أجمد صحاب

نظفنا الشقة واشترينا الحلويات و المشروبات واصطفينا جميعا فى انتظار العريس الذى رشحته لنا الحاجة (سعيدة) خاطبة مودرن تعمل لوجه الله ولتوفيق راسين فى الحلال، دق جرس الباب وكان بابا فى استقباله دخل أربعة شبان فى نفس العمر تقريبا وجلسوا دون أى كلام ،
دخلت علىَّ ماما فى المطبخ لقيتها واقفة تعد فى الضيوف، وفى الكوبيات ومحتاسة فى المطبخ مين كل دول يا ماما؟
والله يا بنتى مش عارفة الحاجة سعيدة ماقالتش إن عنده أخوات كتير كده
ماما هو مين فيهم العريس
- مش عارفة الحاجة سعيدة قالت إنه طويل ما هم كلهم طوال
يمكن الاسمر إللى قاعد جنب بابا
يمكن.. بس ممكن يكون المليان شوية إللى مكسوف ده هى قالت اسمه إيه
والله يا بنتى مش فاكره
على العموم سيبنى أحضر الشاى والجاتوه وإنتى بعد شويه اطلعى قلت فى سرى يا خبر النهارده بفلوس بعد شويه يبقى ببلاش، خرجت وسلمت على الموجودين فكرت شويه وأنا واقفة طيب حقعد فين وجنب مين ولما لقيت نفسى مكسوفة قعدت جنب بابا شويه ولقيتهم كلهم بيتكلموا فى موضوعات كتيرة مافيهاش سيرة الجواز قربت من ماما إللى جت وقدمت الشاى والجاتوه وإللى خلصوه قبل حتى ما تقعد وسألتها مين يا ماما العريس ردت والله يا بنتى مش عارفة أصول كانت الحاجة سعيدة تيجى معاهم بس استنى أنا حسألهم دلوقت بس حسأل أقول إيه؟ مين فيكم عايز يتجوز بنتى؟! استنى شويه يمكن يبدأوا فى الموضوع
ومرت ساعة ومافيش كلام جديد كل الكلام على الشغل والزحمة والأغانى ومباريات كرة القدم قلت فى نفسى طيب حد يكلمنى وفجأة سألنى واحد منهم هى الآنسة حتشتغل بعد الزواج ولا ناوية تبقى ست بيت قلت خلاص يبقى هو ده العريس ولسه حجاوب لقيت الثانى بيسأل
الحياة مشاركة ولازم الست تساعد الراجل مش كده ولا إيه؟ وقبل أن أرد لقيت الثالث بيسأل :
يا ترى الآنسة حتتحجب ولا مش ناوية
ولم أرد وانتظرت سؤال الرابع الذى قال المهم بتكون بتصلى بصيت لماما وبابا لقيتهم مستغربين ولقيت الدم غلى فى عروق بابا. وقررت ماما فى هذه اللحظة أن تحسم الموضوع أمال فين الست الوالدة؟ !
جاوب المليان شويه إللى كان مكسوف من أول القاعدة بصراحة هى تعبانة وملهاش فى طلوع السلالم وأنتوا فى الدور الخامس ولقيت واحد منهم بيقول أنا بقى ماما ميته بقالها 10 سنين بابا قال إيه ده هو أنتوا مش أخوات
جاوب واحد : لأ إحنا أصحاب وإللى جنبى ده صاحب صاحبى الأنتيم قال بابا بعصبية هو بيحاول يبص يمين وشمال علشان يجيبهم كلهم : هو مين فيكم العريس
ردوا فى صوت واحد العريس لسة ماجاش إحنا جينا الأول رد بابا : ومين أنتوا؟
إحنا أجمد صحاب ولازم نبقى مع صاحبنا فى كل الأوقات قلنا نيجى معاه بس السكة كانت زحمة وأحنا سبقناه وهو لسة فى الإشارة إللى على أول الشارع