* بصراحة وبدون زعل.. زملاؤنا بماسبيرو يستاهلوا اللي يجرالهم.. ويستحقون أن تقل بركة ربنا عليهم..لأنهم "غاويين" زمبليطه وهيصة يدفعهم لها الفاسدون.. مثلما يحدث مع الإعلامية الشجاعة "الجريئة" هويدا فتحي من وقفات احتجاجية التي نظمها بعض المضحوك عليهم بواسطة الفاسدين اللي بيضربوا ميزانيات البرامج ويهبشوا الملايين كل سنة والذين أعلنت هويدا الحرب عليهم من أول لحظة في القناة الثانية وفتحت ملفاتهم القذرة.. وللأسف يقف كبار المسئولين من أول وزيرة الإعلام ورئيس الاتحاد إلي رئيس التليفزيون وغيرهم يتفرجون في بلادة غريبة وهويدا تحارب لوحدها..وسوف ينصرها ربنا علي كل الفاسدين من كبيرهم لصغيرهم .. وبكره تشوفوا!! * مش قلتلكم الأخ ماسخ يوسف هاياخد علي قفاه من الجمهور..شوفوا التعليقات والشتيمة علي فيس بوك وتويتر.. وطالما المرعب مرتضي منصور دخل في الموضوع يبقي هانت وماسخ هايسيب mbc وهايروح علي بيتهم.. واللي يلاحظ إن جمهوره في المسرح بس اللي بيضحك علي إفيهاته الرخمه..ويكفي أن ضيفه الكوري أكثر احتراماً لمصر ولجمهوره ومش بلياتشو..!! * أما الأخ محمود سعد فقد أوشك علي الرحيل من النهار ومن الإعلام ومن ذاكرة الجمهور والتاريخ.. وخليه زي ماهوه فاكر نفسه جيفارا.. ويا "محموق" أفندي إللي يكره جيش وشرطة مصر بيعمل حاجات وحشه علي نفسه.. واللا إيه يالولو..!! * أحلي تعليق سمعته.. إن أحمد شوبير قعد مع محمد الأمين صاحب cbc عشر دقايق ونومه مغناطيسياً وبعدها بقي مذيع في القناة ..وللأسف "فات الميعاد".. الناس بتستني مدحت العدل برزانته وثقافته وكاريزمته .. وكذلك د.علي جمعة ومحمد علي خير..وأول مايظهر "شوشو" يقلبوا القناة بسرعة..وخللي طاهرأبو زيد معقدك في حياتك .. وبكره يبقي رئيس الأهلي وهايمنع أمثالك من دخوله منعاً لعكننة الأعضاء لما بيشوفوك..!! * زينة قالت للنيابة إنها اتجوزت أحمد عز شفوياً.. ياسلام وخلفت شفوياً برضه.. كان زمان الواحد متجوز ييجي 96 مرة شفوياً..ربنا يشفيكي يابنتي وبادعيلك تلاقي أبو العيال!! * مذيع في محطة "نغم" الإذاعية عمل حلقة عن "لامؤاخذه" أكبر مؤخره..مش هاقول حاجه وعاوز أشوف رد سعدعباس في موضوع "المؤخره" ده.. حاجه تقرف..!! * مني زكي: مع إني مش مقتنع بك كممثلة إلا أني أدعو لك بالشفاء من ميكروب المعدة عشان خاطر بنتك ..سلامتك..!! * صديقي حلمي بكر: بعد أن شاهدتك وزوجتك "شيماء" مع فيفي عبده.. دعوت لك بالصحة والعافية..وربنا يقويك.. مسئولية برضه!! * كان الله في عون المنتجين المحترمين ومايعانونه من نصب القنوات الفضائية التي لم تدفع لهم مستحقاتهم!!