فركش

مصرالجديدة مفيهاش إرحل

** أروح لمين وأقول يامين ينصفني منك .. قالتها أم كلثوم لحبيبها ..الجملة دي رنت في وداني والرئيس السيسي بيقول: "دخلونا في أمة ذات عوز.. أمة الفقر .. واما آجي أخرج بيكم يعملوا هاشتاج ارحل ياسيسي.. أزعل واللا مازعلش".. وأنا شخصياً فهمت إن اللي دخلونا العوز همه بتوع 25 يناير وبعدهم الإخوان ودول أخري .. وباقولك ياريس: "طبعاً من حقك تزعل لأنك مش مقصر في واجبك وبتعمل كل إللي ربنا يقدرك عليه وفيه شوية مش عاوزينا نخرج من العوز ودول بيقبضوا.. ومش من حقك تزعل عشان اللي عملوا الهاشتاج ده أهل الشر.. إما إخوان إرهابيين أو أصحاب أجندات خارجية وداخلية أو صحاب سبوبة 25 يناير اللي باظت أو مغيبين أو مش فاهمين حاجة ومسحوبين من رقبتهم بحبل.. ومش من حقك تزعل عشان الشعب اللي بحق وحقيقي عمره ماقالها ولاهايقولها لأنه مالوش في الهاشتاجات وصابر ومستحمل معاك عشان يعيش كويس ويخرج فعلا من الفقر.. ومش من حقك تزعل عشان لو شفت نتيجة الهاشتاج الخايب ده هاتلاقيها ولاحاجة يادوبك شوية هلافيت وخلاص.. إحنا خلاص معندناش كلمة ارحل دي المصريين شطبوها من معجم اللغة العربية لأنها خربت بيوتهم وتعبتنا.. لكن سيبك من الحكاية دي وخلينا في مشهد اللي فكر فيه عبقرينو.. شاب وشابة يقلدان وزير الدفاع الفريق أول محمد زكي الرتبة الجديدة بعد ترقيته.. دي رسالة واضحة وصريحة إن الشباب الفاهم الواعي الوطني.. همه الأمل والمستقبل وبيشاركوا في كل شئ وعاوزين يصلحوها معاك.. وهي دي مصر الجديدة.. بس إللي يفهم..!!
وبدون مزايدة ولا نفاق ولارياء باقولك ياريس.. الشعب شايف وحاسس وعارف إنت بتعمل إيه ليل نهار.. بره وجوه.. ومش هانسيبك.. وإللي عاوزك ترحل.. يرحل هوه في ستين مصيبة تاخده ويسيبنا ف حالنا.. إحنا ماصدقنا البلد رجعت ومبسوطين كده .. وتحيا مصر.
** واضح إن قناة "بيراميدز" داخلة بتقلها بميزانية خرافية تتعد بالمليارات.. لكن الفلوس مش كل حاجة.. في حاجات أهم .. لكن بلاش أحمد عفيفي والنبي الناس مش طايقاه .. خلونا ننتظر ونشوف.. يمكن تكون حاجة كويسه.
** دينا الشربيني.. ربنا بيعوضها عن اللي شافته.. وإيه يعني لما عمرو دياب يتجوزها..الحب مش حرام والجواز مش حرام .. إللي يعرف يقلدهم يقلدهم .. وإيه يعني أكبر منها بتلاتين سنة.. جاتكم نيله.. ده عمرو دياب مش ضياء دندش..!!
** تعيين أمير مرتضي مشرفاً علي الكرة بالزمالك دليل علي إن مرتضي منصور بيطبق فكر الدولة الحديثة بتمكين الشباب.. وأمير كمان مش غريب .. ده بيعمل كتير في صمت..برافو.
** هوه الكيكي ده بيوجع ..طب حد يعرف دكتور شاطربيعالج الكيكي..آه ياكيكي يانا..!!
** القارئات "إيمان محمود وسمية أحمد وشهد محمد من الدرب الأحمر".. واجعين دماغي
عشان أقول لاتحاد الكرة قدموا استقالتكم!!
** الله يرحمك سهير حسن .. هياتم .. لما يبقي عندي اكتئاب أو قرفان من أي حاجة وماتصلش بيها شويه ألاقيها بتكلمني وتقول "حاسه بيك.. مالك ياضيا".. وتنتهي المكالمة بضحك من القلب ووعد باللقاء وكانت آخر مرة قبل ماتتعب ومش هانتقابل ولاهاسمع صوتها تاني.. الله يرحمك.
** ومحمد شرف.. كان مثال الطيبة اللي مش موجودة علي الأرض.. لما جه من اسكندرية كان معاه ثلاثة ممثلين بقوا نجوم .. ولما تعب ولاواحد منهم عبره بتليفون.. ولما جاله فيلم ومضاه مالحقش يصوره.. الله يرحمك ياشرف المهنة والأخلاق.