أنا محضرتش المظاهرة من أولها. أنا وصلت المظاهرة الساعة 3:30. كانت المسيرة فى عباس العقاد فى ميدان البطراوى وكان الناس قاعدين يريحوا ويصلوا العصر. بعد الصلاة اجتمع الناس يهتفوا وكان كل شىء ممتاز. الهتاف كان عالى ومالى الميدان. بعد حوالى 10 دقائق من الهتاف ظهرت عربية شرطة (عربية نقل زرقاء متقفلة شبه عربية الأمن المركزى). استغربت إيه اللى جابها جوه المظاهرة. خصوصا أن أعلام المظاهرة مرفوعة وهو جاى من اتجاه إنبى يعنى جاى من مكان مرتفع عن المكان اللى فيه المظاهرة. والمفروض يكون شافها وهو نازل من آخر الشارع. فجأة بدأ حدف الطوب (مش عارف ليه, هل عشان حصل حاجة من العربية ولا علشان كره الناس فى الشرطة) العربية جريت جامد والناس وراها. العربية وقفت مرة واحدة.
(برده مش عارف ليه, الطريق وقف أدامها ولا الناس هما اللى وقفوها) وبدأ بعض الناس يتحركوا ناحية عربية الشرطة وناس تقولهم متروحوش. أنا مرضتش أروح هناك. بعد خمس دقائق قربت شوية من العربية عرفت أنها عربية ترحيلات وفى ناس جواها.
شوفت مجموعة من الناس عاملين طوق حوالين العربية علشان يحموها وبيقولوا للناس تبعد عن العربية. العربية سليمة ومافتحوش للى كانوا جواها. بعدت عنها ورجعت مكانى. بعد خمس دقائق بدأت المسيرة تتحرك وتسيب الميدان علشان الناس تمشى بعيد عن العربية. وهنا بدأ هجوم الشرطة حوالى الساعة 4:20 فى زى ميرى ومدنى. بسلاح آلى ومسدسات. ضرب رصاص بشكل كثيف.
كنت أنا سيبت الميدان ومشيت مع المسيرة. رجعت تانى للميدان أساعد الناس إنها تمشى وأشاور للشرطة علشان تقف. الشرطة بقت عند العربية اطمنوا عليها وعرفوا إنها ماتفتحتش ولا اتحرقت. كان الميدان بقى فاضى إلا من بعض الناس على الأطراف شوية ستات مايعرفوش يمشوا بسرعة وكام شاب. فى الوقت ده كنت أنا بشاور للناس يمشوا وببص حواليا لو حد عايز مساعدة.
الشرطة هجمت على الناس تانى, ماجرتش منهم, لسبب ما عدوا من حواليا وبدءوا يقبضوا على الناس اللى ورايا. واحد من الشرطة عاوز يقبض على شاب وهو بيقاوم, بتاع الشرطة بيهدده إنه هيضربه بالسلاح اللى فى إيده. واحد تانى ماسك ست منتقبة بطريقة مهينة, باين من طريقة مشيها إنها كبيرة فى السن حاولت أكلمه إنه يتركها شاورلى بسلاحه وقالى فيما معناه مالكش دعوة.
شوفت شاب واقع على الأرض على جانبه الشرطة بتعدى من حواليه ولا أكنه موجود. روحت ناحيته أكلمه, ماردش عليا. افتكرته فاقد الوعى, لإن ماكنش فيه دم حواليه وكانت إيده مغطية صدره وعلى ظهره شنطة. قلعته الشنطة وبدأت ألاحظ الدم. عدلته على ظهره وشفت الإصابة فى صدره. يا الله أعمل إيه. عمال أكلمه مايردش عليا. جه واحد تانى شكله مش شرطة سند راسه على شنطته. وبدأت أطلب فى الإسعاف, مش عارف أوصلهم. فى الوقت ده كان حوالينا شرطة كتير ومفيش غيرى أنا وواحد كمان مع الشهيد.
