الرئيس الخبرة

بصت لى بكل تناكة وقالتلى بأسلوب اللى عارف وفاهم كل حاجة: «أنا لسه ما قررتش هنتخب مين.. أنا مستنية أشوف برنامج كل مرشح علشان أقرر هنتخب مين.. عايزة انتخب المرشح اللى برنامجه فيه رؤية واضحة للنهضة البلد».
الحقيقة أن كلمة نهضة دى بتجيبلى حالة أشبه بالإكزيما كده.. فاكرين يا ولاد مشروع النهضة.. كتبه خبراء اكتشفنا بعد كده أنهم «خبراء فى الفشل» وكان مشروع هينهض بمصر لدرجة أن إثيوبيا من كتر نجاحه وعلشان تغيظنا بيه عملت لنا «سد النهضة».
من ساعة ثورة 25 يناير والناس بتتكلم عن أن مرشح الرئاسة لازم يكون عنده رؤية لبرنامج انتخابى يقولنا هيعمل إيه فى سنوات حكمه وخطته إيه للبلد.
كلام جميل طبعاً ويا ريت فعلاً كل مرشح يقولنا رؤيته للى هيعمله فى سنوات حكمه.. لكن فى انتخابات 2012 كل مرشح قعد يحكى لنا هيعمل إيه وهيروح فين وييجى منين.. «ومرسى» حكالنا عن برنامجه اللى كان عنده مقدمة ومؤخرة وجناحين وبيطير.. وطلع فى الآخر بيبيع لنا الفنكوش.. ولا فيه برنامج ولا فيه رؤية ولا هو وجماعته عارفين يعملوا حاجة.. وتحت قيادته المجيدة بقينا من سيئ لأسوأ ووقعت مصر فى حفر ضلمة اسمها الدولة الفاشلة.
موضوع الرؤية أو البرنامج الانتخابى شىء محترم طبعاً.. لكن أنا بقى أصلاً معترضة على شروط الترشح لانتخابات الرئاسة.. عارفة إن كلامى ده متأخر بس لازم أقوله.. أنا شايفة إن منصب رئيس الجمهورية منصب تنفيذى كأنه رئيس مجلس إدارة شركة مثلاً.. ما ينفعش اللى يتقدم للمنصب ده يتقدم من غير «سيرة ذاتية» لازم يقولنا إيه خبرته؟؟.. إيه المناصب اللى اشتغل فيها؟؟.. إيه إنجازاته؟؟
أنا بقى عن نفسى الصراحة عايزة «رئيس خبرة» رئيس يقول لى رؤيته لفترة حكمه هتبقى عاملة إزاى وأنا هصدقه بناء على خبرته السابقة.
عايزة رئيس يكون ليه إنجازات سابقة فى حياته العملية.. مش واحد مستنى يبقى رئيس علشان يعمل إنجازات.. الناجح بيبقى دايماً ناجح.
ناس هتقول لى فيه مرشحين كانوا مظلومين من أنظمة سابقة وقضوا حياتهم فى السجن وبالتالى ما كانش عندهم فرصة يبقوا ناجحين يعملوا إيه؟؟ حلو جداً المرشحين دول بقالهم 3 سنين برة السجن إيه إنجازاتهم؟؟ عملوا إيه؟؟؟ حققوا إيه؟؟
مثلاً إيه الحكمة إن مرشح بقاله 3 سنين عمال يقول أنا كل اللى أملكه 7 آلاف جنيه؟؟ هل تعتقد أن ده نجاح مثلاً؟؟ هل تعتقد إن ده معناه إنك حد كويس؟؟؟ هل فيه إنسان طبيعى يفضل 3 سنين كل اللى حيلته فى الدنيا 7 آلاف جنيه؟؟ بتاكل منين انت وعائلتك؟؟ بتصرف منين؟؟ اعتذر عن كلامى الصادم بس ده مش دليل نجاح خالص مالص الصراحة.
«الرئيس الخبرة» هيوفر علينا وعلى البلد مشوار طويل.. لأن رؤيته اللى هيحطها لفترة حكمها هيبقى عارف هينفذها إزاى بحكم خبرتة العملية.
وضع البلد الحالى والمستقبلى مينفعش يقوده «رئيس برنامج» لسه هيجرب ويتعلم ويفهم كيفية إدارة الدولة.. آسفة مستقبلنا مش معمل تجارب لحد.. إحنا محتاجين رئيس عنده خبرة ورؤية يطلعنا من الحفرة اللى وقعنا فيها دى.. علشان كده أنا بدعوكم لانتخاب «الرئيس الخبرة».