتكى تانى ، والشيخ صفوت كان لما بيعمل عزومة للإخوان داخل السجن كان بيدينى ثمن وجبة من الوجبات كمكافأة على جودة الأكل وهو كان من اسخي الناس اللى بتدفع اكرامية ، وفى البداية مكنتش عارفة لأنه كان بدون السكسوكة المشهورة عنه ولكن بعض زملائي قالولى ازاى متعرفش الشيخ صفوت حجازي وللأمانة هو شخصية كويسة والتعامل معاه سهل اوى
قلت أنهم بيعملوا عزومات داخل السجن ممكن توضح أكثر؟
الإخوان بيتجمعوا في الساعة اللى بيتريضوا وبيأكلوا فيها مع بعض وبيكون اغلبها يوم الجمعة بعد الصلاة وكانوا يومها بيطلبوا الأكل منى واغلب العزومات بتكون لعشرين شخص من عناصر الإخوان وأول جمعة طلبوا نجرسكو والجمعة اللى بعدها طلبوا فراخ وطواجن وده كانت أكلتهم المفضلة .
من هو أصعب الشخصيات الاخوانية التي تعاملت معها في السجن ؟
محمد البلتاجي
لماذا ؟
أغلب عناصر الإخوان الموجودة داخل السجن كانوا كرماء وبيدفعوا إكراميات كثيرة على عكس البلتاجي اللى بعتبره ابخل من تعاملت معهم داخل السجن فعلى الرغم من الوقت اللى قضيته معاه في السجن لم يكن يدفع لنا أي اكرامية على الإطلاق وكان أقصى حاجة انه يدينا تفاحة من الأكل فقط وده آخر حاجة شفناها منه والتعامل معاه صعب أوى، وهو أنشف شخصية بين الإخوان اللى في السجن ومكنش بيعطي لحد جنيه واحد
وأقوى الشخصيات التي تعاملت معها من الإخوان؟!
أسامة ياسين من أقوى الشخصيات اللى شفتها في السجن كان ليه هيبة ومكانة عند باقي قياداتهم
ما الذي لاحظته في تعاملك مع قيادات الإخوان داخل السجن ؟
كان فيه نقطة غيرة بين بعض قيادات الإخوان داخل السجن وده لاحظته في الأكل وخاصة بين سعد الشاطر وأسعد الشيخة بالذات فكان لما يطلب الشيخة أكل كان اسعد يطلبه هو كمان وكان بيدينى فلوس علشان أهتم وازود ليه الأكل أكثر عن زميله والعكس صحيح وكمان في الفلوس الاثنين بيتنافسوا مع بعض
كررت اسم أسعد الشيخة كثيرا لماذا ؟
لأنه من أقوي شخصية بين قيادات الإخوان الموجودة في السجن وده كان باين من التعامل معاه واحترام المساجين وهو بيعتبر الرجل الثاني في القيادات الموجودة ومكنش فيه حد اقوي منه إلا المهندس خيرت الشاطر فقط وفى الفلوس الشيخة هو الأسخى وكان بيعطينى فلوس حلوة لما بيعجبه أكلى ، والأكل المفضل عنده تشيكن دجاج محشي باللحمة المفرومة وكانوا بيحبوا أوى شوربة لسان العصفور والملوخية
هل تعاملت مع المهندس خيرت الشاطر في السجن ؟
المهندس خيرت الشاطر كان بيحب المشويات فراخ وسمك، وخاصة السمك هو أكلته المفضلة سواء السنجارى أو المشوي ، وهو كان يطلب برطمان عسل نحل جبلي وبييجي له من محل اسمه بمصر الجديدة وبيكلفه 8800 جنيه للبرطمان الواحد والعسل ده أصلى وكمان كان يطلب زيت لوز في زجاجة صغيرة بتكلفه 600 جنيه علشان يدهن بها الحبوب الموجودة في وجهه والحاجات ده كان الضابط بينزل يجيبها مخصوص ليهم وكانوا بيكتبوها في ورقة كبيرة ومجموع التسوق اللى بينزل يجيبه بيكلف حوالى 70 الف جنيه في المرة الواحدة وكان نصف الطلبات هذه بتكون لخيرت الشاطر وأسعد الشيخة وشخص آخر اسمه معاذ
ولما المهندس بيروح لمستشفى السجن كنت بعمل اى حاجة علشان اتلكك واروح وهناك بكلمه في الأكل اللى عملته فكان "بيتفزلك" ويقولى ملحوظات على الأكل وفى النهاية كان بيحط ايده ويعطينى اكرامية محترمة .
