بيان "6أبريل": أنشطتنا سلمية لمجرد التعبير عن الرأي ومستمرون في نضالنا

قالت حركة 6 أبريل، تعليقًا على الحكم الصادر بحظر أنشطة الحركة، إن أنشطتها بالكامل سلمية لمجرد التعبير عن الرأي.
وأضافت الحركة، في بيان لها، نشرته عبر صفحتها الرسمية على موقع التواصل الاجتماعي "فيس بوك": "ماخدناش إذن أو تصريح عشان نعمل الحركة ومن حق أي إنسان إنه يعبر عن رأيه طالما بيعبر عنه بسلمية ومش من حق حد يمنعه بأي شكل ولأي سبب".
أما بشأن أهداف الحركة، قال المسؤول عن الصفحة: "أنشطة الحركة هدفها الأساسي الاعتراض على كل نشاط بيعمله نظام الحكم وبتكون نتيجته تخريب الدولة، الدولة اللي بتحتل المركز الأخير في مستوى التعليم، الدولة اللي تقريبا نصف عدد مواطنيها أميين، الدولة اللى أكتر من 60% من مواطنيها تحت خط الفقر، الدولة اللي فيها حوالي 12 مليون مريض كبد وزيهم مرضى فشل كلوي، الدولة اللي شبابها مش عارف يتعلم ولا يشتغل ولا يعيش، الدولة اللي بتقتل وتسحل وتسجن معارضيها، الدولة اللي قضائها مسيس وبيستنى الحكم في التليفون، الدولة اللي شرطتها بلطجية أنشطتها تنحصر في الفساد والقتل والتعذيب والبلطجة، الدولة اللي جيشها اللي المفروض يحميها بياخد 40% من موازنتها بلاحساب ولا رقيب وسايب مهامه الأساسية ومتفرغ للسياسة ودعم مرشحه العسكري، عشان يحافظ على امبراطوريته الاقتصادية، لو الدولة دي بالشكل ده مش خربانة أصلا، ولو إن تراكم أخطاء نظم الحكم المتعاقبة جعل صورة الدول من الهشاشة بحيث إن هتاف متظاهر أو صرخة مظلوم ممكن تشوهها، يبقى الحكم مش هيغير من واقع الأمر في شيء".
واختتم: "6 أبريل مش مجرد حركة، 6 أبريل فكرة، 6 أبريل جزء مهم من صوت الجيل ده وحلمه، مكملين وأنشطتنا ورأينا وصوتنا هنقوله زي ما احنا عاوزين".