كمال أبورية ل"الوطن": "بهجة رمضان قلت لأن الناس بتعاني اقتصاديا"

أبورية: كنا بنستنى المدفع والأذان على سلم قريتي الخشب في دمياط.. ومنساش الجو الرمضاني في الأزهر والحسين

بأداء راق ووجه مألوف، أطل على المشاهدين عبر الشاشة الصغيرة، لمع في التليفزيون منذ بدايته في منتصف الثمانينات وحتى الآن، وقدم عددا من المسلسلات المميزة، فهو "سيد العايق" في "سوق العصر"، والمفكر العظيم "قاسم أمين" والشاعر "أحمد رامي" في "أم كلثوم"، وغيرها من الأعمال الدرامية التي عرفه المشاهد من خلالها، هو كمال أبورية "الفنان الإنسان" كما لقبه البعض.
ويروي كمال أبورية ل "الوطن"، ذكرياته المرتبطة بشهر رمضان، قائلًا: "أحلى أيام رمضان قضتها أيام ما كنت لسا في دمياط في قريتي (كفر سعد البلد)، كنا بقعد أنا وأصحابي واحنا صغيرين على سلالم مدخل القرية الخشب، نستنى آذان المغرب، وأول ما مدفع الإفطار يضرب والجامع يأذن نجري على بيوتنا فرحانين إننا هنفطر".
ويضيف أبورية، "لما جيت القاهرة بعد كده كنت مستغرب الوضع في رمضان في البداية، لحد ما اتعودت بعد كده، وفي رمضان كنت بروح مطاعم الأزهر والحسين والسيدة زينب، كنت بحس في الأماكن دي بجو رمضاني جميل ميتوصفش".
ويتابع أبورية ل "الوطن": "رمضان دلوقتي اختلف كتير عن زمان، دلوقتي بقى فيه فرق توقيت الآذان في الجوامع، بنشوف جامع بيأذن وبعده بنص دقيقة يأذن جامع تاني في نفس المنطقة، واختلاف توقيت الآذان ده حاجة مش كويسة، كمان الناس زمان كانت حياتها أبسط وأرخص وكانوا بيودوا بعض أكثر من دلوقتي، لكن من فترة والناس بتعاني اقتصاديًا من قبل حتى ثورة 25 يناير والناس بتعاني، والمظاهر الرمضانية تأثرت كتير والأسر المصرية بقت بتحاول تخفض من نفقاتها يعني مبقاش فيه عزومات ولا خروجات زي الأول، والبهجة المرتبطة برمضان كمان قلت كتير لأن حياة الناس وأخلاقهم مرتبطة بالشكل الاقتصادي".
وعن أول أعماله التي قدمها في شهر رمضان يقول أبورية: "أول مسلسل اتعرض ليا في رمضان كان (بين القصرين) تأليف الكاتب الكبير نجيب محفوظ، وكان معانا عدد كبير من النجوم زي محمود مرسي وهدى سلطان ومعالي زايد وصلاح السعدني".
ويتابع الفنان كمال أبورية، "اضطرينا نفطر بعض الأيام في رمضان لما كنا بنصور مشاهد بالنهار، وافتكر إن أول وتاني يوم في رمضان كنا بناخده إجازة، وكل فريق العمل مبيشتغلش عشان كل واحد يفطر مع أسرته".
وعن الأطعمة التي يفضلها على مائدة رمضان يقول أبورية: "بحب جدا الشوربة بأنواعها، المهم تكون سخنة زي شوربة الخضار، وبحب الأرز بالشعيرية والفراخ، والتمر بحب أبدأ بيه وأكسر بيه صيامي مع الآذان، وبحب أوي اللبن الرايب مع التمر".
ويضيف أبورية: "ممكن أفطر بعض الأيام في رمضان مع أصدقائي من الوسط الفني، زي الفنان يوسف شعبان ومحمود الجندي، مقدرش بصراحة أرفض دعوتهم".
ويختتم أبورية حديثه ل "الوطن": "بهني المصريين بشهر رمضان وبقولهم ربنا يسعدكم ويقويكم ويكون شهر وشه خير عليكم، وتعيدوا وانتم مبسوطين وإن شاء الله بلدنا هتبقى حلوة وإحنا ماشيين في الطريق السليم عشان نوصل لوضع يليق بمكانة وحجم مصر".