مصطفى درويش يعتذر ل«نقابة الممثلين» بعد هجومه عليها بسبب شريف دسوقي

تراجع الفنان مصطفى درويش، عن مهاجمته لنقابة المهن التمثيلية، برئاسة الفنان أشرف زكي، وذلك بعد تدهور الحالة الصحية للفنان شريف دسوقي، وبتر قدمه.
وكان «درويش»، كتب عبر حسابه الشخصي على موقع التواصل الاجتماعي «فيس بوك»، قائلا: «لا حول ولا قوه إلا بالله.. اللي حصل لشريف دسوقي ده حرام، حسبي الله ونعم الوكيل في اللي كان السبب.. لو كان حد وقف من النقابة، واتحرك قبل ما يتعمل فيه الكارثة دي، كان اتلحق، بس للأسف النقابه قالت لبدرية طلبة لما استنجدت بيهم، أصله مش عضو، فمش هينفع نساعده من النقابة، بس هنبقى نبعتلك مساعدة كدة شخصية».
ونشر مصطفى درويش قبل قليل، منشورا آخر جاء فيه، «تعديل للبوست، النقابة متكفلة بكل العلاج من أول المستشفى، وكانت متابعة حالة شريف من أولها لأخرها، عكس ما اتقالي أو وصلني، شكرا نقابه المهن التمثيلية بيتنا كلنا، شكرا دكتور أشرف ذكي».
وتابع مصطفي درويش قائلا: «ربنا يشفيك يا شريف، ويعينك علي اللي جاي، وكل الناس معاك وفي ضهرك، ومعلومة بس، احنا مكناش سايبين شريف لوحده زي ما ناس بتقول عن النقابة والممثلين والمنتجين، بس فيه مواضيع لا يمكن تتقال ولا ينفع تتفتح، فا ياريت نقف جمبه بكلمة حلوة، بدعوة حلوة وبس».
وقال درويش في منشوره الأول: «حقك عليا يا شريف سامحني، والله ما كنت أعرف أنك في الحالة دي، حقك عليا والله، وقدام الجميع أهو، والله ما هسيبك لحد ما أموت أنت مسئول مني مسئوليه كاملة.. حقك عليا وحقك علينا كلنا.. الأستاذ جمال العدل اتكفل بمصاريف المستشفى والعلاج، والأستاذة كاملة جابت له طرف صناعي من أحسن شركه للأطراف الصناعية.. شكرا لبدرية طلبة أنتي بميت راجل أنتي وناس إسكندرية».