جمهوريتنا

دولة الظرفاء العظمي

* الدهب عياره فلت
* بس سيبك انتي الواد اللي وزع 5 طن ملح في اسكندرية علي انهم سكر.. دا يستاهل جايزة نوبل لولاد الحرام.
* حتي لو الدولار رجع زي الأول.. حاسس ان فيه حاجة انكسرت ما بينا خلاص
* ياريت الدولار وهوا نازل ياخد كيس الزبالة معاه.
* حجم الدولارات المخزنة في بيوت المصريين يفوق 120 مليار دولار...
أحب أقولهم الدولار نزل واحتمال يبات بره.
* ابعتلي سلام قول أي كلام.. بس ما تسبش الورقة فاضية
* صاحب أغنية أديك في الجركن كان له رؤية مستقبلية.
. بداخلي شخصان..
واحد بيديني أمل إن حال البلد هايتصلح
والتاني قاعد بيضحك ع الأولادني وبيقوله أمل تعيش انت يا حاج.
* أخيرا تحققت أول مطالب ثورة 25 يناير "العدالة الاجتماعية" وكلنا هانشحت
* المشكلة اني يوم الفلانتين هاكون مشغول في الذكري السنوية التانية لسرقة جزمتي في الجامع.. مازلتي في القلب
* زيادة أسعار الماكياج 40%
يعني حضرتك هتستلم العروسة ع الطوب الأحمر وتشطب أنت
* من شوية كنت بأكل سوداني فلقيت مراتي جايبالي موز..
مش عارف أخد الموضوع بحسن نية ولا قصدها حاجة.
* ما حدش يعرف سباك كويس.. عشان الكيل طفح
* الحمد لله العملية نجحت بس المريض مات
* جلست والخوف بعينيها تتأمل فنجاني المقلوب
قالت حسبي الله ونعم الوكيل فيك دا أنا لسه ماسحة
* فرحة المصريين بصور مرات وبنت ترامب أكتر من فرحة ترامب بفوزه بالرئاسة الأمريكية.. شعب يعشق المزز.
* محدش يتعلق بيا عشان ضهري واجعني
* في واحدة بتظهرلي كل شوية في "أشخاص قد تعرفهم" لدرجة أنها بدأت توحشني
* عن حضن الراجل اللي كان قاعد جنبي ف القهوة بعد الجون التاني.. أخيرا حد احتواني
* السيدات المصريات يمتلكن تلت دهون العالم
* أسهل طريقة عشان تنسي واحدة بتحبها.. تتجوزها.
غير كده هتفضل تحبها
* الأماكن كلها مشتاقة لك
بجد
آه دا حتي الانتريه لسه سائل عليك امبارح
* كفاية قرارات تصب ف مصلحة المواطن.. المواطن مصلحته تعبت والله
* لو لقيتي راجل عنيه دمعت علشانك
اعرفي انك لو لفيتي الدنيا مش هتلاقي حد بيمثل احسن منه
إزالة المشاعر بالليزر
* وطبعا زي ما كلنا عارفين ان مصر أم الدنيا ولسه محدش عارف مين أبوالدنيا اللي سايب مراته تتمرمط المرمطة دي.
* للشكاوي والاقتراحات اخبط دماغك ف الحيط
* ما تزعلش لو روحت تشتري اللبس الشتوي و لقيت الأسعار في متناول المواطن تاجر المخدرات.. وافتكر أن أسعد لحظات حياتنا بنقضيها من غير هدوم.
* الحكومة الحالية لن ترفع "الدعم"
بل ستكتفي برفع "المواطن"
* المرة الوحيدة اللي ذاكرت فيها لبنتي يادوب ربع ساعة..
قعدت أقنع مراتي إن التعليم مش كل حاجة ومافيهاش حاجة لو بنتها ما تعلمتش والبنت ف الآخر لبيت عدلها
* أنا ليه اشتري جاكيت ب 900 ج؟!
لما ممكن ابرد واشتري علبة دوا ب 20ج
* هل تؤمن بوجود حياة أخري بعد الشغل والسواقة
* هي حلاوة الأيام فين؟
- بص عليها كده ف باب التلاجة
* عي الناس اللي بيبقي ف قلبهم حاجة ويبان علي وشهم حاجة تانية عسكها
بتعملوها إزاي دي يا ولاد اللذينا
* عزيزي الرجل..
