م الآخر| يوميات موسيليني وعطية "حديد هز الدخيلة" (24)

كنت قولتلكوا إن خطة الشيطان نارين الناري كان أساسها لتخريب لبجوازة هو "حماة عطية" وعشان تفهموا أكتر أنا هشرحلكوا خطة الشيطان نارين الناري بالتفصيل.. الخطة كانت مبنية علي 3 محاور و كل محور منهم مبني علي 3 محاور تانيين، من الآخر كدا حسبة ييجي بتاع 68 محور و طبعاً زي ماحنا كلنا عارفين المحور عامل إزاي!! مفيش حد بيركب المحور و بيوصل ودا برضو ها يكون حال موسيليني وعطية.. خطة شيطان نارين الناري كانت المحور اللي مش هيوصل موسيليني وعطية للجواز.
بيسو الإبليس نزل إعلان في جريدة "أبولهب" بيطالب فيها بشياطين خريجي جامعة "الشعللة" بشرط خبرة لا تقل عن 8 حالات طلاق.. و كمان مكتفاش بكدة لأ دا عمل بيدچ على" الإبليسبوك" وكان مضمونها نفس مضمون الإعلان اللي في الجريدة.
ولإن البطالة مبهدلة جمهورية جحيم المهلبية، فإتقدم للوظيفة تريليون شيطان و كله لابس البدل ومعظم اللي إتقدموا للوظيفة كانو خريجي جامعات خاصة (حتى جهنم الجامعات الحكومة فيها بمجموع فحيت) من "جي يو جي" (جهنم يونيڤرستي أوف جحيم) "جي آي يو" (جهنم إنترناشيونال يونيڤرستي) و هكذا.. لأ واللي يجيب بلهارسيا إن كان في شيطان من اللي إتقدموا للوظيفة معاة كارت واسطة ممضي من إبليسو هز صاحب شركة "حديد هز الدخيلة" (الكوسة تتحدي الجميع) وشيطان تاني من طرف أبولهب (صاحب الجريدة الرسمية لجهنم) وشيطان تالت من طرف قريش جروب (صاحب بورتو قريش) والتالت من طرف إبرهة (صاحب شركات إبرهة نور وصاحب قنوات الجحيم والناس) زي ما انتوا شايفين كله جاي بواسطة تقيلة فطبيعي جداً إني أقولكوا إن كلهم إتقبلوا ماعدا اتنين بس كانو جايين تبع واحد من الفلول!.. أيوة متستغربوش جهنم برضو فيها نخبة وفيها فلووووول.. وللتوضيح أكتر الشياطين الأتنين دول كانوا جايين من طرف الفريق شهيق (الشهير ب شهيق يافندم) ف دول بقى خدوا بالجزمة و مشيوا!
قعد إبليس معاه الشياطين اللي إتقبلوا و فهمهم طبيعة الشغل إية، وقالهم..
يتبع..