إلى وزير «مش» التربية والتعليم

سيادة الوزير.. أخبار المدارس إيه يافندم؟ لسه مستر «يامى» بتاع العايبى موجود؟ طب وميس «صماح» بتاعة «الأنجليظى» متوفرة؟ طب تمام.. طب لسه المجموعات المدرسية بتتاخد إجبارى مقابل درجات أعمال السنة؟ طب الحمد لله! لسه يافندم بتقوّموا الطالب «المسيحى» من جمب صاحبه «المسلم» عشان تدخل مدرّسة الدين تدى للطلبة مثال عن الدين الوسطى الجميل فتلسوعهم بالمسطرة الحديد عشان كان صوتهم واطى وهم بيقولوا «وعليكم السلااام ورحمة اللهى وبركاتووووه»؟
سيادة الوزير.. أخبار المناهج إيه؟ لسه زى ما هىّ؟ لسه فيها «اذكر أسماء حبات الرملة اللى يمين وشمال الصخور المتحولة والمتشخلعة؟».. لسه فيه «اذكر أسماء جميع أدوية الإسهال التى تناولها نابليون أثناء الحملة الفرنسية؟ مع الاختيار مما بين القوسين عن سبب إصابته بالإسهال: (وجبة دينر بوكس من كنتاكى- فخفخينا فرغلى- عين الولية أم بيير)».. طب يافندم المناهج لسه فيها «سمع 670 بيت شعر للمتنبى؟»، و«اذكر اسم الدلع الخاص ب(خزاعة بن عبدالمجيد بن وائل المتشنكح)؟».. لسه يافندم التاريخ بتاعنا بيدرسوا فيه «اذكر أسماء الناس اللى كانت واقفة قدام أون زا ران أثناء فتح عكا؟».. لسه برضو متوفر فى المنهج «اذكر أسماء الكفار اللى كانوا فى يثرب مع توضيح لون حواجبهم وهل همّ عاملين شعرهم كيرتاين أم هو ناعم طبيعى؟».
يافندم المناهج اللى بتتدرس فى المدارس الحكومية والخاصة هتصيب الطلبة ب«استبحس»؛ أرجوك يافندم حاول تنقذهم.. حاول.
اتغير ميت ألف وزير تربية وتعليم ولسه منظومة التعليم بتكح تراب زى ما هىّ.. كل اللى بيتغير هو الاسم اللى محطوط على مكتب سيادة الوزير وديكورات مكتبه.. وآااه عشان مبقاش مفترية نسيت حاجة من اللى بتتغير وهى الكرسى الجلد اللى بيلف بيتغير برضو!
سيادة الوزير.. إمتى حضرتك هتوفر مناهج تنمى ذكاء الطالب.. مناهج زى اللى بيدرسوها طلاب المدارس الإنترناشيونال.. إمتى هتوفر مدرسين إنجليزى مش سكة «ميس ميرفت».. إمتى هتخلينا نقدم لولادنا فى مدارس بلدنا.. إمتى هتطور يافندم؟
لو الرد هيبقى ميزانية ف«آسفة جداً!» أنا مبكلمكش فى تطوير مبانى وفصول دلوقتى ولا بكلمك إنك توفر بيسين وملعب جولف فى كل مدرسة حكومية.. ولا بكلمك إنك تركب تكييفات فى الفصول لأنها أساساً مش فصول!.. أنا بكلمك على منهج.. على علم.. العلم هيكلف الوزارة فلوس كتير يافندم ولا إيه؟
سيادة الوزير.. الوزارة هتخسر إيه لو لجأت لأساتذة محترفين وحطوا مناهج معتمدة على الفهم مش الحفظ.. يافندم مصر عندها طاقات سواء علماء أو دكاترة جامعة مستعدين يساهموا فى تطوير المناهج بس حضرتك استدعيهم.. أرجوك يافندم قرر تغير.. سؤال طيب هو حضرتك إيه إنجازات الوزارة؟ بتتصدر الورقة الأولى من جرنال الجمهورية بأسماء أوائل الثانوية العامة متباهين بإنهم خريجى مدارس حكومية! هم أوائل آه، بس فى الحفظ.. وكأن الشطارة بقت تتقاس بسعة الذاكرة! ده على كدة «الأيفون ال64 جيجا» طلع دكتور وأنا مش عارفة! يافندم أرجوك اعتق الطلاب!
يا سيادة الوزير.. أتمنى إن متكنش متبنى مبدأ إن اللى مش عاجبة مدارس الدولة يتفضل يروح المدارس «الإنترناشيونال» لأن أكيد حضرتك عارف إن مش كل الناس هتقدر تعلم ولادها فى المدارس اللى بالإسترلينى!
سيادة الوزير.. حاول تنقذ الطلاب من ميس نجوى اللى بتضربهم، ومن الميت ألف كتاب اللى قاطمين ضهرهم ومن مستر عوض بتاع البى التقيلة! عارفة إن الكلام مع المؤسسات هالك! وعارفة إن الأسئلة المقالية وسمع هتفضل مستمرة! وعارفة إن كلامى هيتحلقله زيرو! بس برضو هقوله.. وهفضل أقوله لحد ما المناهج تتغير.. ولحد ما الوزارة فعلاً تستحق لقب وزارة «التربية والتعليم».. تحياتى يا سيادة الوزير.