كل ماتيجي ذكري نصر أكتوبر تلاقي الحنين بيغطي القلب لأيام أكتوبر 1973 .. الحكاية فعلاً كانت ملحمة عظيمة.. وأشعر بالفخر لأنه في الأيام دي كنت علي أبواب مرحلة الشباب.. ومع إننا حافظين مسلسل رأفت الهجان بالحرف والمشهد لكن كل ما أشوفه لازم عيني تدمع مع صدق أداء المرحوم محمودعبدالعزيز وأكتشف حاجات جديدة في هذه الملحمة التي خاضها رجال المخابرات العامة ومش محتاجين نتكلم عليهم لأن مفيش في حياتهم غير الوطن والبلد فقط ومحافظين عليه .. ومن هنا إستحق محمودعبدالعزيز التكريم الرفيع من المخابرات العامة بنشر نعي في ذكري وفاته.. ولاننكر أن كل من قدم ولو مشهد في المسلسل كان عظيماً وفخوراً بذلك.. ويابختك يامصر برجالتك اللي حاطينك في عينيهم..وربنا يحفظك. ** لاشك أن مصر سارت بخطوات سريعة خلال السنوات القليلة الماضية في مجال الاستثمار وكفاية علينا بس قناة السويس الجديدة ومايقام علي جانبيها من مشروعات استثمارية أجنبية ومش هاتكلم علي قانون الاستثمار الجديد الذي يقدم حوافز وإمكانيات غير مسبوقة.. من هنا لما تطلع قناة بيراميدز اللي بقالها شهر ومفيهاش غير برنامجين تلاتة وتحط علي شاشتها عبارة " لامجال للاستثمار الرياضي في بيئة غير صحية" يبقي لازم أقول "اللي مايشفش من الغربال" وكمان أسأل " هو فين الاستثمار الرياضي اللي بيقولوا عليه وواجعين دماغنا عليه ده.. وأهمس في أذن أسامة الشيخ وإيهاب جلال "بذمتكم مفيش بيئة صحية للاستثمار عندنا.. الله يخرب بيت السبوبة إللي تخليكم تكتبوا كده علي الشاشة.. وبذمتكم اللي بيتعمل ده استثمار واللا حاجه تانية" .. ياريت حد فيكم يقدر يرد علينا يامحترمين..!! ** قرارات المجلس الأعلي للإعلام مؤخراً في منتهي العدل وأثبتت إنه مش أي حاجة الفلوس تشتريها..برافو. ** سيبكم من التنظيم والإبهار في مبارة السوبر المصري السعودي.. وسيبكم من الأربع عربيات .. وسيبكم من المليون دولار.. المهم والخلاصة إن الزمالك فاز بالكأس خارج أرضه ولاننكر أن الهلال فريق كورة محترم لكن الزمالك زمالك برضه.. ولامانع من تكريم أشرف قاسم وخالدالغندوروهما من العاملين في قناة بيراميدز ولكن الغريب هو تكريم أحمدحسن وكان لاعباً علي قده وليس لديه تاريخ ولكن تمت مجاملته لأنه مجرد مشرف علي الكورة بفريق بيراميدز.. وكان الأفضل تكريم حسن شحاتة وفاروق جعفر وإسم المرحوم إبراهيم يوسف.. لكن إللي نظم المباراة حر في تصرفاته.. وعلي فكرة جماهير كل الأندية كانت بتشجع الزمالك علشان اللي باللي بالك ..وننتظر الماتش التاني في مصر وهانشوف.. وللعلم يشرفني أنني أهلاوي بجد مش تايواني..!! ** ياتري نادي بيراميدز هايتباع باللاعيبة والإداريين .. واللا أرض وحيطان وملعب وخلاص..وياتري اللي بيشتغلوا في قناة بيراميدز هايتنقلوا لقناة بره مصر..سؤال برئ..!! ** اللواء خالد الدكروري رئيس قطاع الأمن بماسبيرو بدأ العمل بفكر جديد وتطوير يواكب العصر..!! ** تتصوروا نائلة فاروق رئيسة التليفزيون بتشتغل من 10 صباحاً حتي الثانية بعد نص الليل .. وطول اليوم عاملة اجتماعات وبتصدر توجيهات وبتتابع كل كبيرة وصغيرة .. عشان ترجع الشاشة الرسمية لسابق عهدها.. وأفتكر من أول يوم فهمت وكشفت المطبلاتية واللي بيلعبوا بالبيضة والحجر .. لكن معرفش غسلت الموكيت بتاع المكتب بالمطهرات واللا لأه ..وياريت تكون جابت كرسي جديد ..وقريب قوي هاتنفض السجادة ..مش قلتلكم عاوزة تنجح..!! ** لما يبقي "تيحه" هو اللي بيدور ويشغل الكيان العملاق.. يبقي علي الدنيا السلامة..!! ** النادي الأهلي: "أحمدحمودي-إسلام محارب- مروان محسن- هشام محمد- أكرم توفيق" ولاينفعوا بتعريفه .. منه لله إللي جابهم..!!
