ابنة شقيقة الراحلة صباح تنشر وصيتها

أكدت كلوديا عقل ابنة شقيقة الراحلة صباح، أن الشحرورة أوصتها بوصية لتبلغها لجمهورها بعد وفاتها.
وكتبت كلوديا عبر حسابها الخاص علي موقع "فيس بوك": "يا احباب الصبوحة، الصبوحة اليوم راجعة على ضيعتا عالأرض اللي حبّتا وحبّتا.. الصبوحة اليوم راحت عالسما عند الرب الكبير راحت عند اهلا واخوتا اللي اشتاقتلن كتير، صباح الحياة صباح الفرح صباح الابتسامة المشرقة دايما صباح الضحكة المرسومة بأصعب الاوقات، بتودعكن وبتقلكن ما تبكوا وما تزعلوا علي وهيدي وصيتي إلكن، قالتلي قوليلن يحطوا دبكة ويرقصوا بدي ياه يوم فرح مش يوم حزن، بدي ياهن دايما فرحانين بوجودي وبرحيلي متل ما كنت دايما فرّحن".
وتابعت: "وقالتلي قلكن انه بتحبكن كتير وانو ضلوا تذكروها وحبوها دايماً، يا احباب الصبوحة، الصبوحة ما عادت موجودة معنا بجسدها في هاللحظة، الساعة 3 فجر اليوم طلعت روحا الى الخالق وهي نايمة، حتى في رحيلها كانت هنية ومتل النسمة وما زعجت حدا ولا تعبت حدا، الصبوحة رحلت بالجسد بس رح تضل موجودة بقلوبنا الى الابد، رح نشتقلك كتير كتير كتير يا حبيبتنا، يا ريت كان بايدنا نعطيكي كل لحظة من عمرنا ونخليكي معنا اكتر واكتر، بس هاي ارادة ربنا .. منحبك صبوحة منحبك للأبد وما رح ننساكي ابداً ابداً، الله يرحمك يا صبوحة ويغفرلك وتكون نفسك بالسما مع الابرار والقديسين".
وكانت صباح قد فارقت عالمنا فجر اليوم عن عمر يناهز ال 87 عاما.