عقب قرار رفع أسعار السجائر.. قراء "الوطن": "اضرب كمان عاوز أتوب"

أثار القرار الجمهوري برفع أسعار السجائر بقيمة تتراوح ما بين 175 قرشًا إلى 275 قرشًا، حالة من السخرية بين قراء بوابة "الوطن"، حيث طالب البعض بالتوقف عن التدخين، وتهكم آخرون بالقول: "اضرب كمان عاوز أتوب".
كتب وحيد طلخاوي، أحد قراء "الوطن"، "إحنا نرجع للسيسي نص مرتبه ويرجع الأسعار زي ماكانت، ويادار مادخلك شر"، وعلى نهجه علق محمود جمال بالقول: "مالك يا سيسي متعصب ليه أجدع ده مكنش نص مرتب اتبرعت بيه".
ومن جانبه قال أحمد عبدالدايم: "المفاجأة إن مؤيدي المعزول هما اللي بيعارضوا زياده السجائر والخمرة، هو انتوا قلتوا لي ملتكم إيه؟".
وربط نبيل البرعي، التوقف عن السجائر بشهر رمضان الكريم، واعتبرها فرصة لابد من اغتنامها وقال: "الناس اللي زعلانة، خلي بالك دي أجمل وأحلى فرصة إنك في شهر رمضان وممكن تبطل السجاير طول اليوم وبلاش تدخن بعد الإفطار ولو عدى عليك الشهر وما دخنتش يبقى تكمل لمدة 10 أيام كمان وتكمل أربعين يوم وهتلاقي نفسك زي الفل وتوفر فلوسك واشتري بيها فاكهة ولا شيكولاتة أو حتى كيلو لحمة".
وبشكل ساخر علق هشام، "اضرب كمان عاوز اتوب"، وعلى طريقة الفنانة نانسي عجرم وجه حسام ياسين رسالة إلى الرئيس عبدالفتاح السيسي قائلًا: "مفيش حاجة تيجي كده اهدى حبيبي كده".