تخيلوا معانا كده، محمد صلاح مشكلته ماتحلتش.. قرر يرجع مصر لأي سبب من الأسباب، عايز يلعب مع المنتخب مثلا في ماتش في تصفيات أمم إفريقيا، أو حب ياخد أجازة ويزور العيلة. الجيش هيقول لمحمد أوراقك فين؟ هيطلعها وهو بيترعش.. وهوب، الضابط هيكتشف إن صلاح أوراقه مش سليمة ومطلوب تجنيده. المشكلة إن صلاح كان مقدم في معهد، والمعهد لقاه مش بيحضر فشطبه.. وبالتالي بقى اللاعيب مطلوب للتجنيد. بس طبعا لأنه لاعيب كبير، صلاح مش هيروح وحدة عسكرية عادية يخدم فيها.. لأ، هيتظبط ويلعب في طلائع الجيش! مورينيو صحيح هيتجنن اكتر ما هو مجنون، ومش هيبقى فاهم فعليا إيه اللي بيحصل ده.. بس احنا كمصريين مش هنتفاجئ أوي، ما هي مش أول مرة تحصل! عندنا عبد الستار صبري اللي مكنش مسوي ورقه، واتقفش في المطار واتحول لطلائع الجيش.. وأيمن حفني كمان، ومعاهم أيمن عبد العزيز اللي فضل هربان برة مصر لحد ما عدا ال30. صلاح هيلعب مع الجيش لفترة، لحد ما تظلم تشيلسي يوصل للفيفا والاتحاد الدولي طبعا هيصدر قراره بإيقاف اللاعب اللي عنده 22 سنة لأنه يعتبر فسخ عقده مع البلوز من طرف واحد. لكن عادي، الجيش هيحول القضية للمحكمة الرياضية، وياخد بطاقة دولية مؤقتة للواد محمد صلاح ويكمل بيه الدوري 3-4 سنين، اشمعنى عصام الحضري يعني لعب مع سيون. غالبا مستوى صلاح مع الجيش هيكون مبهر، وبعد كم سنة سيادة المستشار هيحاول يضم النجم اللي عنده 26 سنة للفريق ويعلي على الأهلي ويكسب الصفقة. بس محدش يخاف على صلاح، بعد سنتين بس اللاعيب اللي عنده 28 سنة هيكتشف إنه مش هياخد مستحقاته من الزمالك، وهيفسخ عقده بعد ما يقدم شكوى لاتحاد الكورة، ما هو يعني مش أخيب من حسين ياسر المحمدي. صلاح هيرجع للاحتراف تاني، بس من بوابة ليرس بقى، ولما يتم 30 سنة هيزهق من أوروبا، ويقول كفاية بقى، بلدي أولى بيا. والنجم اللي كان في تشيلسي وهو عنده 22 سنة، هيرجع إنبي وهو عنده 31.. أهو نادي محترم، وعلى الأقل بيدفع فلوس كويسة وبيديك كوبونات بنزين على رأي برنامج فهمي جمعة. ملحوظة.. الموضوع مكتوب باللغة العامية، لأن الأمر مصري بحت ولا يحدث خارج حدود المحروسة.
