*تشرب لك كاس؟

تشرب لك كاس؟
من وجع الدنيا ويأس الناس
أو كاس م الفرحة المجروحة
متحاوط بعيون الحُراس
مانعين الفرحة تعدى حدود
البسمة الباردة المكسورة
ويخافوا لتاخُد لو صورة
تضحك فيها..
تشرب لك حبة وبعديها
تسكَر وتتوه مع عزف الناى
وتفكر ف الحلم ال«مش» جاى
تنتابك نشوة خدَاعة
وتفوت ساعة
والحلم هناك ع الشماعة
خايف م الموت
مستنيك تيجى تقول ازاى
الحلم صبح مكتوم الصوت
والوقت يدور
وانت ف سُكرك منتشى مكسور
اليأس سماك والحلم مداس
تشرب لك كاس
من غدر الدنيا ووجع الناس؟!