- كان أكلهم من الكافيتريا معنى كده أن مفيش زيارات لهم من الخارج ؟
لا كان بتيجي لهم زيارات والزيارة اللى كانت بتيجى للإخوان بتكون محملة على سيارة نقل محملة بكل الخيرات وهما كانوا يفرقوا على أنفسهم الأكل ده لكن الزيارة ممكن تتأخر فترة فعلشان كده كانوا بياكلوا من المطبخ عندنا
- شفت مرسى كام مرة خلال تواجدك في السجن؟!
مرة واحدة بس وبالغلط لأنني كنت موجودا في المكان غير المناسب.
- ممكن توضح أكثر؟!
في البداية مرسى كان بييجي سجن العقرب كزائر أو مسجون ترانزيت لحد لما عملوا له غرفة في السجن 7 نجوم، بها شفاط وحمام سخن وساقع وسرير وكومودينو وسجاد ومرايا وكأنها غرفة نوم متكاملة لكن بدون تليفزيون ، وكان لما يكون رايح المحكمة بتهيجي طيارة حربية تطير حول السجن لفترة وبعدين بتيجى طيارة تانية تابعة للشرطة وبتاخد مرسى وبيكون في نفس الوقت سيارة اسعاف علشان يعملوا مناورة ومحدش يعرف هو في الإسعاف ولا الطيارة وكان كل السجن بيتم إخلاؤه قبل مجيء مرسى أو ذهابه لكن في احدى المرات كنت في الإدارة في هذا الوقت عن طريق الغلط فشفت مرسى وده كانت المرة الوحيدة اللى شفته فيها في السجن .
--معنى كده انك لم تتعامل مع مرسى مباشرة خلال تواجدك في السجن ؟
محدش في السجن بيتعامل مع مرسى داخل السجن حتى الضباط بتوع المصلحة مش بيتعاملوا معاه على الإطلاق
- من الذي يتعامل معه داخل السجن ؟
ضباط الأمن الوطني فقط بالإضافة إلى مأمور السجن في بعض الحالات لكن باقي الضباط ملهمش أي علاقة
- ما سبب تسميتك بطباخ الرئيس؟
ده يوم تاريخي الدنيا كانت مقلوبة في السجن وتوتر والضباط قالوا لنا أن قيادات مصلحة السجون موجودة لان مرسى رفض الأكل اللى جابوه له من الخارج وبعد كده عرفت أن اللواء محمد راتب مساعد الوزير لقطاع السجون وقتها موجود بسبب الأزمة ده وسأل عن الأكل اللى كان بيتم تقديمه لمرسى وعرف إني الشيف فأمر انى اعمل أكل لمرسى فعملت له فاهيتا مكسيكية وساعتها الأكل عجب مرسي ومن يومها ضباط السجن قالوا لي مبروك أنت مبقتش شيف المنطقة المركزية للسجون أنت بقيت طباخ الرئيس وكان اكثر من يناديني بهذا اللقب هو العميد "ش" مأمور السجن وقتها وهو دلوقتى ماسك المالية في مصلحة السجون
- تتذكر ما هو أول أكل يطلبه مرسى منك؟!
أولا محدش يقدر يقول مرسى داخل السجن هو اسمه المأمورية فكان المأمور يتصل بالضابط المسئول عن الكافيتريا ويقول اعمل الأكل علشان المأمورية كده نعرف أن الأكل ده لمرسى ، وأول أكل طلبه مرسى أو المأمورية هو لحمة ببصل ورز وسلطة بكل أنواعها وحاجة ساقعة وعيش سن والأكل عجبه وتاني يوم طلب طاجن بامية باللحمة والأرز والسلطات والعيش السن وكان بيحب الفاكهة وأكثر فاكهة بيحبها التفاح والموز والعنب وكان يطلب زبادى مع كل وجبة .
