" يا حبيبتي.. يا بنت الإيه".. بموت فيكي.. بعشقك.. فعلا حبك مش من فراغ يا مصر.. أول امبارح دخلت أنا وابنتي وصديقي عادل المصري استاد برج العرب الساعة اتناشر الضهر ولقينا خمستاشر ألف مشجع في المدرجات وعلي الساعة خمسة ونصف المغرب بقوا مائة ألف بالتمام والكمال.. يعني تشجيع وهتافات من القلب والحنجرة والصدر لمدة تسع ساعات متواصلة.. ايه الحب ده كله يا مصر.. رجال.. شباب.. بنات.. سيدات.. أطفال وعواجيز.. كله بيهز الملعب بكلمة "يارررررب".. كاس العالم با بلاشي وربنا سبحانه وتعالي كريم وحنين مارضيش يزعل الناس جوه وبره الاستاد ولا يخلي مصر تنام حزينة.. عشان راضي عنا.. الحمد لله.. وتعالوا بقي نشوف المصري الأصيل الرئيس عبدالفتاح السيسي اللي استقبل الفريق القومي كاملا بعد ساعات قليلة من الصعود لكاس العالم وهو فرحان بيهم وكافأهم بمليون ونص جنيه لكل بطل وهم يستحقون بعد مشوار عناء صعب كنا نفقد فيه الأمل كثيرا ولكن ربنا كريم.. وكله كوم.. وكوبر كوم تاني.. مدرب عقر يكفيه فقط انه وعد بالصعود للمونديال وحقق الحلم.. واللي بجيب سرته بكلمة وحشه يبقي بيرش التراب علي التورتة وحاقد وغلاوي.. لأنه لم يقصر.. ولكن هناك لاعيبة ماتستحقش تلعب في الجرن.. وكفاية كل واحد يجيب جونين في الدوري يقولوا خدوه في المنتخب وكأن المنتخب ده "بيرمرم".. وسيبوا كوبر يشتغل ويكمل مشواره وأكيد هايعمل تغييرات وترميمات في الفريق وأولها عدم الاستعانة بلاعبين مثل طارق حامد وكوكا ومعهما أسامة نبيه.. أما الفرعون الصغير محمد صلاح ربنا يحميه صانع الفرحة والسعادة للمصريين.. والواد تريزيجيه القاطرة البشرية.. والحضري اللي أمه راضية عليه وهايبقي أكبر لاعب يشارك في المونديال.. ولا ننسي الجندي المجهول محمود فايز اللي شايبل كتير وفي هدوء.. ولا أنسي جميع رجال مديرية أمن الاسكندرية.. شيء رائع في التنظيم والتعامل مع الناس من أول مدير الأمن اللواء مصطفي نمر إلي أصغر مخبر.. وكفاية انتشارهم بالمنطقة وداخل المدرجات وتحيا مصر رغم أنف اللي كانوا عاوزينها تخسر الماتش ويشمتوا فينا كلنا.. ولكن ربنا خيب أملهم.. ودايما.. تحيا مصر. وعشان انتي حبيبتي يا مصر يا بنت الإيه.. هارجع معاكي كام يوم لما شفنا محمد أبوالعينين - مالك قناة صدي البلد - وهو ينفعل وينهض بتلقائية ودون أن يشعر حاملا علم مصر ويلوح به خلال مباركة البابا فرنسيس بابا الفاتيكان لرحلة العائلة المقدسة بمصر.. لم يفكر أبوالعينين في وضعه وشكله ولكن حب مصر يخرج في أي وقت من داخلنا.. وهذه لفتة تستحق التحية والتقدير لرجل أعمال مصري وطني حتي النخاع.. ويبدو ان الشاب أحمد أبوهشيمة.. مالك قنوات ON اللي بيحبوا بلدهم بجد.. وأبوهشيمة يدعم منتخبنا القومي كثيرا وبدون أن يعلم أحد. ** وتظل الشئون المعنوية عنوانا كبيرا كل المناسبات الأدبية والوطنية والاعلامية وأمس كانت الندوة التثقيفية علي أعلي مستوي ودائما للأمام. وكم كانت فرحته أول امبارح بصعودنا للمونديال وما قرره من مكافأة للاعبين كما أصدر أوامره بتغطية اعلامية متميزة وعشان كده لازم ندي كل واحد حقه. وسامحوني ماكنتش عاوز أبوظ فرحتنا بكاس العالم.. لكن مش هقدر استني للأسبوع الجاي.. فهناك فتنة اخوانية وقعت في ماسبيرو بسبب قرار مواعيد الحضور والانصراف.. احنا ما صدقنا الأمور تهدي والا يخرج علينا قرار اخواني في الضلمة يخلي الناس تنظم وقفات احتجاجية.. والغريبة كل الناس بتدور وتسأل عن حسين زين الذي يبدو أنه متأثر بما يكتب عنه علي الفيس.. وأهمس في أذنه.. خليك جامد وماتخافش!! ومن ماسبيرو إلي النادي الأهلي وما وصل إليه حال الأخ عماد وحيد أن يتطاول علي "نسيبه" المحترم الخلوق ابن الأصول خالد مرتجي والذي لم يرد وانسحب في هدوء لأنه ابن ناس ومتربي بجد.. وعشان كده الخطيب اختاره في قائمته التي تضم رموزا محترمة بمعني الكلمة.. وياريت محمود طاهر ياخدها من قصيرها ومايرشحش نفسه لأن المحيطين به يخسرونه الكثير بسبب تصرفاتهم.. وبعدين من امتي زملكاوي بيمشي رئيس الأهلي علي هواه.. بالذمة هو ده اللي عاوز يبقي رئيس الأهلي!! وعموما هانت يا بيبو.. وهاتيجي ان شاء الله.. عشان الجمعية العمومية فاقت لنفسها وعرفت من الأصلح!!
