م الآخر| يوميات موسيليني وعطية "جمهورية جحيم المهلبية" (23)

إبليس كان عامل "ميتينج" في "إنتركونتيننتال سيتي نارز" كان مجتمع فيه بكل الشياطين اللي واخدين كورسات في "التوليع بين الكوبلز"، بيسو كان طالب من كل شيطان يعمل "ستوري بورد" للخطة اللي هيوقعوا بيها بين موسيليني، وعطية.
بدأ "الميتينج" وبدأ كل شيطان في تسليم "الستوري بورد" بتاعته، وكل شيطان فيهم نفسه أن خطته هي اللي تتقبل عشان فية جايزة لأحسن "ستوري بورد"، الجايزة كانت عبارة عن حساب في بنك (جهنم إس بي سي) وقيمة المبلغ "100000 نارال أمريكي"، خلص وقت التسليم، والشياطين خدوا "بريك"، أما بيسو الإبليس فكان مشغول جداً في دراسة "الستوري بوردات"
وكان بيسو، عارف أن العلاقة اللي بين موسيلني وعطية قوية جداً فمحتاجة خطة جهنمية إبليسية للتفريق ما بينهم.
بعد ساعتين بالظبط بيسو الإبليس نده على شيطان "نارين الناري" رد علية شيطان نارين الناري.
بيسو قالة: ألف ألف مبروك انت "الستوري بورد" بتاعتك أفضل "ستوري بورد" اتقدمتلي.. وقام بتسليمة الجايزة، وكمان شهادة تقدير موثقة من وزير الثقافة بجمهورية جحيم المهلبية.
بيسو شكر كل الشياطين على مجهودهم، وطلب منهم أن يغادروا القاعة، لأنه كان عايز يجتمع بالشيطان "نارين الناري" على انفراد، عشان يناقش معاه الخطة الموضوعة.
بيسو: بص يا نارين لو الدنيا مشيت زي ما أنت راسمها كدة في "الستوري بورد" يبقي أنا كدة ضمنت إنهم مش بس هيسيبوا بعض، لا ده مش بعيد حد فيهم يفكر يسيب الدنيا بحالها، وضحك ضحكات شريرة متتالية.
طبعًا أنا عارف كويس أن أكيد اختيار إبليس كان صائب جداً، وأن فعلاً الخطة بتاعت شيطان نارين الناري هتولع التلج، حقيقي شيطان ابن إبليس، حاطط خطة نجاحها مضمون، عارفين شيطان نارين الناري مبتدي بخطة التفرقة ما بين الأتنين بإية؟؟...
أقول؟؟
ولا يتبع؟؟
لا هقول: حماتها....
يتبع