مرتضى لتركي آل الشيخ: «أنا مش عايز منك حاجة.. بقاؤك هو هديتي»

طالب مرتضى منصور، رئيس نادي الزمالك، المستشار تركي آل الشيخ، بالتراجع عن قراره بالانسحاب من الاستثمار الرياضي في مصر، قائلًا: «أنا مش عايز منك حاجة، وكلامي ده بمنتهي الحب إحنا حبيناك بخفة دمك، أنت راجل كريم، إرجع لبيتك ولبلدك، أنت أكبر من أي مهاترات تخرج من بعض المنتفعين، الدولة المصرية بها مؤسسات وجميعها ترحب بك، أنت عملت فريق قوي وقناة كل الناس بتشوفها، من فضلك لا ترحل، شعب مصر كريم وبيعرف يقدر الناس اللي بتقف معاه».
يذكر أن مجموعة من جماهير القلعة الحمراء، قاموا بسب شلبي، بالإضافة إلى تركي آل الشيخ، رئيس هيئة الرياضة السعودية، وأحد مستثمري نادي بيراميدز، خلال مباراة الأهلي وحوريا الغيني، التي أقيمت السبت الماضي، في إياب الدور ربع النهائي ببطولة دوري أبطال إفريقيا.
وفجر تركي آل الشيخ، مفاجأة بأنه يفكر فى الانسحاب من الإستثمار بالرياضة فى مصر، بعد الهجوم الكبير الذي تعرض له خلال الفترة الماضية، على حد قوله، حيث قال فى منشور عبر صفحته الرسمية بموقع التواصل الاجتماعي «فيسبوك»: «أفكر جديًا بالانسحاب من الاستثمار في الرياضة في مصر، هجوم غريب من كل جهة وكل يوم حكاية، ليه الصداع»، قبل أن تعلن قناة بيراميدز، قرار آل الشيخ بالانسحاب رسميًا بشكل نهائي من الاستثمار في مصر، على أن يتم جلب عقود احتراف للاعبي الفريق وعقود للعاملين بقناة النادي.
وواصل مرتضى حديثه عن آل الشيخ، خلال لقائه بحلقة الخميس من برنامج «ستاد بيراميدز» الذي يقدمه الإعلامي مدحت شلبي: «أنا أكتر واحد مستفيد من إنه يمشي، ولما كلمني قالي ليك 5 لاعيبة من بيراميدز، قولتله هديتي إنك تقعد، وكل الاستثمارات اللي عملتها تفضل شغالة، والمنظومة تفضل موجودة، عارف إن الجرح كبير لكن الأسود يلتهمون الفئران».
واستمر في رسالته: «لو أنت بتحب مصر بجد، أنا مش عايز لاعيبة من عندك، بس عايزك ترجع لبلدك تاني ولبيتك التاني مصر، والله العظيم الناس كلها بتحبك، سيبك من الرعاع، والجمهور الحقيقي للأهلي بيحبك، سيبك من المجروحين والمحروقين اللي بيهاجموك».