مرتضى منصور يطالب تركي آل الشيخ بعدم الانسحاب

هاجم مرتضى منصور، رئيس نادي الزمالك، محمود الخطيب، رئيس النادي الأهلي، بعد قيامه توجيه السباب للمستشار تركي آل الشيخ، رئيس هيئة الرياضة السعودية، مؤكدا أن الأول حصل على 260 مليون كدعم لناديه وقام بشراء فيلا لنفسه في دبي، وقال: «كل اللي في الأهلي إخوان، ومن مصلحتهم إن العلاقات المصرية السعودية تقع، ينفع وزير يتشتم، أنتم عايزين تخسرونا الناس وخلاص».
وأضاف مرتضى خلال مداخلة هاتفية، بقناة «بيراميدز»: «تركي آل الشيخ مش خسران حاجة، لكن أنا بقوله لما الكلاب تنبح ده مش معناه إن الشارع وحش، وفيه ناس كتير في الأهلي عارفة أنت عملت إيه عشان ناديهم، لكن اللي بيشتموك دول عيال متأجرة من الإخوانجية اللي في المجلس».
واستمر في حديثه: «أحمد مرتضى منصور، وإسماعيل يوسف، لما راحوا بيت تركي آل الشيخ، ما أكلوش لقمة عنده في بيته، مش أخدوا فلوس وساعات، مش إحنا بتوع الخلايجة زي ما شتمتونا، إيه الجريمة اللي ارتكبها تركي آل الشيخ، هو أنت عايز تلعب بشروطك لوحدك؟ إيه المنظرة دي، أنت اعتذرت عن السوبر والزمالك وافق يلعب مكانك، في النهاية فيه اتحاد عربي عنده نظام لازم تحترمه».
وأشار: «فيه 50 عيل اندسوا في جمهور الزمالك في مباراة المقاولون العرب، وأول ما ابتدوا يشتموا الأهلي وقفتلهم وهددتهم بإخلاء المدرج، لأن أنا نادي محترم، ولما تركي آل الشيخ طلب ضم محمود عبد العزيز مقابل 6 ملايين دولار لبيراميدز ورفضت، هو مش عيل صغير وراجل ذكي وفاهم وبيحب الأهلي».
ووجه رئيس القلعة البيضاء رسالة لآل الشيخ قائلًا: «لو أنت مشيت يبقى هما كده انتصروا، مع أنك وعدتني في حالة نهاية تجربة بيراميدز هتبيع 3 أو 4 لاعبين، وتسيب 4 لاعبين للزمالك هدية، وأنا من مصلحتي إن ده يحصل، لكن أنا بقولك هديتك لنادي الزمالك إنك تفضل قاعد في مصر».
وتابع: «أتمنى ألا يلتفت تركي آل الشيخ للصغار، والتراجع عن قراره بسحب استثماراته من مصر، من حقك تزعل وأنا كمان اتشتمت زيك، وهنعرف ناخد حقنا، وبقولك لو بتحب مصر بجد فكر في قرارك لأن المصريين بيحبوك، والأسود في النهاية ما بيتهزوش».
وفجر تركي آل الشيخ، مفاجأة بأنه يفكر الانسحاب من الاستثمار بالرياضة في مصر، بعد الهجوم الكبير الذي تعرض له خلال الفترة الماضية،على حد قوله، حيث كتب عبر صفحته الرسمية بموقع التواصل الاجتماعي «فيسبوك»: «أفكر جديًا بالانسحاب من الاستثمار في الرياضة في مصر، هجوم غريب من كل جهة وكل يوم حكاية، ليه الصداع».
وكان آل الشيخ قد تعرض لهجوم كبير من جانب جماهير الأهلي، خلال مباراة الفريق الأحمر مع نادي حوريا كوناكري الغيني، السبت الماضي، بإياب دور ربع النهائي بدوري أبطال إفريقيا، والتي انتهت بفوز القلعة الحمراء برباعية نظيفة.