فركش

ماتورينا شطارتك ياحبيبي

** بالفم المليان وبكل ثقة قال الرئيس السيسي أمام الدنيا كلها السبت الماضي بقاعة مجلس الشعب : " ربنا هوه اللي حامي البلد دي .. ولاتقولولي السيسي ولاغيره .." ولو فهم الناس المعني الحقيقي لهذه الكلمات لضربوا قوي الشر علي قفاهم زي اللي يطلع مثلاً يقولك "أنا بحب السيسي جدا بس بحب البلد أكتر وعاوزه يعمل كذا وكذا" .. طيب ياضنايا فيه حاجتين الأولانية : " مين طلب منك تحبه أكتر من البلد " والتانية : " ماتيجي تورينا شطارتك ياحبيبي وتعرفنا لو مسكت البلد هاتعمل إيه .." وطبعاً الناس دي من المسخناتيه اللي بيجرجروا وراهم شوية غلابه في عقولهم وبيضحكوا عليهم لأنهم لو نياتهم سليمة كانوا حطوا لسانهم في بقهم..والكلام ده مبقاش ياكل مع الناس .. وإن شاء الله محفوظة يامصر رغم أنف اللي مش فاهمين حاجة وبيزيطوا ورا العملاء والخونة ..!!
** لاينكر أحد مع الاختلاف أو الاتفاق أن السبكية مؤسسة سينمائية لها تأثير بالغ في السينما ..ومن أجمل ماسمعت في رمضان كان محمد السبكي مع بسمة وهبة ببرنامج " شيخ الحارة".. قال بالحرف الواحد " مارضيتش أشغل محمد رمضان معايا ".. يبقي أنا ماجبتش حاجه من عندي لما قلت ده ممثل فاشل كل شغلته إنه يقلد المرحوم أحمد زكي وخلاص والله يسامح اللي خلاه يعمل دور ظابط شرطة..ويسلم دماغك وبقك يامحمد ياسبكي.. وسلملي علي مسلسلات "الدراي كلين".. !!
** بمجرد ظهور علي عبد الرحمن رئيس قطاع القنوات المتخصصة علي الفيس بوك انطلقت عاصفة من الحب والتحية به من أصدقائه وزملائه .. وأعتقد لو واحد تاني ظهر كان هايلاقي عبارات النفاق والرياء لآنه لما يتوكل علي الله هايلبس البيجامة قريباً محدش هايسأل في خلقته.. ونورت الفيس بوك يا "إبن عبدالرحمن"..!!
**ماسمعناش إن أي ضيف مع رامز جلال رفع عليه قضية لما إتهزأ بعد عرض الحلقة والتريقة والكلام الخارج اللي بيقوله عليه ..يبقي السبب إن الضيف رايح وعارف إنه هايقبض ويتهزأ..!!
**الشيخ خالد الجندي.. هو نوارة قناة dmc في رمضان وخصوصاً لما بيظهر لوحده بدون شريك لآنه بينطلق في الكلام بدون ماحد يقاطعه والناس بتستفيد وتستمتع أكتر..!!
**عبدالحكيم اللواج ..رغم إنه مذيع شاطربالقناة الثالثة " القاهرة" لكن عنده طقوس رمضانية إجتماعية ثابتة لاتتغير .. ومنها تجميع أصدقائه علي مائدة إفطار تجعل الكثيرين يلتقون بعد فترات غياب.
**دياب: لو عاوز تنجح في أدوار البلطجة والصياعه إقعد مع محمد رمضان قعدة واحدة بس بمزاج ..!!
** إيييييه .. دنيااااااا .. الله يرحمك ياعم ماسبيرو..!!