حالة حرب

أيوه يا حضرات إحنا فى حالة حرب.. حالة حرب فى اتجاهات كتيرة.. بنحارب الإرهاب ومش فاهمة ليه ناس فاكرة إن أول ما «السيسى» بقى رئيس المفروض إن الإرهاب هيقف مرة واحدة ده بناءً على إيه؟.. كان هو اللى بيفجر فهيبطل يفجر.. هو ده مش نفس قصة الملثم اللى كان بيفجر خط الغاز لما «مرسى» بقى الرئيس بطل يفجر خط الغاز «مع الفارق لصحة الواقعة الثانية».. يا جماعة إحنا بنواجه إرهاب عشوائى غير منظم.. لأن ببساطة الأخ اللى بيفجر ده ممكن يكون جارك أو البواب أو أى حد فى شارعكم معمول له غسيل مخ.. مش إرهابى محترم كده عليه القيمة بيشتغل بطريقة منظمة كده.. وياريت مش كل حاجة تحصل تقولوا نغير الوزير.. هو يعنى إيه اللى هيحصل لو جبنا وزير داخلية جديد؟.. الإرهاب هيقف؟.. ليه الإرهابيين هيتكسفوا من الوزير الجديد فهيبطلوا يفجروا ويقتلوا الناس مثلاً؟
فيه غلطات أمنية طبعاً فيه.. أتحدى أى حد يقول إن فيه نظام أمنى سليم 100٪ ومفيش فيه ثغرات.. أى نظام أمنى فيه غلطات وثغرات.. النقطة إزاى نقلل حجم الثغرات دى ونسبة الأخطاء.. عن طريق تدريب وتحديث وتطوير الأفراد والأجهزة ودى كلها حاجات بتاخد مجهود وفلوس ووقت يعنى الوزير الجديد مش هيحققها تانى يوم ما يمسك فتغيير الوزير لوحده مش حل، خصوصاً وإحنا فى حالة حرب.
بنحارب اقتصادياً.. الوضع الاقتصادى بعد استنزاف الإخوان ليه على مدار سنة وتخطيطهم السيئ أصبح فى أسوأ أحواله.. واضح إن فيه ناس مش واخدة بالها إننا بقالنا 3 سنين ونص بنصرف أكتر ما بنكسب فلوس.. الكهرباء هتفضل تقطع لأنها مشكلة كبيرة مش بالهيافة اللى بعض الناس بتتعامل معاها.
هتقول لى طب ليه ما قلتوش كده أيام رئيس الجماعة الإرهابية «مرسى».. . هاقول لك لأن فيه فرق أن يبقى عندك مشكلة حقيقية وبين أن تبقى المشكلة إن فلوسك ووقود محطات الكهربا بيتسرق علشان يروح غزة وإحنا نقعد فى الضلمة.. فيه فرق وكبير، ومشكلتنا مع «مرسى» وجماعته ماكنتش الكهربا بس دى كانت مشكلة صغيرة من ضمن مصايب أكبر.. اللى يقول إننا مشّينا «مرسى» علشان الكهربا يبقى عنده قصر نظر فكرى محتاج يتعالج.. الكهربا مشكلة متشعبة وعلشان المشكلة تتحل محتاجة وقت ومجهود وفلوس.. وبما أن الحكومة لسه ما كملتش شهر والموازنة لسه الرئيس معتمدها من يومين يبقى مش فاهمة ليه متوقعين إن الأزمات اللى عندنا هتتحل دلوقتى حالاً.. إذا كانت الموازنة نفسها فيها عجز 10٪ من الناتج المحلى.
بنحارب خارجياً.. إحنا أسقطنا تنظيم ليه فروع عالمية ما شاء الله.. وليه مصالح مع دول كبيرة وبالتالى إحنا بنحارب التنظيم ده فى الخارج وبنحارب الدول اللى بتدعمه.
بنحارب نفسياً.. التنظيم والدول الداعمة ليه بتشن على مصر حرب نفسية قذرة بيستخدموا فيها الميديا العالمية والإشاعات.
لازم تفهم إن الدولة ومؤسساتها فى حالة حرب، ففوق إنت كمان عزيزى المواطن وانضم لدولتك فى حربها، اقف جنب بلدك خد بإيدها بدل ما نغرق كلنا.