--هل واجهتك مشاكل خلال تواجدك في السجن كطباخ للرئيس المعزول ؟
آه في يوم طلب أكل فعملت له بطاطس بونجيه بالفراخ والرز والسلطات والعيش لكنى عرفت أن مرسى رفض الأكل واخبر مأمور السجن انه مش عايز فراخ فالمأمور اتصل وقال للضابط بتاع المطبخ بلاش فراخ هو عايز لحوم ومن يومها وكل الأكل لازم يكون فيه لحمة وساعة المشكلة ده كنت عملت فراخ فالضابط قالى ارميه واعمله اللى هو عايزه مش عايزين مشاكل فعملت له لحمة ستيك
- وماهي حكاية مرسي مع وجبات البط؟
مرسى بيحب البط كتير بس مش زى اللحمة ده عامل كأنه " مفجوع لحمة " كل حاجة بيحب فيها لحمة
بعد طهي الأكل كيف يصل إلى مرسي؟
يوميا بعد لما انتهى من الأكل بييجي ضابط من قوة التأمين الخاصة بمرسى ومعاه طبيب بيشوفوا الأكل ويعاينوه ويأخذوه معهم
ايه اللى ممكن تقوله لنا عن مرسى أو قيادات الإخوان في السجن ؟
عرفت أن مرسى بيدخل له يوميا صحف الأخبار والأهرام والجمهورية وكمان قيادات الإخوان تيجي لهم الصحف ده وفى بعض الأحيان شفت المصري اليوم لكن الأساسية هي الصحف القومية
ماهي أبرز المواقف اللى واجهتها خلال تواجدك في السجن ؟
أحد الضباط المسئولين عن تأمين مرسى لما جه المطبخ قال اعمل لي أكل زي اللى بتعمله لمرسى وبعد لما كل قال لي تسلم ايدك وعنده حق مرسى يعمل ثورة علشان تعمله أنت الأكل ،
والموقف الثاني لما طلب منى اللواء "إ ا " اللى ماسك الإشراف على سجون طره انى اعمله أكل للبيت فعملت له سمك مشوي وسنجارى ورز بالزبيب واليوم اللى بعده شكرني على جودة الأكل وده عن طريق الضابط المسئول عن الطعام واليوم ده كنت فرحان جدا لان الإشادة كانت من راجل مهم جدا وسمعة المطبخ بتاع السجن وصلت لحد نادي الشروق في المعادى وفى مرة طلبوا 150 وجبة .
بعد خروجك من السجن بتعيش ازاى؟
وكنت متزوج سيدة عراقية كان لي مطعم في بغداد وكنت بسافر بلدان كثير منها اسبانيا وتركيا ولكن بعد خروجي عرفت أن زوجتي ماتت وبناتي الثلاثة تزوجوا واخبروني عن الوضع المزري اللى عايشين فيه هناك ولو كان عندي فلوس كنت جبتهم هنا لكن أنا بعد خروجي مش معايا مليم واحد وعايش على احسان اهل الخير لكن اللى بيدينى النهار ده مش ها يدينى بكره، وانا اللى ضيعت الفرصة من ايدى في السجن .
فرصة ايه ؟
قبل خروجى فى العفو بمناسبة 25 يناير الماضى الضباط فى السجن كانوا عايزين يقعدونى سنه اضافية ويدونى راتب شهرى كمان بس انا افتكرت انهم بيتريقوا فقلتلهم عايز 3 الاف جنيه فى الشهر بعد القبض اللى بأخذه من المصلحة فوافقوا لكنى اخبرتهم انى اريد الخروج فاخبرنى احدهم انى مش هلاقى اكل بره لان الدنيا صعبة اوى فى الخارج وبالفعل خرجت لاجد الدنيا سوداء وحاولت ارجع لكن الضباط قالوا لى: انت خلاص مش على قوة المصلحة ومينفعش ترجع تانى ، وحاليا انا مش لاقي أكل ومش معايا جنيه .وحتى لما جيت اخرج من السجن قالولى عليك 200 الف جنيه غرامة ولما مكنش معايا فلوس قعدن 3 شهور أخرى فى السجن لحد لما خرجت فى مايو الماضى وخرجت لاجد كل اشقائى واقاربي ماتوا الا شقيق واحد فقط عنده 70 سنه ومعنديش مكان اعيش فيه او اصرف منه .
فى النهاية هل تعاملت خلال تواجدك فى السجون مع أى من مسئولي نظام مبارك ؟
لا لم ألتق أي حد منهم.
محمد طلعت