أسئلة تلميذتي المحيرة

الباحث اللغوي

منذ بداية عملي وأنا دائما أعامل تلاميذي من منطلق نفسي فأستطيع أن اكسب ثقتهم فأكون منبع أسرارهم ومرجع مشكلاتهم والمستشار الذي يشير عليهم بما هو صالح ومفيد ولكني مع الأسف الشديد وقفت أمام رسالة طالبة جاءتني علي صفحتي علي الفيس بوك ولأول مرة أشعر بالعجز بل ويقشعر بدني وأنا اقرأ سطور هذه الرسالة وانا أعرضها علي الجميع ومن يري لها ردا فليأتني به لأسترد ثقة تلميذتي انا اعرضها عليكم بلغتها حتي لو خانتها الصحة اللغوية فالحرقة والغصة التي تملأها انستها كل قواعد اللغة ولن أعدل شيئا فيما كتبت وفي انتظار ردكم.
كتبت تلميذتي بعد امتحان الثانوية العامة:
ليست مشكلة أن في امتحان اللغة العربية للثانوية العامة جالهم سؤال ما جمع كلمة "وحي" وكمان ضعها في جملة مفيدة!!! ولا المشكلة أنه سأل ما هو عكس كلمة فجأة!!!
ولا المشكلة أن في واحد أخد ورقة الإجابة بتاعته وهرب من المدرسة
ولا المشكلة أن الأهالي قطعوا الطريق في أماكن كثيرة
ولا المشكلة أن الطلاب طلعت عملت مظاهرة في كذا مكان
ولا المشكلة أن الامتحان هو أسوأ امتحان عربي يمر علي الثانوية العامة في التاريخ
المشكلة أننا خلاص بقينا مصدقين أن الدرجة بتفرق وأن التعليم شيء أساسي في بلد ما فيهاش تعليم وإلا فمن يجيبني عن هذه التساؤلات؟
يعني إيه مقفل كمبيوتر ومش عارف حتي تسطب نسخة للجهاز بتاعك
يعني إيه مقفل فلسفة وأنت فاشل في الحوار مع الناس
يعني إيه مقفل علم نفس وأنت مش عارف إيه المضايقك ولا فاهم الناس
يعني إيه مقفل عربي وأنت أصلا فاشل إملاء وماتعرفش تنطق كلمتين فصحي صح!
يعني إيه مقفل إنجليزي ولما تيجي تشتغل لازم تكون واخد كورسات عشان الإنجليزي بتاع المدرسة ده ما يأكلش عيش
يعني إيه تقفل دين وأنت مبتركعهاش وماشي مع 9 بنات والكذب والسب علي لسانك 24 ساعة
يعني إيه مقفل جغرافيا وأنت هتستفيد إيه لما تعرف أن العراق فيها 33 مليون نخلة وأن استراليا عدد الخرفان فيها أكثر من سكانها بأضعاف.
يعني إيه مقفل فيزياء وتقف علي كوبري علي النيل مش عارف إنك لو نطيت هيحصل إيه بالضبط وتبقي عايش علي احتمالات لحد ما تشوف نطة في فيلم وتنط وأنت مش عارف انك المفروض تنزل ازاي بالظبط فتفاجأ أن مافيش عضمة في جسمك سليمة.
استفدت ايه من كل ما درسته لغاية دلوقتي في مصر؟؟
تفتكر الشغل اللي هتشتغله لما تكبر سيكون له علاقة بأي حاجة درستها
اسأل أي واحد متوظف في أي وظيفة جديدة إيه أول كلمة سمعها هايقولك قالولي أنسي بقي كل إللي انت درسته وإللي تعرفه عن الشغل ده وبدأوا يعلموه.
ده لو اشتغلت بالشهادة اللي انت اتخرجت بيها أصلا
بلد الشهادة فيها مجرد ورقة في برواز علي الحيطة عشان بابا وماما يتباهوا بيها لما ييجي ضيوف. أو تتجوز بيها لو كنت شاب دا لو أصلا عرفت طريق الجواز منين:
علامات استعجاب كتير حول التعليم دلوقتي مصلحة أي طالب النجاح وبس مع أني فيه شوية طلاب دماغهم فذة بس ما فيش حد بيسمع لهم لازم واسطة طيب أجيب واسطة منين ما عييش غير ربنا وربنا يصلح حال البلد دي من كل ضرر ليها.
عذرا بنيتي هزتني كلماتك العفوية واعترف بأنني قد عجزت عن الرد وقد تكون هذه هي المرة الأولي التي أخذلك فيها لأنه نظام مجتمع أخرج هذه المتناقضات وأملنا في الله أولاً وأخيراً.