عمرو خليل يشكر «الوطن» والصحفية سمر صالح على تقرير «سيدة التروسيكل»

وجه الإعلامي عمرو خليل مقدم برنامج «من مصر»، المذاع على شاشة «CBC»، الشكر لجريدة «الوطن»، والزميلة الصحفية سمر صالح، على نشر قصة كفاح السيدة ناهد جمال سعيد، المعروفة ب «سيدة التروسيكل»، في سبتمبر الماضي، بعنوان ناهد حمالة قسية.. ضهرها يشيل رمل وطوب وعفش وأب وأم ل5 بنات.
وقال «خليل»: «خلينا طبعا نشكر أصحاب الفضل في هذا الفيديو، أحنا أخذناه من موقع جريدة «الوطن»، ونشكر الزميلة الصحفية سمر صالح، الحقيقة ده جهدها في الأساس ولازم ننسب الفضل لأهله، وأحنا دورنا نسلط الضوء على مثل هذه الحالات، بشكر صحيفة الوطن، والزميلة الصحفية، والكاتب الصحفي الكبير محمود مسلم، وكل الزملاء في جريدة الوطن».
ووجه «خليل» حديثه للسيدة ناهد قائلا: «إنتي أمك دعيالك النهاردة، لكي أن تتخيلي الرئيس السيسي بيتصل عشان خاطرك، وثقي إن ربنا مش هيخذلك، وأعتقد دي أحلى هدية جاتلك في عيد الأم».
وتابع: «أنا عاوز أقولك مرة تانية إنتي نموذج مشرف وفوق راسنا جميعا، وكلنا متأكدين أن فيه زي الست ناهد آلاف من السيدات في مصر، الست المكافحة الواقفة بدراعها، ست ب 100 راجل بتحمي ولادها وبناتها وبتربيهم في أصعب الظروف، ويكفي أقولك أن ربنا كتبلك بإذن الله الخير عن طريق الرئيس السيسي».
ووجه الإعلامي الشكر للرئيس السيسي على الاستجابة الفورية والسريعة لمطالب السيدة ناهد، قائلا: «مقدرش غير إني أقول الحمد لله على استجابة الرئيس مشكورا للسيدة ناهد، ودة مش جديد على سيادته، وبشكره على المداخلة الجميلة وربنا يسعد قلبك زي ما بتسعد قلوب الناس وتجبر بخاطر الغلابة».
من جانبها قالت الإعلامية ريهام إبراهيم مقدمة البرنامج لسيدة التروسيكل: «إنتي وشك حلو علينا، وست عظيمة ومكافحة، وربنا كرمك، وأكيد أنتي شوفتي مشقة وصعوبات وربنا النهاردة توجلك وبيديكي هدية حلوة وبيقولك إن ربنا معاكي وشايفك ومقدر وعارف كويس أوي أنتي بتعملي إيه، وفي نفس الوقت صورة حلوة للست المصرية، وشقاكي مش بالساهل وتعبك مش هيعدي عادي، وجبر الخاطر فيها كبير جدا».
وتابعت: «وزي ما وشك حلو على الناس وتروحي تجهزى للبنات ربنا كرمك بردو وجبر خطرك وربنا دايما معاكي، واتصال الرئيس السيسي أحلى هدية جت النهاردة لينا على الهواء مباشرة دون أي ترتيب، وكنا بنتكلم مع الاستاذة ناهد واستجابة لمطالبها وحياتها الصعبة اللي شرحتها كان فيه رد سريع للرئيس السيسي».