البنات فى مجتمعى دايماً منتقَدة، دايماً غلطانة، دايماً هى السبب فى كل حاجة وحشة.. نفسى أسألكم حد فيكم جرّب يحط نفسه مكان البنت دى ويفكر هيا ممكن تكون بتحس إزاى؟
البنت اللى بتحط ماكياج كتير وبتبالغ فى رسم عينيها وحواجبها وشفايفها، حد فكّر إنها ممكن تكون حاسة إنها مش جميلة، وتكون بتبالغ فى تجميل نفسها زى ما المجتمع بالغ فى وصفها بأنها «غير جميلة»؟!
البنت اللى بتركّب شعر صناعى طويل، حد فكّر إنها ممكن تكون طول عمرها كانت بتحلم بشعر طويل بس طبيعة شعرها مساعدتهاش؟!!
البنت اللى قلعت الحجاب وقررت ترجع تروح للكوافير وتهتم بشعرها، حد فكّر إنه ممكن يكون اتفرض عليها غصب عنها، حد حط نفسه مكانها وهيا مضطرة كل يوم تلبس حاجة هيا مش عاوزاها، حد حس بيها وهيا شايفة قدامها بنت جميله بشعرها وبتحلم أنها هيا كمان تبقى حلوة زيها؟!!
البنت اللى كل شوية تتصور وتحط صورها ع«الفيس»، حد فكّر إنها ممكن تكون بتوثق اللحظات اللى فرحت فيها لأنها خايفة من بكرة ومش عارفة مصير سعادتها دى إيه؟!
الست اللى كل شوية تحط صور ولادها وعيد ميلادهم ونجاحهم وفسحهم، حد فكر إنها ممكن تكون حاسة إن الحاجة الوحيدة اللى طلعت بيها من الدنيا هيا ولادها، حد فكر إنها ممكن تكون بتصبّر نفسها على عيشة مرّة مع شخص قاسى أو بخيل أو خاين وبتقنع نفسها إن فيه حد يستاهل تضحيتها؟!
الست اللى فجأة حطت صورتها هيا وجوزها بروفايل، حد فكّر إن ده ممكن يكون بعد فترة كبيرة من الخصام والمشاكل، حد فكر إنها ممكن تكون بتوصل لحد معين عاوز يوقّع بينهم إنه لسه بيحبها وميقدرش يعيش من غيرها؟!
البنت اللى بتشرب سجاير أو شيشة، حد فكّر إن دى الطريقة الوحيدة اللى بتنفس بيها عن همومها، حد فكّر إنها ممكن تكون قررت تضر نفسها وتتعلم عادة سيئة ومضرة بس عشان تقنع نفسها إنها حرّة؟!
البنت اللى بتلبس اللى عالحبل فى أى فرح تروحه، وبتقعد تضحك بصوت عالى وترقص عشان تلفت نظر الشباب، حد فكر إنها ممكن تكون هتتجنن وتطلع من الفرح بعريس عشان الناس مش راحمينها وكل شوية يقولولها هنفرح بيكى إمتى.. حد تخيّل إن خطيبها الأولانى سابها وخطب صاحبتها وهيا نفسها تغيظه بواحد أحسن منه؟!
البنت اللى كل يوم تخرج من قصة حب وتدخل فى واحدة جديدة، حد فكّر إنها بتدور عالحب لأنها عمرها ما حست إن حد حبها بجد، ونفسها تحس إنها بتتحب بجد؟!
البنت اللى بتتساهل مع الناس فى معاملتها عشان متخسرش وظيفتها، حد عذرها وقال أكيد وراها هموم ومشاكل أكبر بكتير من احترامها لذاتها، حد حط نفسه مكانها لو ثارت لكرامتها وسابت الشغل هتصرف منين لحد ما تلاقى شغل تانى ده إذا لقت أساساً؟!
بنت الليل اللى بتلبس مكشوف وبتصاحب الرجال الأثرياء وبتسهر معاهم وبتبيع لهم المتعة، حد فكّر يبص فى وشها ويشوفها بتعمل ده وهيا مبسوطة ولا وهيا مضطرّة، حد فكّر هيا ممكن تكون محتاجة فلوس قد إيه وعشان مين؟!
يا سادة.. كفوا ألسنتكم وأيديكم عن النساء، مفيش بنت اختارت تبقى مبتذلة أو رخيصة إلا لأن المجتمع جعلها ضحية، مفيش امرأة قبلت أن تكون سلعة بمقابل إلا لأنها وجدت أنها تعامَل كسلعة بدون مقابل، مفيش بنت لبست لبس مكشوف أو حطت ماكياج كتير أو بالغت فى أى شىء إلا طمعاً منها بس إنها تكون حلوة وتلفت نظر حد يقول لها انتِ أجمل بنت فى الدنيا. الستات بجد مساكين قوى فى مجتمعنا ده، دايماً مطلوب منهم الشىء وعكسه، مطلوب منها تكون أجمل من نانسى عجرم بس من غير ولا عملية تجميل، وتكون أكثر إثارة من هيفاء وهبى من غير ما تلبس أى لبس مثير، وتكون رقيقة أكتر من شادية من غير ما تتدلع عشان دى اسمها قلة أدب، وفى نفس الوقت تكون متعلمة وناجحة وبتشتغل عشان تجيب فلوس ومتكونش عبء على حد، وفى نفس ذات الوقت تكون ملتزمة وبترجع البيت فى ميعاد محدد وبتلبس حشمة ومبتكلمش رجالة عشان ابن الحلال لما ييجى يلاقى كل حاجة مزيكا على كيف كيفه!!
قبل ما تجلدوا البنات والستات حاولوا تتعلموا ثقافة التماس الأعذار، حاولوا تتعلموا تستعملوا إنسانيتكم وفطرتكم فى التسامح والمحبة، حاولوا دايماً تقدّروا مواقف الناس وتحطوا نفسكم مكانهم وتحاولوا تعرفوا إيه وصّلهم لكده، تنازلوا شوية عن أدوار الآلهة اللى نصّبتم نفسكم فيها وقررتم تحاكموا الناس وتحاسبوهم لأن الله لا يظلم أحداً.