دي راحت تشتري فستان. فعجبتها جزمة. فاشترت شنطة.. وتقولي عايز واحدة تفهمني.. مش لما هي تفهم نفسها الأول.
* حافظ علي اللي بيحبك.. خصوصا ان مفيش حاجة فيك تنحب.
* قالولي هان الود عليه.. قلت بركة يا جامع.
* يستفزونك حتي تأكل كل الأكل اللي قدامك ثم يقولون لك تخنت يا محمود
* نداء إنساني
واحدة فرحها كمان 15 يوم وناقصلها عريس فياريت نلملها ونجيبلها واحد.
محمود سعد فرغل
سوهاج
تعالي اشرب شاي بالياسمين
الشاي بالياسمين هيبرد يا جدع "تعالي اشرب شاي بالياسمين".. كررها الشاب بشكل هيستيري متكرر جالسا علي كرسيه أمام أحد المقاهي الفخمة. ملفوفا بسحابة كثيفة من دخان الشيشة المائل للزرقة. واضح عليه الخمول الشديد الناتج عن تعاطيه نوع ما من المخدرات.. لا يأبه بتحذيرات رجال الحي ا لذين هجموا لأول مرة علي المقاهي المجاورة. في غزوة قانونية تملأها حماستهم الفريدة لتنفيذ القانون.. تنتفخ أوداجهم بحمية شرف الواجب. ولا تخلو وجناتهم من حمرة الخجل.. لأسباب فنية. لا يعلمها إلا هم.. يحمل أحدهم مطرقة ضخمة. يسير بها كهرقل مزهوا أحيانا. وأحيان أخري يرمي عينيه نحو تراب الأرض إذا ما نظر فيهما أصحاب المقاهي... كسر بها واجهات جميع المقاهي المجاورة التي كلفت أصحابها عشرات ا لآلاف. خامات ومصنعية واكراميات تعمية عن عدم الترخيص والعمل سنوات دون رقيب علي "منيو" ولا أسعار ولا رخص.. زعق حامل المطرقة في الشاب ليتنحي جانبا حتي تتمكن مطرقته الجبارة من الانتقام من زجاج الواجهة غير المرخصة لسنوات. فلم يتحرك الشاب قيد انملة ولم يتكلف عناء انزال ساقه من فوق الأخري.. وهل لو حاول انزالها سينجح بعد أن خارت قوي جهازه العصبي.. الذي تخدر بفعل ما يحيط به من دخان و هلاوس وعبث رسمي؟!!.. تمتم محاولا رفع جفنيه الثقيلين: "تعالي اشرب شاي بالياسمين"..تدخل الناس لإقناع الشاب الوحيد في المقهي بالتنحي بعيدا وترك رجال الحي يأخذون حق الوطن والمواطنين من هذا المقهي المخالف للقانون. والذي تسبب مثيله في مقتل شاب. بعد مباراة مصر والكاميرون. أطلق الشاب نصف ضحكة مرة وأشار بيد متثاقلة للمطرقة العملاقة. التي هدمت زجاج الواجهة الخلفية بضربة واحدة. وتمتم مبتسما بكلمات سكيرة: هو شاكوش القاضي ده سرقته من فين؟! هات يا جدع شاكوش القاضي ده وتعالي اشرب الشاي بالياسمين بتاعك.
"إيليا عدلي عضو اتحاد كتاب مصر
الأقصر
حلة ضحك بالبطاطس بدون لحمة!
بحبك يا آبلة!
تلميذ لمدرسته: أنا بحبك يا آبلة.. وعاوز أتجوزك!
ردت عليه الآبلة: بس أنا ما بحبش الأولاد الصغيرين!
رد عليها التلميذ: وماله.. أنا مش مستعجل علي الأولاد..
زماره!
واحد بيقول لحبيبته: لما أزمرلك تنزلي علي طول
سألته ليه: مبروك.. انت جبت عربية؟
أجاب قائلا: لأ.. جبت زمارة!
غلاسة
واحد غلس قاعد في الطيارة جنب واحد لا يعرفه.. ولأنه اضطر إلي الذهاب للحمام.. ترك أكله..وعند عودته اتضح أن الرجل تناول أكله عن آخره.. وعندما سأله: لماذا تناولت أكلي.. رد عليه الغلس: أعملك إيه.. بصراحة.. افتكرتك نزلت!
حلم بلدياتنا
راجل بيقول لمراته: أنا حلمت بأن فيه شوية حرامية إتلموا عليا ونزلوا فيا ضرب علشان يسرقوني! رد عليه وقالت له: طب ليه.. ما قمتش من النوم؟ رد عليها: وليه عايزاهم يجولوا علي جبان!
