ماتقوم خلاص الصبح فات راحت عليك ولا انت بتحب السكات ما انا قلت لك ايه الحكايه قلت لى مات اللى مات وبعدهالك يا وطن قوم قلنا ليه الخريطة تايه منك والحدود ولحد امته تشيل وجع معصوبه عينك يا وطن وتموت على حدودك جنود النسر طاير ولا نايم يا وطن فوق العلم وكتير رسمنا النسر طاير ع الخدود ما تقول نهاية الدم إيه ما تقول نهاية الصبر إيه ما تقول لامته الجوع ياكلنا والسكوت معناته إيه وكتير تنقطنا بسكاتك واقفين صفوف متغربين الشمس تحرق والعرق طافح ببابك ما تقول نهاية الوقفة إيه طول السنين نصرخ (يا بيه) نسأل كتير وانت اللى قاتلنا بسكاتك وبعد هالك يا وطن وبعدهالك نفس اللى صابنى من زمان باين عليه هو اللى صابك الحزن علمنى البكا وانت اللى بتعبى الدموع وف لحظه تسقيها لولادك بطلت أنا اكتبلك كلام بطلت انا اشعر فيك حرام الكلمه واقفه بين عذابى وبين عذابك سايق عليك الفقر واكل غربتي سايق عليك الكلمة مكتوبة ف كتابك سايق عليك بين القبور أطفال بتلعب فى الحفر لافين عروسة بالكفن تخطفها منهم يا وطن وكمان يومين تطحن عيونهم بين ترابك .... ...... ........... ساعة غروب مريت على برج الحمام مين اللى خلّى الطير بيهرب م المنام تايهين وحبة قمح تايهه مننا عايشين بلاد النيل وعند النيل بنعطش يا كرام بطلت انا اعتب ع الوطن كتر الملام بيجيب لى إيه غير الملام بطلت انا ارسم لك علم واكتب كلام خلص الكلام مليّت كتبت الشعر فيك وفضلت ليك تكوينا بولاد الحرام لكن هناك رغم اللى فات هستنى نورك يا ملاك واكيد أنا واقف هناك ما هو كل ليل لازم نهار يطلع ويجى النور معاك ساعة غروب واخر كلام تصبح على خيرك وطن وعليك يا نور عينى السلام
