أدمن "الشرطة المصرية": اعتذار مالك وشادي غير مقبول "أنت ما دوستش على رجلي"

علق النقيب ماجد، أدمن صفحة "الشرطة المصرية" على "فيس بوك"، على الفيديو المسيئ للشرطة من قبل شادي أبوزيد، وأحمد مالك، من خلال مقطع فيديو.
وقال النقيب ماجد، "ما قام به الأخ شادي ووزعه على العساكر اللي هما مش فاهمين.. إحنا مش واقفين في الشارع عشان نلعب، إحنا واقفين عشان نشتغل ونحميك ونحمي غيرك، لكن شادي يقصد بما فعله مدلوله المهين بإهانة رمز البدلة والشرطة، وهذا غير مقبول".
وأضاف، عندما كتبنا عبر الصفحة "إحنا مش هناخد حقنا بالقانون إحنا هناخده بطرق تانية، لم نقصد بها هنجيبك أو نقتلك زي ما المحامي بتاعك قال، لا والله، إحنا كنا نقصد إن إحنا هنزل بوستات كتير ونعترض بطرق أخرى غير القانون زي الصحافة والإعلام أو أي وسيلة تجيب لنا حقنا؛ لإننا مش بلطجية مش هنمشي ندور عليك ونقتلك أنت أو أحمد مالك، إحنا برضه ولادنا بيموتوا صغيرين عشان البلد دي بيفدوا عنيهم وحياتهم، وفي الآخر تفضل تضحك وتتريق علينا".
ورفض النقيب اعتذار مالك وأبوزيد، قائلا: "الاعتذار غير مقبول وفيه قانون بيجيب حقنا، القانون هو الفيصل بينا.. الاعتذار غير مقبول أنت ما دوستش على رجلي عشان تقولي أنا آسف أنت قمت بإهانتي وإهانة شهدائي وبلدي، أنا مش بمثل أنا محروق أوي من ساعة ما شفت الفيديو إحنا مش مجال للتريقة، إحنا شباب وظباط بتموت عشان البلد دي تعيش، مش فضل مننا ده واجبنا وفخورين بيه، وهنفضل نعمله حتى لو ألف زيك عملوه.. اللهم بلغت اللهم فاشهد".