طريق النور

شمس الغروب

شمس النهار صابحة تسلم ع الحبايب‮.. ‬اللي حاضر منها واللي‮ ‬غايب‮.. ‬واللي راح وسافر بعيد عنها وصبح ملهوش نايب وتايه في الدروب‮.. ‬آه يا زمن قطر الحياة ماشي فيك بالعكس‮.. ‬وكل شيء مقلوب‮.. ‬حتي الأمان في حياتنا بقي‮ ‬غالي بقي مطلوب‮.. ‬وضحكة الطفل البرئ ماشية تشد التوب‮.. ‬وبكاها يصرخ م الألم‮.. ‬ويا مين يغيث القلوب‮.. ‬شمس النهار في بلدي دايما حزين مغلوب‮.. ‬ودي حكمتك يارب وعبادك خايفة من المكتوب‮..‬
شمسك يامصر‮ ‬غروب‮.. ‬وقلوب ولادك مليانة ذنوب‮.. ‬تجري علي اللقمة الحلال تلقاها عند صاحب المال حبوب‮.. ‬حبوب تجيب الهلوسة والفرفشة وتنسي علام الغيوب‮.. ‬أرضك يامصر الخير وفير لكنه رايح في الخفا للجيوب‮.. ‬ومالك السايب طار وسافر في بنوك سويسرا وفرنسا والغلابة علي أرضك بيغمسوا أيامهم وأحلامهم بالدموع والطوب‮..‬
خدك يامصر صبح مداس ينداس عليه من كدابين الزفة والحبوب واللهلوب‮.. ‬واللي عيونهم جريئة عايزنها حريقة واللطم ع اللي جري فيكي وليكي صبح أغاني وأماني ودروشه تفضح ما تستر في العيوب‮.. ‬والدمعة تجري علي خدك تقول دول مش ولادي‮.. ‬دول ولاد ابليس وكلامهم بقي كدب ونفاق ورياء‮.. ‬وصاحب الحكمة والكلمة والصدق في زمانا مش مطلوب‮..‬
ماشيه المراكب كلها بتجري وتسابق الريح وشمسها طالعة من‮ ‬غير‮ ‬غروب‮.. ‬واحنا ماشيين بضهرنا‮.. ‬نكلم بعضنا‮.. ‬علي اللي فات من عمرنا‮.. ‬والكلمة آهه نلمها م الجوف نلقاها مكسرة وحروفها معفرة‮.. ‬ومغبرة‮ ‬غرقانة وتايها في حواري العتمة وسط الدروب‮.. ‬وبهوات الزمن اللي فات قاعدين يتفرجوا علينا وفي إيديهم السيجار الكوبي‮.. ‬ولابسين الحرير ونايمين ع السرير متنعمين‮.. ‬وجوه السجون بالروب‮..‬
وقلنا ح يجيلنا البراح والافراح‮.. ‬بعد الفساد ما انزاح‮.. ‬لقينا الفساد سرطان معشش من زمان تحت الجلد وبين الضلوع ومتربع في القلوب‮.. ‬اللي سوادها زرع في‮ ‬غيطانها عيدان م الحقد والغل والعداوة بين الابن والأب والأم الكل بقوا أغراب والكلمة تتقال بينهم‮ ‬يادوب‮.. ‬رغم الحيطان والبيان اللي مقفولة والزيف رغيف محروق‮.. ‬والذوق عمله نادرة بندور عليه وسط كوم الخوف وفي شمس الغروب‮..‬
ورغم اللي عدي عليكي يا بلدي من خطوب وحروب‮.. ‬لسه بحبك وبكرة حقك ح يرجع وكل شيء مكتوب‮.. ‬ولسه كمان يا بلادي حق الشهيد اللي ضاع مطلوب‮.. ‬ولسه الشباب ع الباب وفي الميادين بتنادي ع الحرية والكلمة الصادقة العافية اللي طله من عيون محبوب‮.. ‬والكذب ان كان النهاردة هو اللي‮ ‬غالب‮.. ‬والصدق بقي مغلوب‮.. ‬شمس النهار ح تخبط من تاني علي كل دار‮.. ‬وتصَّبح ع الشوارع والحواري والغيطان والقلوب‮.. ‬ونورها يهل بصدق المحبة‮.. ‬وياخدنا حبة حبة لبر الأمان‮.. ‬ونتباهي بيكي يامصر بين الأمم والشعوب‮..‬