واحد من الشرطة عدى جنبنا سأل: خدله رصاصة؟ رد الشخص اللى معايا: أيوه. بتاع الشرطة: يستاهل. رد: ده مات. بتاع الشرطة: كلب ولا يسوى, دول كانوا هيموتوا الناس اللى هناك (وبيشاور ناحية عربية الترحيلات). صرخت فيه: العربية محصلهاش حاجة وانتوا شفتوا. شوح بيده ووجهه وسابنا ومشى. خدت موبيل بلال (عرفت اسم الشهيد بإذن الله بعد كده من الإنترنت) من جيبه ودورت على رقم حد من قرايبه. فى الوقت ده الشرطة كانت بترجع ناحية عربية الترحيلات وبعض الناس من المسيرة رجعت الميدان. واحد من الناس بيقول: ده مات. رديت: ماتقولش مات إنت ماتعرفش إن شاء الله يبقى كويس. الناس قالوا: خدوه من هنا بسرعة. لو سبناه مع الشرطة مش هنعرف نجيبه تانى. خدوا بلال وجروا بيه. رجعت أدور فى موبيل بلال, لقيت رقم والد بلال كلمته قولتله: ابنك اتصاب فى مسيرة فى عباس العقاد. والد بلال: اتصاب فين فى جسمه. حاولت أهرب من الإجابة. والد بلال: هو فين دلوقتى. رديت: مش عارف بس أقرب مستشفى التأمين الصحى, أنا هروح هناك أشوفه. ممكن نتقابل هناك. روحت مستشفى التأمين مالقتش بلال هناك. كلمت والد بلال تانى وقابلته. إديته الموبيل وقلتله إن بلال مش جوه. قال لى: مكتوب على الفيس بوك إن بلال استشهد. رديت: إن شاء الله يكون كويس. قال لى: ممكن يكون فين. رديت: ممكن يكون فى مستشفى اليوم الواحد. والد بلال جاله تليفون وقالى لازم أروح البيت عشان والدة بلال. رديت: هروح المستشفى وهبلغك. روحت مستشفى اليوم الواحد مالقتش بلال هناك. كلمت والد بلال قالى: بلال روح البيت. فهمت إنه استشهد. قفلت وأنا مش عارف أعمل إيه. عايز أصرخ فى الناس اللى حواليا. إنتوا إزاى ماشيين فى الشوارع عادى, فى روح أزهقت بلا ذنب من مجموعة كلاب.
(آه ه ه ه ه يا أخى فى الله والوطن. رحمة الله عليك يا بلال. ربنا يتقبلك. وينزلك منزلة الشهداء). روحت بيتى. إيدى عليها دم الشهيد. الخونة قتلوه. كلاب بسلاح بيقتلوا ولادك يا مصر. الظلم والجبروت مالوش حدود. الكلاب عايشين وهيروحوا بيوتهوم لأهاليهم. وشبابك دمهم بيتهدر كل يوم. آه ه ه ه يا بلد.
غسلت إيدى من دم بلال قبل ما أشيل ابنى الرضيع فى حضنى. كل لما أشوفه بيضحك أفتكر كلاب الداخلية وهما بيضربونا بالرصاص. وأفتكر إن ابنى ممكن يكون مكان بلال.
آه ه ه ه (ألا لعنة الله على الظالمين).
كل لما افتكر الدم يغلى فى دماغى, الظلم باين والناس عاملة نفسها مش شايفة. لازم نعمل حاجة. مش عارف إيه.
نهاية ماقدرش أقول إلا ربنا يرحمك يا بلال ويتقبلك من الشهداء إن شاء الله. قتلوك غدر. إن شاء الله ربنا يقدرنا نجيب حقك. ولو ماقدرناش مفيش حق بيضيع, رب العباد لا يظلم مثقال ذرة. حقك راجع راجع. ربنا يصبر أهلك وأهل كل شهيد. حسبى الله ونعم الوكيل.