ناصح جوي
واحد بيسأل صاحبه: هو الثعلب.. بيولد ولا بيبيض! رد وقال له: بصراحة جوي.. ده مكار ولا أضمنه!
اللعب بالقنبلة!
واحد من إياهم بيلعب بقنبلة.. ويقذفها من إيده اليمين والشمال وبالعكس.. لحقه صديقه: يا راجل توقف حالا.. هذه لعبة خطرة جدا.. وممكن القنبلة تنفجر في أي لحظة! أجابه قائلا: لا تقلق يا صديقي.. معايا واحدة تانية.
عندما يبرد البخيل!
سألوا واحد بخيل: ماذا تفعل إذا شعرت بالبرد؟
أجاب: اقترب من المدفأة!
فقالوا له: وإذا شعرت بالبرد أكثر
أجاب: اقترب من المدفأة أكثر!
ردوا عليه: وإذا شعرت بالبرد أكثر وأكثر وأكثر.
أجاب منفعلا: بالطبع.. سأضطر إلي إشعال المدفأة.
أرسل أحد الأباء لإبنه خطابا يحذره من الاسراف وكثرة الإستدانة وبأنه يتعجب كيف ينام وهو مثقل بالديون.. رد عليه الإبن قائلا: العجب الأكبر يا والدي هو كيف ينام الدائنون؟!
زكي مصطفي
يا أهل المفهومية
مراتي عباسية!!
"يا عالم يا شر كفاية قر"
مع بزوغ فجر يوم الخميس - يوم السوق العمومي للمدينة - استيقظ "هربيدو" من النوم بهيئته المعروفة وهو يدعو الله أن يجعل يومه سعيدا مباركا واسع الفضل كثير الخير- شحيح البخل - عظيم الإيراد - وأن يجعل هذا السوق أفضل من غيره حتي يعود لزوجته بما تطلبه من طلبات وما ترغب فيه من مأكولات وما تهوي إليه نفسه من أمنيات وحاجات وحتي ترضي عنه خاصة أن اليوم التالي يوم الجمعة يوم الأجازة الأسبوعية من ممارسة التسول ونادي علي زوجته "عباسية" قائلا: إنتي يا ولية بسرعة حضري بسرعة عدة الشغل وجهزي المطلوب أحسن أنا إتأخرت علي الشغل.
وعدة الشغل عبارة عن - ثوب مهلهل رث - وممزق وبالي ومتسخ وحذاء بلاستيك مقطوع من الجنبين وشراب كالح وذراع بلاستيك من الجبس يضع فيه يده اليسري علاوة علي ذقن طويلة هاشة وعمامة من قماش "الصبك البيج" وعكاز من شجر الكافور المتين.
وقالت له زوجته عباسية: إنت "ا هربيدو" مش هتغير ريقك بأي حاجة قبل ما تطلع الشغل.
قال هربيدو وإنتي عارفة إن أنا بفطر هنا يا وليية يا وش العطل قالت عباسية: "هربيدو" إعمل حسابك النهارده الخميس وبكره الجمعة وإنت عارف إن الليلة دي بتكون حصاد فيها زيادة شوية ولها حاجات خاصة علاوة علي إن تاني يوم عطلة رسمية من الشغل يا راجل.
قال "هربيدو" إدعي لي يا عباسية يجعل يومي أبيض والرزق واسع.
قالت: ربنا يحبب فيك خلقه يا حياتي وكل شيء حلو في دنيتي وعاوزاك تغير الكلام إلي بتقوله وانت نايم علي ضهرك وبتنادي علي إللي فايتين عليك لأن كلامك قديم والناس معدتش بتتأثر بيه.
"هربيدو" أنا والله بحضر شوية كلمات عاوز أقولهم للناس لأن الجنيه ما عتش له قيمة وخاصة بعد الدولار ما ركبه ودلدل رجليه.
عباسية: طيب سمعني هتقول إيه؟
هربيدو: يا فايت عليا وكلك حنيه.. العملة بتاعتنا عامت علي الميه وآه منه الدولار ابن المفترية أعمل ايه يا عالم ومراتي عباسية..
وقال ايه بيحسدوني في الرايحة والجاية.. وأنا اللي معايا يا حسرة مش ليا!!
محمد عبدالمطلب البهنساوي
سيدي سالم كفر الشيخ