غضب إلكترونى بسبب تسمم طلاب الأزهر

"استمرار نفس قيادات جامعة الأزهر فى مواقعها منذ سنوات والإصرار على ترشيح نفس النوعيات من الذين لم يتحملوا مسئولية الأخطاء السابقة سيؤدى إلى تكرار كوارث المدينة الجامعية، هذا الفساد قديم ومشاكل طلاب المدن الجامعية الأزهرية تتكرر من سنوات والحال هو الحال".. جدارية كتبها الدكتور عصام العريان -نائب رئيس حزب الحرية والعدالة- تعليقا على حادث تسمم مئات الطلاب فى المدينة الجامعية بالأزهر، والذى فجر بركان غضب الطلاب مطالبين بمحاسبة المقصرين.
الوضع على "تويتر" لم يكن أهدأ حالا؛ حيث كتبت سالمة عماد: "بجد متعاطفة مع تسمم طلاب الأزهر اللى سايبين أهلهم وقراهم عشان يجوا يتعلموا وماحدش بيهتم بالأكل اللى بيقدمه لهم، التسمم عدى ال500 حالة".. فيما دخل المدونون فى سجالات حادة حول المسئول عن الحادث:
أبو آسر: أنا مقتنع أن رئيس جامعة الأزهر مسئول عن تسمم الطلبة بصراحة.. لكن مش شيخ الأزهر ولا وزير الأوقاف مثلا!
محمد سعيد: أغلب الناس اللى بتفتى فى موضوع تسمم طلاب الأزهر شايفين إنها مؤامرة لإقالة شيخ الأزهر عشان موضوع الصكوك طب والدود اللى اتصور وهو فى الأكل؟؟
ليلى مصطفى: الإهمال فى الأكل الخاص بالمدن الجامعية بالأزهر ازداد سوءا منذ تولى رئيس الجامعة الحالى، ولما كنا بنشتكى كان الرد من المسئولين إنتوا بتدلعوا ومعظم الناس اللى بتتكلم لم تسكن المدينة الجامعية وياريت كل واحد هو أدرى بما يحدث فى بيته وبلاش نحول الكلام إلى سياسة ومؤامرات.
محمد عبد الله: مطالب الطلاب ملهاش علاقة بشيخ الأزهر هما بيطالبوا شيخ الأزهر بإقالة رئيس الجامعة لأنه هو المسئول عن الفساد ده بلاش جنون السياسة يحمى فاسد فى منصبه.
محمد حسين: اليوم اللى المعارضة عينت فيه جورج إسحاق للدفاع عن الأزهر الطلبة حصلهم تسمم ربنا يشفيهم ويعافيهم.
جاسمين عزيز: مش أول مرة يحصل تسمم فى جامعة الأزهر دى كل سنة على فكرة بيحصل بس بيكون العدد قليل.
كشف حساب
إسلام المازنى كتب بدوره قائلا: "الوقف عن العمل للفريق المسئول عن تسمم الطلبة، حتى تصل لنتيجة تحدد المهملين هو أقل تصرف لأن هذه ليست أول شكوى، ووضع آلية رقابية جديدة وفاعلة فورا".
وغرد الكثير من الطلاب معبرين عن معاناتهم مع الوجبات الغذائية والخدمات التى تقدمها جامعة الأزهر:
على عمر: الطلاب أصلا من زمان بيشتكوا من الأطعمة اللى بتتقدم لهم وحصل تسمم قبل كده بس مكنش بالعدد الكبير ده.
هاجر جمال: ياريت تفتحوا موضوع الغذاء داخل المدين الجامعية لأن اللى حصل ف مدينة جامعة الأزهر ده مش حالة فردية.. أنا طالبة ف جامعة القاهرة وساكنة ف مدينة الرعاية للطالبات ببولاق الدكرور وكنا علمنا مظاهرات التيرم الأول احتجاجا على سوء الغذاء اللى بيتقدملنا (واللى جالى منه تسمم مرتين قبل كده أنا وكتير من زميلاتى) وعلى عدم وجود سيارة إسعاف والفساد اللى ف المدينة والنظافة وغيره وجالنا رئيس الجامعة ومدير المدن وكان رد فعلهم سلبى جدا.