اتغزلوا فيها

اِتغَزِّلوا فيها
قولوا الكلام الحلو
والغنوة والأشعار
اتغَزِّلوا فيها
العشق شىء طاهِر
والوصف للأحرار
اتغَزِّلوا فيها
مَحلَى الغَزَل ف عيون
البنت لو حلوين
طَبع الغَزَل مجنون
والعاشقين مجانين
اِتغَزِّلوا فيها
صُمُّوا جمالها صَم
ضُمُّوا الشفايف ضَم
وانسوا الوجع والهَم
واتملُّوا ف التكوين
اِتغَزِّلوا فيها
ياللى أنتوا محرومين
من لَذِة النظرة
طعم الشفايف هوى
ريحة الضفاير مِسك
القلب عام وارتوى
باب القبول أرابيسك
اتغَزِّلوا فيها
الدنيا دى أنثى
بنوتة بضفاير
العقل وازن كون
والجسم أهو فاير
الحق لو يتقال
فالأصل فى التأنيث
خادم دروب الجمال
والنشوة والأحاسيس
ده الأنثى أصل الكون
والأنثى خير ونيس
فاِتغَزِّلوا فيها
ده الأصل فى التأنيث
الأصل فى التأنيث