"فيس بوك" يبتهل ل"مهند سمير".. و"تويتر" يطالب بالقصاص للشهداء

مع إطلالة عام 2013 انشغلت منصات التواصل الاجتماعى بالشاب مهند سمير الناشط فى حركة "6 إبريل"، الذى تلقى طلقة خرطوش فى رأسه فى أثناء وجوده بميدان التحرير؛ مما أدى إلى إصابته بإصابات بالغة فى المخ، وبات بين الحياة والموت.
غادة شهبندر عبر حسابها على "تويتر" كتبت قائلة: "لما تشوف حد بيقول مهند سمير اضرب خطأ، قول له دى مش إشاعة واحد اضرب خطأ.. ده مضروب فى راسه من قريب جدا".. آية عبد الله حاولت بدورها البحث عن القاتل: "الداخلية قالت إن صاحب مطعم هو اللى أطلق الخرطوش على مهند سمير وعرفته من رقم عربيته، فى نفس الوقت اللى الشهود قالوا فيه إن العربية مش مرقمة"..
ولم يغب مشاهير "تويتر" عن الحدث؛ حيث كتب الصحفى والإعلامى البارز أيمن الصياد: "الله أكبر.. الله أكبر، على من طغى وتجبر. لا أعرف مهند سمير (??عاما). ولا أعرف بالضبط ماذا حدث. ولكنى أعرف أن الله يمهل ولا يهمل.. الله أكبر".
اللافت أن الترقب والمتابعة المستمرة لحالة مهند وفرت أجواء من الشائعات سعى البعض لاستغلالها؛ مما دفع مصطفى ناجح للتعليق "يا شباب آخر كلام إن مهند عايش معانا وقادر يصمد ويصارع.. أرجوكم اصبروا فترة الملاحظة تعدى على خير ونشوف.. مش عايزين غير الدعوات".. بينما جاءت تغريدات "تويتر" على النحو التالى:
محمد العريان: أول خبر أعرفه فى 2013 إن مهند سمير فاق يا فرج الله.. يا رب ارحمه ورجع مهند لأمه بالسلامة.
مصرى قوى: اللى دعا للاعتصام وتركه وقاعد فى بيتهم بيتويت وسايب أطفال فى سن 18 و19 يحموا الاعتصام بأرواحهم يستحق المحاكمة.. قولوا كده لوالدة مهند سمير.
نرمين يسرى: هو فيه ناس داخلة تعيط وخلاص ليه؟ ماتبصوا كويس على الهاشتاج.. مهند سمير عايش وحالته مستقرة.. هيبقى كويس إن شاء الله.. دعواتكم!
دعوات للشفاء
وعبر جداريات "فيس بوك" كانت أكثر التعليقات فى شكل دعوات بالشفاء لمهند سمير، فيما حمل البعض الآخر فلول أمن الدولة وبعض رجالات النظام السابق الذين يسعون لإشعال نار الفتنة فى البلاد:
منار يوسف: ربنا يشفيه ويعافيه ويمده بموفور الصحة يا رب إنك على كل شىء قدير.
رشا أحمد: يا رب اشفيه وخفف آلامه وقومه بالسلامة وصبر قلب أمه، آمييييين يا رب العالمين.
إيثار خميس: أرجوكم لو حد صاحى.. اتوضى وصلى ركعتين واخلص النية لله وادعى لمهند 10 دقايق من وقتك، ممكن تنقذ حياته، اعتبره أخوك ومحتاج لدعواتك وصلاتك، اللهم إن كل السبل تقطعت بنا إلا سبيلك، يا رب اشفيه بمعجزة يا رب فأنت على كل شىء قدير.
حسام عوض: يا رب اشفيه، أنا متأكد إن هناك حملة ممنهجة لتصفية الثوار، ابحث عن فلول أمن الدولة.
عتاب محمد: يا رب تيجى السنة دى بحق الشهيد وتحقق حلمه فى وطن.
كرم أنور: لسه كنت فى التحرير فى بنك بجانب مسجد عمر مكرم.. بجد كنت هبكى هو ده الميدان اللى فجر الثورة روحو شوفوه المناظر اللى ماسكة الميدان وبتتحكم فيه يا عينى عليكى يا مصر.
حمدى نصر: طبعا هتقولوا الطرف التالت. بس شوفوا حل المشكلة دى إزاى، إن الميدان ينضف من اللى فيه وكمان الخيام ويرجع زى مكان، بحيث تفوتوا الفرصة على الطرف التالت كما يقال.